උතුරේ දෙමළ මාධ්‍යවේදියකුට හිරිහැර කිරීම අත්හිටුවන ලෙස යහපාලන රජයෙන් ඉල්ලා සිටින ජාත්‍යන්තර මාධ්‍ය සංවිධානයක් මාධ්‍යවේදීන් මර්ධනය කල බියකරු අතීතයට ආපසු නොයන ලෙස අනතුරු අඟවා තිබේ.
යාපනයේ ආනෙයිකෝට්ටේහි කන්නගි අම්මාන් කෝවිලේ මේ වසරේ ජූනි මාසයේ පවත්වන ලද උත්සවයක් වාර්තා කළ නිදහස් මාධ්‍යවේදී උදයරාසා ශාලින්ට එවක් පටන් දිගටම කොළඹ ත්‍රස්ත විමර්ශන ඒකකයට කැඳවා ප්‍රශ්න කිරීම හෙළා දකිමින් දේශසීමා නොමැති වාර්තාකරුවෝ (RSF) සංවිධානය ඔහුට එරෙහි අඩන්තේට්ටම් නවතන ලෙස ආණ්ඩුවෙන් ඉල්ලා සිටී.
“පැහැදිලි ලෙසම උදයරාසා ශාලින් බියගැන්වීම සඳහා සැලසුම් කර ඇති මෙම බිය ගැන්වීම් මතකයට නංවන්නේ දෙමළ ජනමාධ්‍යවේදීන් ආකාරයෙන් වධයට ගොදුරු කරගත් ශ්‍රී ලංකාවේ නපුරුම කාල පරිච්ඡේදයයි. එම විනාශකාරී අතීතයට ආපසු නොයෑම සඳහා ඇති අධිෂ්ඨානය කොළඹ ආණ්ඩුව මගින් විදහා දැක්විය යුතුය.” යන්න RSF නිකුත් කල නිවේදනයේ දැක්වේ.
උදයරාසා ශාලින් ප්‍රශ්න කිරීමට පදනම් කරගෙන ඇත්තේ කෝවිල තුල තිබූ පාරම්පරික දෙමළ වාසභූමි දැක්වෙන තොරණක ඡායාරූපයක් “වාලම්පුරි” පුවත්පතේ පල කිරීමයි.
පසුගිය දෙමාසය පුරාම මාධ්‍යවේදියා ප්‍රශ්න කිරීම සඳහා කොළඹට කැඳවා ඇති අතර, පළමු විභාග කිරීම සඳහා නීතිඥ සහාය ලබා ගැනීමට හෝ TIDය ඔහුට අවසර දී නැති බවටයි චෝදනා කරන්නේ.
“අවුරුදු දෙකකට ඉස්සර මේ දේ උනානම්, අපි උඹගෙන් ප්‍රශ්න අහන්නේ නැතිව කකුල් දෙකෙන් එල්ලලා අතුරුදහන් කරනවා,” යි TID නිලධාරීන් ඔහුට කිහිපවර තර්ජනය කර ඇති බව ද එම සංවිධානය පවසයි.
මේ සියවස ආරම්භයේ සිට ශ්‍රී ලංකාවේ අඩුම වශයෙන් මාධ්‍යවේදීන් 15 දෙනකුවත් ඝාතනය කර ඇති බව පෙන්වා දෙන දේශසීමා නොමැති වාර්තාකරුවෝ (RSF) සංවිධානය එම ඝාතන වලට වගකිවයුත්තන් අදත් දඬුවමින් ගැලවී සිටින බව රජයට සිහිපත් කර දී තිබේ.
Facebook Comments
