ශ්‍රී ලංකාවේ ආරක්ෂ අංශ විසින් සිදු කරන ලද අපරාධ සම්බන්ධව ඔප්පු කල හැකි තොරතුරු ලබා දුනහොත් දඬුවම් කිරීමට සුදානම් බව ආරක්ෂ ලේකම්වරයා කොළඹ පැවති උත්සවයක දී ඩයස්පෝරව වෙත කියා තිබේ.
ඉදිරි සති දෙක ඇතුලත ලංකාවේ සිදු මිලේච්ජතම හා බිහිසුණුම මිනීමැරුමකට සම්බන්ධ වු හමුදාවේ එකොළොස් දෙනෙකුට එරෙහිව චෝදනා ගොණුකරනු බවත් ඉන් පසුව මෙරට හමුදාව හෝ රජය මානව හිමිකම් කඩ කල අමානුෂික ලෙස කටයුතු කල හමුදාවට දඬුවම් නොදෙන බවට ඩයස්පෝරාවට චෝදනා කල නොහැකි බව හෙතෙම කියා සිටියේය.
“ලංකාවේ සිදුවෙච්ච බිහිසුණු මිලේච්ජ මිනිමැරුම් කළ 11 දෙනෙකුට අපි ඉදිරියේ දී නඩු පවරනවා. එතකොට ඩයස්පෝරාවට කියන්න බැහැ මානව හිමිකම් කඩකරපු හමුදා නීතිය කඩපු අයට දඬුවම් දෙන්නේ නැහැ කියලා.” යි ආරක්ෂක ලේකම් හේමසිරි ප්‍රනාන්දු 21 සඳුදා කොළඹ නාලන්දා විද්‍යාලයේ උත්සවයකට එක්වෙමින් පැවසීය.
“අපි එදාට අභියෝග කරනවා ඩයස්පෝරා එකට උඹලට තියෙනවා නම් තවත් මේ වගේ ඔප්පු කරන්න පුලුවන් සාධක ඇති, ඒ වාගේ මිනීමැරුම් ගැන අපිට දෙන්න. අපි ඒවත් දඬුවම් දෙනවා.” ආරක්ෂ ලේකම්වරයා කියා සිටියේය.
රණවිරුවා
රණවිරුවෙක් වීමට අනිවාර්යෙන්ම තමන්ගේ නමට පදක්කමක් ගැසට් කළ යුතු බව කී ආරක්ෂක ලේකම් හේමසිරි ප්‍රනාන්දු මේ රටේ බොහෝ දෙනා රණවිරුවෝ කියන එක වැරදි විදිහට අර්ථකතය කරන බවට චෝදනා කළේය.
“රණවිරුවෙක් වීමට අනිවාර්යෙන්ම තමන්ගේ නමට පදක්කමක් ගැසට් කළ යුතුමයි. මාස තුනකට කලින් හමුදාවට බැඳුණු කොල්ලත් බස් එකෙන් බහින්නේ මම රණවිරුවෙක් කියලා හිතාගෙන. නමුත් ඒක හරියන්නේ නැහැ. මේ රටේ බොහෝ දෙනා රණවිරුවෝ කියන එක වැරදි විදිහට අර්ථකතනය කරනවා. හමුදාවේ සේවය කරපු එක්කෙනෙක් හමුදාවෙන් ගිහිල්ලා මිනියක් මරපු දවසකට එයාට රණවිරුවෙක් කියන්න බැහැ. එයාට කියන්නේ මිනීමරුවෙක් කියලා. ඒවගේ අයට ලංකාවේ නීතියට අනුව උපරිම දඬුවම් ලබාදීමට අපි කටයුතු කරනවා.”
කොළඹ නාලන්දා විද්‍යාලයේ ආදි සිසුවෙකු වන ආරක්ෂක ලේකම් හේමසිරි ප්‍රනාන්දු හට උපහාර දැක්වීම වෙනුවෙන් එම විදුහල මෙම උත්සවය සංවිධානය කර තිබුණි.
මෙම අවස්ථාවට විද්‍යාලයේ ආදි සිසුවෙකු වන ගුවන් හමුදාපති එයාර් මාෂල් කපිල ජයම්පති ද එක් විය.
Facebook Comments
