පහලොස් වසරකට වැඩි කාලයක් තිස්සේ යුද හමුදාව විසින් බලහත්කාරයෙන් අත්පත්කරගෙන සිටින වන්නියේ මහවිරු සුසාන භුමියක් නිදහස් කරන ලෙස ප්‍රදේශවාසී ජනයා ඉල්ලා සිටි.
නොවැම්බර් 27 වැනිදාට යෙදී තිබෙන දෙමළ මහවිරු දිනය ඉලක්ක කරගනිමින් මුලතිව් දිස්ත්‍රික්කයේ පිහිටි අලම්පිල් මහවිරු සුසාන භූමිය සුද්ද පවිත්‍ර කිරීමට නොවැම්බර් 15 වැනි බදාදා එක්වු ප්‍රදේශවාසියකු සදහන් කළේ මහවිරු සුසාන භුමි නිදහස් නොකිරීමෙන් ඔවුන්ගේ හිත් රිදීමකට ලක්ව ඇති බවයි.
“අපේ මහ විරුවන් සැතපෙන බිම් නිදහස් කරලා නෑ. ඔවුන් සැතපෙන බිම් නිදහස් කරන්න කියලා රජයේ නිලධාරීන්, දේශපාලනඥයන් සහ ආණ්ඩුව ඇතුළු සියලු දෙනාගෙන්ම ඉල්ලා සිටිනවා. නැවත පදිංචි කරපු කාලයේ ඉදලා පාර අයිනේ මේ ස්ථානයේ තමයි අනුස්මරණය කරන්නේ. ප්‍රධාන වශයෙන් හැමෝම අපිට සහාය දෙනවා. නමුත් අපේ මහ විරුවන් සැතපෙන බිම්
නිදහස් නොකිරීම හිත් රිදීමක්. ”
උතුරු පළාත් සභාවේ හිටපු මන්ත්‍රී තුරෙයිරාසා රවිහරන් පවසන පරිදි අලම්පිල් මහවිරු සුසාන භූමියේ එල්.ටී.ටී.ඊ සාමාජිකයන් 800 කගේ පමණ සිරුරු මිහිදන් කර තිබේ.
ප්‍රදේශවාසින් චෝදනා කරන්නේ ශ්‍රී ලංකා යුද හමුදාවේ 23 වැනි සිංහ රෙජිමේන්තුව විසින්, ඔවුන්ගේ කඳවුරට ආසන්නව පිහිටා ඇති අලම්පිල් මහවිරු සුසාන භූමිය අත්පත්කරගෙන සිටින බවයි.
ප්‍රධාන විපක්ෂයේ දේශපාලකයකු වන අවසන් යුද සමයේ හමුදාපති ෆීල්ඩ් මාර්ෂල් සරත් ෆොන්සේකා සිංහ රෙජිමේන්තු සෙන්පතියෙකි.
එල්.ටී.ටී.ඊ. පාලනය යටතේ පැවති දෙමළ ජනතාවගේ භූමි ප්‍රදේශ හමුදාව විසින් අත්පත් කර ගැනීමත් සමඟ, උතුරු සහ නැඟෙනහිර ප්‍රදේශවල මියගිය දෙමළ සටන්කාමීන්ගේ සොහොන් 20,400 ක් පමණ තිබූ සුසාන භූමි 25 කට ආසන්න ප්‍රමාණයක් ඩෝසර් කර සමරු පලක කඩා බිඳ දැමු බවට උතුරේ දෙමළ ජනයා යුද හමුදාවට චෝදනා එල්ල කර තිබේ.
මළවුන්ට ගෞරව දැක්වීම හින්දු සංස්කෘතියේ ද කොටසක් වන අතර, මළවුන්ට ගෞරව දැක්වීම එක්සත් ජාතීන්ගේ සංවිධානය විසින් මූලික අයිතිවාසිකමක් ලෙස ප්‍රකාශයට පත් කර ඇත.
Facebook Comments
