ජාත්‍යන්තර මාධ්‍ය නිදහස පිළිබඳ දර්ශකයේ ශ්‍රී ලංකාව පහලට වැටේ

දෙවැනි රාජපක්ෂ පාලනයේ මාස පහක කාලය ඇතුලත ශ්‍රී ලංකාවේ මාධ්‍ය නිදහස තවත් පහලට වැටී ඇති බව ජාත්‍යන්තර සමීක්ෂණයකින් හෙළිවී තිබේ.

දේශසීමා නොමැති මාධ්‍යවේදියෝ (RSF) විසින් ප්‍රකාශයට පත් කර ඇති 2020 මාධ්‍ය නිදහස පිළිබඳ ජගත් දර්ශකයේ රටවල් 180 ක් අතරින් ශ්‍රී ලංකාව හිමි කර ගෙන ඇත්තේ 127 වැනි ස්ථානයයි. වාර්ෂිකව සම්පාදනය කරන එම දර්ශකයේ ශ්‍රී ලංකාව 2019 දී 126 වැනි තැන හිමිකරගෙන සිටියේය.

පළමු රාජපක්ෂ පාලන දශකයේ ආරක්ෂක ලේකම් පදවිය පවත්වාගෙන ගිය ආකාරය නිසා වර්තමාන ජනාධිපති ගෝඨාභය රාජපක්ෂ “සංහාරකයා” නමින් ප්‍රකට බව RSF වාර්තාව පවසයි.

මාධ්‍ය නිදහස පිළිබඳ ජගත් දර්ශකයේ තුන්වැනි අවුරුද්දේත් ඉහලින්ම ඉන්නේ නෝර්වේ රාජ්‍යයයි. RSF සමීක්ෂණය අනුව මාධ්‍ය නිදහස අතින් නරකම රට ලෙස වැටී ඇත්තේ උතුරු කොරියාවයි.