කොරෝනා ව්‍යසනය නිසා එක් දිනකට පමණක් සීමා කළ රජයේ නිවාඩු දිනය දීර්ඝ නොකරන බවට රජය ගෙන ඇති තීන්දුව වෙනස් කර රෝගයෙන් ආරක්ෂාවීම සඳහා අවස්ථාව සලසා දෙන ලෙස ශ්‍රී ලංකාවේ රාජ්‍ය සේවාවේ මුල් පෙලේ වෘත්තීය සමිති ගණනාවක් රජයෙන් ඉල්ලා සිටී.
පෙබරවාරි 16 සඳුදා දිනය නිවාඩු දිනයක් බවට පත් කළත් තව දුරටත් එය තවත් දීර්ඝ නොකරන බව රාජ්‍ය පරිපාලන අමාත්‍යංශයේ ලේකම්වරයා විසින් ප්‍රකාශයට පත් කර තිබේ.
ලෝක වසංගතයක් බවට ප්‍රකාශයට පත්වී ඇති කොරෝනා ආසාදනය වූ බවට ශ්‍රී ලංකාවේ හඳුනාගත් රෝගීන් සංඛ්‍යාව 21 දක්වා ඉහළ යාම බරපතල තත්වයක් බව වෘත්තීය රජයට අනතුරු අඟවා සිටින සමිති නායකයෝ එයින් ආරක්ෂා වීමට රාජ්‍ය සේවකයන්ට අවස්තාවක් සලසා දිය යුතු බව පෙන්වා දෙති.
“මෙය බරපතල තත්වයක් සේ සලකා COVID-19 පැතිරීම වැලැක්වීමට සහ ස්වයං නිරෝධායනයට අවස්ථාවක් සැලසීමක් ලෙස ඉදිරි දින කිහිපය ද රජයේ නිවාඩු දිනක් ලෙස ප්‍රකාශයට පත් කරන ලෙස ඉල්ලා සිටිමු” යි වෘත්තීය සමිති දහතුනක නායකයන් අත්සන් කළ නිවේදනයේ සඳහන් වේ.
ලංකා කළමනාකරණ සේවා නිලධාරීන්ගේ සංගමයේ උදේනි දිසානායක, ලංකා ගුරු සංගමයේ ජෝසප් ස්ටාලින්, රජයේ කළමනාකරණ සේවා නිලධාරීන්ගේ සංගමයේ එස්. එස් අත්තනායක, වාරිමාර්ග පොදු සේවක සංගමයේ ඩබ්. ඇයි අ සිල්වා, ආනුවේ කම්කරු සමිති සම්මේලනයේ ඩී.එම්.ඩී අබේරත්න, පළාත් කළමනාකරණ සේවා නිලධාරීන්ගේ සංගමයේ විජිත පේමරත්න, ජාතික තැපැල් හා විදුලි සංදේශ සේවක සංගමයේ ගාමිණී හෙට්ටිආරච්චි, දුම්රිය ඒකාබද්ධ පෙරමුණේ රාජා කන්නංගර, රාජ්‍ය සේවා ජාතික වෘත්තීය සමිති සම්මේලනයේ ලලිත් ඉන්දික, ජාතික දුම්රිය සේවා සමිතියේ උපුල් කුමාර, තොරතුරු හා විදුලි සංදේශ සියලු සේවක සංගමයේ ජේඩී ගුරුසිංහ සහ රජයේ කර්මාන්ත ශාලා සේවක සංගමයේ සරත් රෝහණ එම නිවේදනයට අත්සන් තබා ඇත.
Facebook Comments
