ගෝඨාභය රාජපක්ෂ පාලන සමයේ කෝවිඩ් වසංගතයෙන් ආතුර වී මියගියවුන්ගේ සිරුරු බලහත්කාරයෙන් පුළුස්සා දැමීම වලකා ඒවා භුමදානය සදහා ඉඩම් පරිත්‍යාග කළ නැගෙනහිර පළාතේ මුස්ලිම්වරුන්ට ආණ්ඩු විසින් කිසිදු සහනයක් ලබා නොදීම නිසා ඔවුන් පත්ව සිටින ඉරණම පළාතේ ජනතා නියෝජිතයක් පාර්ලිමේන්තුවේ හෙලි කර තිබේ.
ශ්‍රී ලංකා මුස්ලිම් කොංග්‍රසයේ ජාතික ලැයිස්තු පාර්ලිමේන්තු මන්ත්‍රී මොහමඩ් සාලි නලීම් පවසන්නේ කොරෝනාබාධිත සිරුරු මිහිදන් නොකරන ලෙස ඉල්ලමින් රට පුරා ස්ථාන කිහිපයකම විරෝධතා දියත් වන සමයක එම සිරුරු භුමදානය සදහා මුස්ලිම් ජනතාව පරිත්‍යාග කළ ඉඩම් අක්කර 17 ක භුමිය ඒ දක්වා හේන් ගොවිතැන් කළ ඉඩම් බවයි.
“කෝවිඩ් මළ සිරුරු භුමදානය කිරීමට ස්ථානයක් සොයමින් සිටියදී ඔට්ටමාවාඩි ප්‍රදේශයේ මජ්මා නගර් ප්‍රදේශයේ ජනතාව ඉදිරිපත් වී අක්කර 17ක පමණ ඉඩමක් දුන්නා. ඒ මිනිස්සු මුස්ලිම් අයට විතරක් නෙවෙයි මුළු ශ්‍රී ලාංකීය ජනතාවටම සොහොන් බිමක් දුන්නා. මිහිදන් කරන්න එපා කියලා වෙනත් තැන්වල උද්ඝෝෂණ කරනකොට ඒ ජනතාව ඉඩම දිලා මළ සිරුරු මිහිදන් කරන්න ඉඩ දුන්නා.”
ඕට්ටමාවඩි සුසාන භූමියේ මළ සිරුරක් අවසානයට මිහිදන් කරන ලද්දේ 2022 මාර්තු 4 දාය. අවුරුද්දක කාලය තුල එහි භූමදානය කරන ලද මළවුන් සංඛ්‍යාව 3634 කි. එයින් බහුතරය 2992ක් වන මුස්ලිම්වරුන් වුවත්, බෞද්ධයන් 287 දෙනකුද එහි වල දමා ඇති බව සෞඛ්‍ය අමාත්‍යාංශය පවසයි.
සෞඛ්‍ය අමාත්‍යාංශයේ එවක සම්බන්ධීකරණ ලේකම් අන්වර් හම්දානි විසින් නිකුත් කොට ඇති නිල සංඛ්‍යාලේඛන අනුව ඕට්ටමාවඩි සුසානයේ සැතපෙන්නන් අතර පිරිමි 2225 ක්ද, ගැහැණු 1409 ක් ද වන හින්දුන් 270 ක් සහ කිතුනුවන් 85ක් ද වෙති.
කොරෝනා වසංගතයෙන් මියගිය රෝගීන්ගේ මල සිරුරු ලෝක සෞඛ්‍ය සංවිධානයේ නිර්දේශ නොතකා ඥාතීන්ගේ විරෝධය මැද බලහත්කාරයෙන් පුළුස්සා දැමීම ඇතුළුව ඊට අදාලව රජය විසින් කරන ලද බරපතල වැරදි විමර්ශනය සඳහා පාර්ලිමේන්තු විශේෂ කාරක සභාවක් පත් කිරීමට මුස්ලිම් කොන්ග්‍රස් නායක රවුෆ් හකීම් පෙබරවාරි 07 වැනිදා පාර්ලිමේන්තුවට පුද්ගලික මන්ත්‍රී යෝජනාවක් ඉදිරිපත් කර තිබුනි.
එම විවාදයට එක් වෙමින් මොහමඩ් සාලි නලීම් මන්ත්‍රීවරයා තව දුරටත් අවධාරණය කර තිබුනේ සිය කෘෂි භුමිය පරිත්‍යාග කළ දුගී දුප්පත් ජනතාවට ආණ්ඩුව විසින් කිසිදු සහනයක් හෝ ආදේශක ඉඩමක් ලබා නොදීම නිසා ඔවුන් මහත් දුකට පත්ව ඇති බවයි.
“කොහොම වුණත් ඒ මිනිස්සු ඉන්නේ හරිම දුක්ඛිත තත්වයක. මොකද එතන ජීවත් වෙන දුප්පත් මිනිස්සු එදිනෙදා කුලී වැඩ කරලා ජීවත්වන මිනිස්සු ඒ සිරුරු මිහිදන් කළ ඉඩම හේන් ගොවි තැනට භාවිත කළ ඉඩමක්. පහුගිය ආණ්ඩුවේ ඉඳන් මේ ආණ්ඩුව දක්වාවත් ඒ ඉඩම වෙනුවෙන් කිසිම සහනයක් හෝ ආදේශක ඉඩමක් හෝ දීලා නැහැ. ඒ ජනතාවට සහනයක් දෙන්න කියලා මම ඉල්ලා සිටිනවා.”
කොරෝනා සමයේ මියගිය අයගේ මෘතදේහ බලහත්කාරයෙන් පුළුස්සා දැමූ ආණ්ඩුව ලෝක ඉතිහාසය තුල, මනුෂ්‍ය ඉතිහාසය තුල ශ්‍රී ලංකාවේ සියලුම සංස්කෘතීන්ට එරෙහිව සාහසික අපරාධයක් කරන ලද පිරිසක් ලෙස ඉතිහාස ගතවී හමාර බව එම විවාදයට එක් වෙමින් මුජිබුර් රහුමාන් විපක්ෂ මන්ත්‍රීවරයා අවධාරණය කර තිබුනි.
දෙස් විදෙස් විවේචන නොතකා අවුරුද්දක් තිස්සේ බලහත්කාරයෙන් පවත්වාගෙන ගිය සියලු කෝවිඩ් මළ සිරුරු පිළිස්සීමේ ප්‍රතිපත්තිය 2021 මාර්තුවේ දී වෙනස් කළ ආණ්ඩුව මඩකලපුවේ, ඕට්ටමාවඩියේ මජ්මා නගර් හි මුස්ලිම්වරුන් විසින් පරිත්‍යාග කරන ලද භුමියක පමණක් මෘතදේහ භුමදාන කරන ලෙස සීමා පැනවුයේය.
එම තහංචිය ඉවත් කරගන්නා ලද්දේ එයින් හරියටම අවුරුද්දකට පසුවය.
ගෝඨාභය රාජපක්ෂ පාලනයට එරෙහිව දියත් කෙරුණු පළමු දැවැන්ත මහජන උද්ඝෝෂණය වන දෙමළ දේශපාලන නායකත්වයෙන් 2021 පෙබරවාරි මුල දින පහක් තිස්සේ කිලෝමීටර් 700ක් දුර ගමන් කළ P2P නමින් ප්‍රකට පොතුවිල් සිට පොලිකන්ඩි දක්වා වූ පාද යාත්‍රාවේ දී මුස්ලිමුන් බලහත්කාරයෙන් ආදාහනය කිරීමට එරෙහිව ඉහළින්ම විරෝධය පලවිය.
ඉන් දින කීපයක් ඇවෑමෙන් පකිස්තාන අගමැති ඉම්රාන් ඛාන් ශ්‍රී ලංකාවට පැමිණීමෙන් අනතුරුව කොරෝනාබාධිත මළ සිරුරු ඕට්ටමාවඩි සුසානයේ පමණක් භූමදානයට රජය හේතු දැක්වීමකින් තොරවම අවසර ලබා දී තිබුනි.
Facebook Comments
