ජනමාධ්‍යට අදහස් ප්‍රකාශ කළ බවට චෝදනා කොට කොළඹ මහානාම විදුහලේ ගුරුවරියක වැඩ තහනමට ලක්කිරීම නීති විරෝධී බව ප්‍රකාශ කරමින් ශ්‍රේෂ්ඨාධිකරණය විසින් තීන්දුවක් ලබා දී ඇත.
තමාගේ වැඩ තහනම් කිරීමට පියවර ගැනීම නීති විරෝධී යයි ප්‍රකාශ කරන ලෙස ඉල්ලා මහානාම විදුහලේ සේවය කළ සමන්ති මනෝහාරි බැලකැටිය නමැති ගුරුවරිය විසින් ගොනුකර තිබුණු මූලික අයිතිවාසිකම් පෙත්සමක තීන්දුව ලබාදෙමින් අගවිනිසුරු කේ.ශ්‍රීපවන් ඇතුළු ත්‍රිපුද්ගල විනිසුරු මඩුල්ලක් විසින් අද(28) මෙම නියෝගය ලබාදී තිබේ.
ලංකා ගුරු සංගමය විසින් පැවැත්වූ මාධ්‍ය හමුවකදී කොළඹ, මහානාම විදුහලේ සිදුවෙමින් පැවති දූෂණ හා අක්‍රමිකතා සම්බන්ධයෙන් මෙම ගුරුවරිය විසින් ජනමාධ්‍යයට කරුණු පැහැදිලි කිරීම හේතුවෙන් ඇය වැඩ තහනමට ලක්කර ඇත.
විදුහල්පති ප්‍රේමලාල් කුමාරසිරි හා තුසිත මාලගොඩ යන ගුරුභවතුන් විසින් තමාගේ වැඩතහනම් කිරීම තුළින් තම මූලික අයිතිවාසිකම් උල්ලංඝණයවී ඇති බවත්, එම ක්‍රියාමාර්ගය නීති විරෝධී බව ප්‍රකාශ කරන ලෙසත් පෙත්සම්කාරිය විසින් මුලික අයිතිවාසිකම් පෙත්සමක් ගොණු කරමින් ශ්‍රේෂ්ඨාධිකරණයෙන් ඉල්ලා තිබිණි.
මෙම පෙත්සමට අදාළව තීන්දුව ලබාදෙමින් අගවිනිසුරුවරයා ප්‍රමුඛ ත්‍රිපුද්ගල විනිසුරු මඩුල්ල පවසා ඇත්තේ මෙම වැඩතහනම තුළින් ආණ්ඩුක්‍රම ව්‍යවස්ථානුකූලව නීතිය ඉදිරියේ සමානාව සැලකීම උල්ලංඝණය වී ඇති බව හා ඇයගේ අදහස් ප්‍රකාශ කිරීමේ අයිතිය උල්ලංඝණය වී ඇති බවයි.
මේ හේතුවෙන් ඇයගේ මූලික අයිතිවාසිකම් කඩවී ඇති බව තීන්දු කළ ශ්‍රේෂ්ඨාධිකරණය වගකිව යුතු විදුහල්පතිවරයාට හා ගුරුවරයාට මෙම ගුරුවරියට රුපියල් ලක්ෂය බැගින් වන්දි ගෙවන ලෙසද නියෝග කළේය.
භාෂණයේ හා අදහස් ප්‍රකාශ කිරීමේ අයිතිය තහවුරු වීමක්
මේ අතර ලංකා ගුරු සංගමයේ ප්‍රධාන ලේකම් ජෝෂප් ස්ටාලින් කියා සිටියේ මෙම නඩු තීන්දුව රාජ්‍ය සේවකයින්ගේ භාෂණයේ හා අදහස් ප්‍රකාශ කිරීමේ අයිතිය තහවුරු කරන ඉතා වැදගත් නඩු තීන්දුවක් වන බවයි.
තම සේවා ස්ථානවල සිදුවන අකටයුතුකම් වලට එරෙහිව නැඟී සිටීමට සේවකයින්ම මෙමඟින් දිරියක් ලැබෙනු ඇති බවත්,නීතිමය ආරක්ෂාව තමාට පවතින බව තහවුරුව ඇති බවත් ඔහු වැඩිදුරටත් සඳහන් කළේය.
Facebook Comments
