කම්හල් සේවක සේවිකා ජීවිත මුල් තැන ලා සලකන ලෙස රජයෙන් ඉල්ලයි

වසංගත සමයේ නිෂ්පාදනය අඩාල වී තිබෙන කර්මාන්ත ශාලා හිමියන් තමන්ගේ පැවැත්ම සඳහා රජයේ ආධාර ඉල්ලා දිනක් ගතවත්ම, එම කම්හල් වල සේවක සේවිකාවන්ගේ ආර්ථික දුෂ්කරතා විසඳීමට මැදිහත් වන ලෙස ආණ්ඩුවට ඉල්ලීමක් ඉදිරිපත් වී තිබේ.

එම ඉල්ලීම ඉදිරිපත් කොට ඇත්තේ කොරෝනා වසංගතය හේතුවෙන් සිය රැකියාවේ සුරක්ෂිත භාවය පිළිබදව අවිනිශ්චිතාවයකට මුහුණ දී සිටින සේවකයන්ගේ අතිවාසිකම් හා යහපැවත්ම තහවුරු කිරිම පිනිස රැකී රක්ෂා හා කම්කරු අමාත්‍යවරයා වෙත යෝ ජනා වලියක් ලබාදුන් නිදහස් වෙළෙඳ කලාපීය සේවකයන් සම්බන්ධයෙන් කටයුතු කරන ප්‍රමුඛතම වෘත්තිය සමිති හතක් විසිනි.

විදේශ කටයුතු, නිපුණතා සංවර්ධන හා රැකී රක්ෂා හා කම්කරු අමාත්‍යය දිනේෂ් ගුණවර්ධන වෙත ලිපියක් යොමු කරමින් එම සංවිධාන අප්‍රේල් 23 දින පෙන්වා දී ඇත්තේ පසුගිය දශක කිහිපය පුරා ඇඟලුම් කර්මාන්තය ඇතුලු අපනයන සැකසුම් කර්මාන්තවල සේවක සේවිකාවන් ශ්‍රී ලංකාවේ ආර්ථිකය සදහා දක්වන ලද දායකත්වය අතිමහත් වන අතර මෙම අසීරු අවස්ථාවේ ඔවුන්ගේ අතිවාසිකම් හා යහපැවත්ම තහවුරු කිරිම සේව්‍ය පාර්ශවයේ මෙන්ම රජයේ ද මූලික වගකීමක් බවයි.

කොරෝනා වෛරස් ව්‍යාප්තිය පාලනය කිරීමේ වැඩ පිළිවෙල යටතේ නිවෙස් බලා ගොස් සිටින නිදහස් වෙළද කලාප සේවක සේවිකාවන් දස දහස් සංඛ්‍යාත පිරිසකට සිය රැකියාව අහිමිවීමේ අනතුරක් මතුව තිබෙන මේ මොහොතේ නිදහස් වෙළද කාලපීය සේවකයන් සමග කටයුතු කරන වෘත්තීය සමිති හා සංවිධාන 7 කගේ අත්සනින් යුතුව වෙනත් වෘත්තීය සමිති හා සිවිල් සමාජ සංවිධාන 20 ක ගේ සහයෝගයෙන් යොමු කර ඇති ලිපිය මගින් ඔවුන් වැඩි දුරටත් අමාත්‍යවරයාගෙන් ඉල්ලා ඇත්තේ සිය යෝජනා වැඩිදුර සාකච්ඡා කිරිම සදහා අවස්ථාවක් ලබාදෙන ලෙසයි.

මේ වන විටත් තම ගම්බිම් කරා යා ගත නොහැකි වූ විශාල සේවක සේවිකාවන් පිරිසක් තවමත් බෝඩිං හෝ කුලී නිවාස හෝ තාවකාලික වාසස්ථානවල රැදී සිටින බව පෙන්ව‌ා දෙන වෘත්තිය සමිති අමාත්‍යවරයාට පළමු කොටම අවධාරණය කර ඇත්තේ ඔවුන් පිළිබඳ නිසි කඩිනම් ගණනයක් වහාම සිදුකර ඔවුන්ගේ මූලික අවශ්‍යතා සැපිරිම සදහා පියවර ගත යුතු බවයි.

එමෙන්ම පසුගිය මාසය තුළ වැටුප් නොලැබී අසරණව සිටින අය සදහා ගෙවල් හෝ බෝඩිං කුලී ගෙවීමට රජයේ මැදිහත්විය යුතු බවටත් ඔවුන් යෝජනා කර තිබේ.

වසංගත තත්වය ව්‍යාප්ත වීමේ අඩුවීමක් පෙනෙන්නට නොලැබෙන තත්වයක් තුළ අපනයන සැකසුම් කර්මාන්ත නැවත ආරම්භ කිරිමට රජය ගත් තීරණය සේවකයන්ගේ ජීවිතවල වටිනාකම ප්‍රමුඛ කොට නැවත සලකා බලන ලෙසද වෘත්තිය සමිති සිය ලිපිය මගින් දෙවන කරුණ ලෙස අමාත්‍යවරයාගෙන් අවධානයට ලක් කර තිබේ.

තෙවන කරුණ ලෙස ඔවුන් අමාත්‍යවරයාගේ අවධානයට ලක් කර ඇත්තේ පහුගිය කාලසීමාව පුරා සේවකයන් විසින් කරනු ලැබූ සේවාවන් වෙනුවෙන් ඔවුනට හිමි වැටුප්, අතිකාල දීමනා හා උත්සව අත්තිකාරම් ගෙවීම පැහැරහැරීම සදහා වර්තමාන අර්බුදය හේතුවක් නොවිය යුතු අතර මෙම ගෙවීම් වහාම ගෙවීමට සේව්‍ය පාර්ශවය කටයුතු කරනා බවට වගබලා ගැනීම රජයේ වගකීමක් බවයි.

සේවකයන්ගේ මූලික අවශ්‍යතා, සෞඛ්‍ය හා ආරක්ෂාව සම්බන්ධයෙන් ඇති පැමිණිලි භාරගැනීමට හා ඒවාට කඩිනමින් විසඳුම් සැපයීම සදහ රාජ්‍ය අංශය, ආයෝජන මණ්ඩලය හා වෘත්තිය සමිති ඒකාබද්ධ යාන්ත්‍රණයක් ගොඩනගන ලෙසද වෘත්තීය සමිති සිවිවන කරුණු ලෙස අමාත්‍යවරයාගේ අවදානයට යොමු කර තිබේ.

වෘත්තීය සමිති විසින් පස් වන කරුණු ලෙස අවධාරණය කර ඇත්තේ වර්තමාන තත්වය තුළ සේවකයන්ගේ සේවය අඛණ්ඩව පවත්වාගෙන යාමට අපහසු විය හැකි බව සේව්‍ය පාර්ශවය මේ වන විටත් අවස්ථා ගණනාවක දී ප්‍රකාශ කර තිබෙන බවයි.

ඇගලුම් අපනයනකරුවන්ගේ සංගමය ප්‍රකාශ කර ඇති පරිදි ඉදිරි කාලසීමාව තුළ සමස්ත ඇගලුම් කර්මාන්ත සේවකයන්ගෙන් 30% කට ආසන්න ප්‍රමාණයක සේවය ඉදිරි කාලය තුළ අත්හිටුවීමට සිදුවෙනු ඇතැයි අපේක්ෂා කරන බැවින් කොවිඩ් 19 ව්‍යසනය හේතුවෙන් රටේ සමස්ත ජනසමාජයම දරුණු ආර්ථික සමාජීය අර්බුදයකට මුහුණ දෙමින් සිටිනා විට මේ ආකාරයෙන් අති විශාල පිරිසක් රැකියා විරහිතභාවය පත්වීම දරුණු සමාජ ව්‍යසයනයකට මග පාදනු ඇති වෘත්තිය සමිති වැඩි දුරටත් සදහන් කර තිබේ.

එමෙන්ම රටේ ආර්ථිකයේ විශාල බරක් මේ දක්වා දරාගෙන ආ ඇගලුම් සේවක සේවිකාවන් මේ මොහොතේ අතහැර නොදැමීමේ මානුෂීය වගකීමක් ද සේව්‍ය පාර්ශවයට හා රජයට තිබේන බව තවදුරටත් අවධාරණය කරන වෘත්තිය සමිති සේවක අයිතිවාසිකම් හා යහපැවැත්ම ආරක්ෂා කිරිම වෙනුවෙන් පහත සදහන් යෝජනා හය අමාත්‍යවරයා ‌වෙත ඉදිරිපත් කර තිබේ.

1. කර්මාන්තයේ වර්තමාන තත්වය හා අපනයන සමාගම්වල තත්වය පිළිබද අවංක හා විවෘත සාකච්ඡාවක් සේවක සේවිකාවන් හා වෘත්තිය සමිති සමග සිදු කිරිම.

2. ඉදිරි කාලසීමාවේ ගෝ ලීය වෙළෙදපොල හා දේශීය කර්මාන්ත තුළ සිදුවිය හැකි වෙනස්කම් මධ්‍යයේ ඉදිරි මාස කිහිපය සදහා සේවකයන්ගේ ගෙවීම් අඛණ්ඩව පවත්වාගෙන යාමේ ක්‍රියාවලියක් සේව්‍ය පාර්ශවය, ගැණුම්කරුවන් හා වෙළෙද නාම (brands) හා රජය එක්ව සකස් කළ යුතුය.

3. දැනට සිදුකර තිබෙන ඇණවුම් මිළදී ගැනීම සදහා ජාත්‍යන්තර ගැණුම්කරුවන්ට හා වෙළද නාමයන්ට බලපෑම් කිරිමට අපනයන සමාගම් හා රජය ක්‍රියා කිරිම.

4. පවතින තත්වය භාවිතා කරමින් සේවකයන් සේවයෙන් පහකිරිම සදහා වන නීති ඇතුලු කම්කරු අයිතිවාසිකම් තහවුරු කෙරෙන නීති කිසිවක් සංශෝධනය කිරිමට කටයුතු නොකළ යුතුය.

5. අපනයන හා දේශීය වෙළෙදපොල තුළ නව අවස්ථාවන් සොයා ගැනීමට වහාම මැදිහත් වීම.

6. සේවක වැටුප් අඩු කිරිමේ අවශ්‍යතාවයක් තිබේනම් එම අඩුකිරිම් මේ වන විටත් පහල වැටුප් ලබන සාමාන්‍ය සේවක වැටුපෙන් නොව ඉතා විශාල වැටුප් හා දීමනාවන් ලබන විධායක ශ්‍රේණීයේ නිළධාරින්ගේ වැටුප් හා අනෙකුත් පහසුකම්වලින් කපා හැරිම.

අඩු වැටුප් හා අවම පහසුකම් යටතේ ශ්‍රී ලංකා ආර්ථිකයේ වැඩි බරක් දැරූ ඇඟළුම් කර්මාන්තයේ සේවක සේවිකාවන් මේ මොහොතේ රැකගැනීම කර්මාන්තයේ ද, රජයේ ද වගකීමක් බව වැඩි දුරටත් අවධාරණය කරන වෘත්තිය සමිති සිය ලිපිය මගින් තව දුරටත් සදහන් කර ඇත්තේ මේ අසීරු අවස්ථාවේ සියලු බර සේවකයන් මත පටවමින් තම වගකීමෙන් මිදීමට රජය ද, සේව්‍ය පාර්ශවය ද කටයුතු නොකරනු ඇතැයි බලාපොරොත්තු වන බවයි.

ලංකා වෙළ‍ෙඳ කාර්මික හා පොදු සේවක සංගමය (CMU),නිමි භාණ්ඩ ඇගලුමි හා රෙදිපිළි සේවක සංගමය, ඩාබිඳු සාමුහිකය, ස්ටෑන්ඩ් අප් මූව්මන්ට් ලංකා, මානව විමුක්තිය උදෙසා සංවර්ධනය, ශ්‍රමාභිමානි කේන්ද්‍රය හා විමුක්ති ව්‍යාපාරය මෙම ලිපිය යොමු කිරීමේ මුලිකත්වය ගෙන ඇත.