දෙමළ ජාතික සන්ධාන ඒකීය රාජ්‍යයක් හා බෞද්ධාගමට ප්‍රමුඛස්ථානය ලබා දීම වෙනුවෙන් පෙනී සිටියත් ඉදිරියේදී විගේනේෂ්වරන් හෝ ගජේන්ද්‍ර කුමාර් පේනනම්බලම් පාර්ලිමේන්තුවට පැමිණියහොත් එසේ නොවනු ඇති බවට එක්සත් ජාතික පක්ෂ මන්ත්‍රීවරයෙකු ප්‍රකාශ කර තිබේ.
මෙය ව්‍යවස්ථාව ගෙන ඒමට සුදුසු වෙලාව නොවන බවට කරන ප්‍රකාශ වැරදි බව කී පාර්ලිමේන්තු මන්ත්‍රී නව ව්‍යවස්ථාවක් ගෙන ඒමට සුදුසුම අවස්ථාව මෙය බවට 21 සඳුදා පැවති මාධ්‍ය හමුවක දී කියා සිටියේය.
“සුමන්තිරන් මහත්තයලා ඒකීය රාජ්‍ය වෙනුවෙන් පෙනී ඉන්නවා, බුද්ධාගමට ප්‍රමුඛස්ථානය දෙන්න ඕනේ කියලා පිළිගන්නවා. හැබැයි 2020 පස්සේ මේ පාර්ලිමේන්තුවට විගේනේෂ්වරන් එන්න පුලුවන් ගජේන්ද්‍ර කුමාර් පේනනම්බලම් මහත්තයලා එන්න පුලුවන් එතකොට ඊලඟට ව්‍යවස්ථා හදන්න ඒගොල්ලො එක්ක ගණුදෙනු කරන්න වෙන්නෙ මේ විදියට නෙමෙයි. සියලු දෙනාම එක තැනකට ගන්න පුලුවන් නම් මේක තමා හොඳම අවස්ථාව.”
මේ මොහොතේ ව්‍යවස්ථාව සකස් කර ගැනීමට නොහැකි වුවහොත් 2078 වන තෙක් එනම් වත්මන් ව්‍යවස්තාවට වසර සීයයක් වන තුරු නව ව්‍යවස්ථාවක් නිර්මාණය කර ගත නොහැකි වනු ඇති බවට සැක පළ කළේය.
නව ව්‍යවස්ථාවක් සකස් කර ගැනීමේ ක්‍රියාවලියට ශ්‍රී ලංකා නිදහස් පක්ෂය සම්බන්ධ කර ගැනීමේ වගකීම ජනාධිපතිවරයා සතු බව කී මන්ත්‍රීවරයා නව ව්‍යවස්ථාවක් ගෙන එන බවට 2015 ජනාධිපතිවරණය අවස්ථාවේ දුන් පොරොන්දුව ද සිහිපත් කර දුනි.
නව ව්‍යවස්ථාවක් ගෙන ආ යුත්තේ රට ගැන සිතා මිස ජන්ද වෙනුවෙන් නොවන බව ද එක්සත් ජාතික පක්ෂ පාර්ලිමේන්තු මන්ත්‍රී නලින් බණ්ඩර වැඩි දුරටත් කියා සිටියේය.
Facebook Comments
