භාරත ලක්ෂමන් ප්‍රේමචන්ද්‍ර ඝාතනයට මරණ දඩුවම් ලැබූ නිවාස සංවර්ධන අධිකාරියේ සභාපති දුමින්ද සිල්වාට සමාව දුන් ජනාධිපති ගෝඨාභය රාජපක්ෂගේ නියෝගය ක්‍රියාත්මක කිරීම වළක්වාලමින් ශ්‍රේෂ්ඨාධිකරණය අතුරු තහනම් නියෝගයක් නිකුත් කර තිබේ.
එම තීන්දුවට අනුව හිටපු පාර්ලිමේන්තු මන්ත්‍රීවරයා වහාම අත්අඩංගුවට ගෙන සිර භාරයට පත් කරන ලෙසට නියම කරමින් අපරාධ පරීක්ෂණ දෙපාර්තමේන්තුවට ශ්‍රේෂ්ඨාධිකරණය 31 අඟහරුවාදා නියෝගයක් කර ඇත.
එමෙන්ම ඔහුට විදෙස් ගමන් තහනමක් පනවමින් ඔහුගේ ගුවන් ගමන් බලපත්‍රය අධිකරණයේ භාරයට ලබා දෙන ලෙසටද අතුරු නියෝගයක් නිකුත් කළේය.
ඝාතනයට ලක්වූ භාරත ලක්ෂමන්ගේ දියණිය හිටපු පාර්ලිමේන්තු මන්ත්‍රිනී හිරුනිකා ප්‍රේමචන්ද්‍ර සහ ඇගේ මෑණීයන් වන සුමනා ප්‍රේමචන්ද්‍ර දුමින්ද සිල්වා ජනාධිපති සමාව යටතේ නිදහස් කිරීමට ජනාධිපතිවරයා ගත් පියවර ආණ්ඩු ක්‍රම ව්‍යවස්ථා විරෝධී බවට ප්‍රකාශ කරන ලෙසත්, එලෙස සමාව දීමට අදාළ ලේඛන අධිකරණයට කැඳවා පුර්ණ පරීක්ෂණයක් කරන ලෙසත් ප්‍රකාශයට පත් කර ලෙස ඉල්ලා පසුගිය වසරේ මුලික අයිතිවාසිකම් පෙත්සමක් ගොනු කර තිබුනි.
යසන්ත කෝදාගොඩ, ප්‍රීති පද්මන් සූරසේන, අචල වෙන්ගප්පුලි යන ශ්‍රේෂ්ඨාධිකරණ විනිසුරු මඩුල්ල අද පෙත්සම කැඳවු අවස්ථාවේදී අදාළ නියෝග නිකුත් කර තිබේ.
හිටපු ජනාධිපති මහින්ද රාජපක්ෂගේ වෘත්තීය සමිති උපදේශක වූ භාරත ලක්ෂමන් ප්‍රේමචන්ද්‍ර ඇතුළු සිව් දෙනකුට 2011 ඔක්තෝම්බර් 08 වැනිදා කොලොන්නාවේදී වෙඩි තබා මරා දැමීමට වරදකරු කළ කොළඹ මහාධිකරණයේ විශේෂ ත්‍රිපුද්ගල විනිසුරු මඩුල්ල වගඋත්තරකාර දුමින්ද සිල්වාට මරණ දඩුවම නියම කළ බවත්, පසුව එම දඩුවම ශ්‍රේෂ්ඨාධිකරණයේ පංච පුද්ගල විනිසුරු මඩුල්ලක් ඒකමතිකව තහවුරු කළ බවත්, පෙත්සම්කාරිය ශ්‍රේෂ්ඨාධිකරණය වෙත සිය පෙත්සමෙන් දන්වා තිබේ.
රටේ ඉහළම අධිකරණයෙන් දුමින්ද සිල්වාගේ මරණ දඩුවම තහවුරු කර තිබියදී, ඔහුට ජනාධිපති සමාව දීමට ජනාධිපති ගෝඨාභය රාජපක්ෂ කටයුතු කර ඇත්තේ ආණ්ඩුක්‍රම ව්‍යවස්ථාවෙන් පනවා ඇති ප්‍රතිපාදන අනුගමනය කිරීමෙන් තොරව බව ද හිරුනිකා ප්‍රේමචන්ද්‍ර සිය පෙත්සම මගින් දන්වා සිටියාය.
මෙම පෙත්සමේ වැඩිදුර විභාගය සැප්තාම්බර් මස 01 දක්වා කල් තබා තිබේ.
Facebook Comments
