රථ වාහන දඩ මුදල් සංශෝධනයට අදාළව පත් කළ කමිටුවේ වාර්තාව ජනාධිපති මෛත්‍රීපාල සිරිසේන වෙත බාර දී තිබේ.
ජනාධිපති ලේකම් කාර්යාලයේදී 11 අඟහරුවාදා එම කමිටු වාර්තාව ජනාධිපතිවරයා වෙත බාර දුන් බව ප්‍රවාහන අමාත්‍යාංශ ලේකම් නිහාල් සෝමවීර සඳහන් කළේය.
රථ වාහන වැරදි සඳහා වන දඩ මුදල් ඉහල නැංවීමට ඉදිරිපත් වූ අය වැය යෝජනාවත් සමඟ ප්‍රවාහන ක්ෂේත්‍රයේ විවිධ පුද්ගලයන්ගෙන් එල්ල වූ දැඩි විරෝධය හමුවේ ඒ පිලිබඳ සොයාබලා නව දඩ පත්‍රිකාවක් සකස් කිරීමට ජනාධිපතිවරයා විසින් විශේෂ කමිටුවක් පත් කරනු ලැබීය.
මුදල් අමාත්‍යාංශ ලේකම්,ප්‍රවාහන අමාත්‍යාංශ ලේකම්, මෝටර් රථ ප්‍රවාහන කොමසාරිස් ජනරාල්, රථ වහන කොට්ඨාසය බාර නියෝජ්‍ය පොලිස්පති හා නීතිපති දෙපාර්තමේන්තුවේ නීති කෙටුම්පත් අංශයේ නිලධාරියෙකුගෙන් අදාළ කමිටුව සමන්විතය.
ඒ අනුව එම කමිටුව විසින් සකස් කර ජනාධිපතිවරයා වෙත ඉදිරිපත් කරන ලද වාර්තාව ඉදිරියේදී කැබිනට් මණ්ඩලය වෙතද ඉදිරිපත් කිරීමට කටයුතු කරන බව ප්‍රවාහන අමාත්‍යාංශ ලේකම් නිහාල් සෝමවීර මහතා සඳහන් කළේය.
Facebook Comments
