මුදල් ඇමැතිගෙන් ගිනි පොලියට වැට බඳින පනතක්

ක්ෂුද්‍ර මූල්‍ය ණය ක්ෂේත්‍රයට අදාළ නව නීති රීති හඳුන්වා දෙමින් නව ක්ෂුද්‍ර මූල්‍ය පනත් කෙටුම්පතක් සකස් කරමින් තිබෙන බවට මුදල් අමාත්‍යවරයා ප්‍රකාශ කර තිබේ.

කෙටි කාලීන විසඳුමක් ලෙස අධික පොලියට කාන්තාවන් ලබා ගත් ණය මුදල් කපා හැරීම හා මෙම මූල්‍ය සමාගම්වල පොලිය 35%ක උපරිමයකට යටත් කොට ඇති බවයි මුදල් අමාත්‍ය මංගල සමරවීර පෙන්වා දෙන්නේ.

නියගයෙන් පීඩාවට පත් දිස්ත්‍රික්කවල කාන්තාවන් 45000ක් විසින් ලබාගෙන තිබූ ක්ෂුද්‍ර මූල්‍ය ණය සහ ඊට අදාළ පොලී මුදල් කපා හැරීමට අදාළ සහතික පත්‍ර ප්‍රදාන ජාතික උත්සවය 14 බ්‍රහස්පතින්දා යාපනය වීරසිංහම් ශාලාවේදී පැවැත්වුණු අතර අගමැති රනිල් වික්‍රමසිංහගේ ප්‍රධානත්වයෙන් සහ මුදල් අමාත්‍ය මංගල සමරවීරගේ සහභාගීත්වයෙන් පැවැති මෙම උත්සවයේ දී යාපනය සහ කිලිනොච්චි දිස්ත්‍රික්කවල කාන්තාවන් 300කට අධික පිරිසකගේ ක්ෂුද්‍ර මූල්‍ය ණය කපා හැරීම සිදු කර ඇත.

ක්ෂුද්‍ර මූල්‍ය ආයතනවල 200% තරම් ඉහළ පොලී අනුපාත යටතේ ණය ලබා ගැනීම වෙනුවට සම්පූර්ණයෙන්ම හෝ කොටසක් රජය මගින් පොලී ගෙවනු ලබන එන්ටප්‍රයිස් ශ්‍රී ලංකා ණය යෝජනා ක්‍රමය හා එක්වන ලෙසත් උතුරේ ජනතාවට එය අතිශය වැදගත් වනු ඇති බවද අමාත්‍ය මංගල සමරවීර පෙන්වා දුන්නේය.

ක්ෂුද්‍ර මූල්‍ය ණය යනු දුප්පත්කම පිටුදැකීම සඳහා ඵලදායි ක්‍රමවේදයක් බව කී ඇමැතිවරයා එය නියාමනයකට ලක් විය යුතු බව මෙන්ම ඒ සඳහා නියාමනයන් සහ නීති හඳුන්වාදීමෙන් පසු යළිත් මෙම ණය චක්‍රය දක්නට නොලැබෙනු ඇති බවට විශ්වාසය පළ කළේය.

එන්ටප්‍රයිස් ශ්‍රී ලංකා විසඳුමක්

එන්ටප්‍රයිස් ශ්‍රී ලංකා රජයේ සහන පොලී ණය යෝජන ක්‍රමය ද මීට සාර්ථක පිළිතුරක් බව පෙන්වා දුන් අමාත්‍යවරයා කුඩා කර්මාන්තකරුවන්ට, ගොවීන්ට, විශ්ව විද්‍යාල සිසුන් ඇතුළු සියලුම පාර්ශ්ව නියෝජනය වන පරිදි මෙම ණය ලබා දෙනු ලබන බවද කියා සිටියේය.

“ණය ක්‍රම 20කට අධික සංඛ්‍යාවක් හඳුන්වා දී ඇත්තේ ඔබ වැනි ජනතාව වෙනුවෙන්මය. රුපියල් ලක්ෂ 3 සිට මිලියන 750 දක්වා විශාල පරාසයක මේ ණය ලබා දෙනු ලබයි. 0% සිට 7% පමණ දක්වා වන පරාසයන් යටතේ මේ ණය වෙනුවෙන් ඔබගෙන් පොලිය අය කරනු ලබයි. නමුත් ඔබ නොගෙවන පොලියේ ඉතිරි කොටස ඔබ වෙනුවෙන් රජය අදාළ බැංකුව වෙත ගෙවනු ලැබිය යුතු ය. කාන්තා ඔබ වෙනුවෙන් තවත් 10%ක අතිරේක පොලී සහනාධාර ලබා දීමට ද අප සූදානම්.” යි මංගල සමරවීර අමාත්‍යවරයා පැවසීය.

ගම්පෙරළිය කඩිනම් ග්‍රාමීය සංවර්ධන වැඩසටහන පිළිබඳව ද සිහිපත් කල අමාත්‍යවරයා ඒ හරහා එක් මැතිවරණ කොට්ඨාසයක සංවර්ධනය වෙනුවෙන් රුපියල් මිලියන 300ක් වෙන්කර කර ඇති බව ද සඳහන් කළේය.

යුධ සමයේ කැඩි බිඳී ගිය ආගමික ස්ථාන, පාසල් වැසිකිලි පද්ධති, ක්‍රිඩාපිටි ඇතුළු සියල්ල සංවර්ධනය කර ගැනීම සඳහා එමගින් මුදල් වෙන් කරනු ලබන බවයි අමාත්‍යවරයා පවසන්නේ.

මෙම අවස්ථාවට රාජිත සේනාරත්න, අර්ජුන රණතුංග, අකිල විරාජ් කාරියවසම්, රිසාද් බද්යුදීන්, විජයකලා මහේෂ්වරන්, එම්.ඒ. සුමන්දිරන්, මාවෙයි සේනාධිරාජා යන මැති ඇමැතිවරු සහ භාණ්ඩාගාර ජ්‍යෙෂ්ඨ නියෝජ්‍ය ලේකම් ඒ. ආර්. දේශප්‍රිය, නියෝජ්‍ය ලේකම් ඒ.එම් පී.එම්. බී. අතපත්තු යන පිරිසද එක්ව සිටියහ.