ජනපතිගේ වන්දිය උතුරු නැගෙනහිර මාතාවෝ ප්‍රතික්ෂේප කරති

බලහත්කාරයෙන් අතුරුදහන් කළ පුද්ගලයන්ගේ පවුල් වලට වන්දි ලබා දීම සදහා ජනාධිපතිවරයා විසර්ජන පනත් කෙටුම්පතින් වෙන් කළ කෝටි ගණනක මුදල් ලබා ගැනීම බලහත්කාරයෙන් අතුරුදහන් කළ අයගේ ඥාතීන්ගේ සංගමයේ නායිකාවක් වන දෙමළ මාතාවක් විසින් ප්‍රතික්ෂේප කර තිබේ.

2024 මූල්‍ය වර්ෂය සඳහා වන විසර්ජන පනත් කෙටුම්පත (අය වැය වාර්තාව) නොවැම්බර් 13 වැනි සඳුදා ජනාධිපති රනිල් වික්‍රමසිංහ මුදල් අමාත්‍යවරයා ලෙස පාර්ලිමේන්තුවට ඉදිරිපත් කරමින් සදහන් කළේ උතුරු සහ නැගෙනහිර පළාත් වල අභ්‍යන්තර ගැටුමෙන් බලපෑම් එල්ල වු අතුරුදහන් වුවන් සහ විපතට පත් වුවන්ට වන්දි ගෙවීම ‘කඩිනම් කිරීම සඳහා’ රුපියල් මිලියන 1000 ක් වෙන් කරන බවයි.

“ඉදිරිපත් කර ඇති වන්දි ඉල්ලුම්වලින් සිදුවීම් 6300 ට වැඩි ප්‍රමාණයක මුලික කටයුතු මේ වන විට සම්පුර්ණ කර තිබෙන අතර විසර්ජන පනතින් දැනටමත් රුපියල් මිලියන 1500 ක් වෙන් කර තිබෙනවා. මෙම වන්දි ගෙවීම කඩිනම් කිරීම සදහා තවත් රුපියල් මිලියන 1000 ක් වෙන් කිරීමට මා යෝජනා කරනවා.”

ජනාධිපතිවරයාගේ එම ප්‍රකාශයට නොවැම්බර් 14 වැනි අගහරුවාදා මුලතිව් මාධ්‍ය සමාජයේ ප්‍රතිචාර දක්වමින් මුලතිව් දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී මාතාව සදහන් කළේ එම මුදල් ලබා නොගන්නා බවයි.

” ඊයේ පාර්ලිමේන්තුවේදී අපිට ඉදිරි වසර සඳහා අයවැයෙන් මුදල් වෙන් කරලා තියනවාලු, අතුරුදහන් වෙලා තියන ඥාතීන්ට වන්දි ගෙවන්න. ඒකෙන් අපිට එක දෙයක් පැහැදිලි වෙලා තියනවා. අතුරුදන් වූ ඥාතීන්ව අත්අඩංගුවට අරගෙන තියාගෙන ඉන්නවා කියලා විතරක් තහවුරු කරලා තියනවා. අතුරුදන්වූවන්ව තියාගෙන ඉන්න නිසා තමයි මුදල් වෙන් කරලා තියෙන්නේ. ඒ උනත් මේ මුදල් වෙන් කිරීම අපිට අවශ්‍ය නැ. අපි මේ මුදල් වෙන් කිරීම නොසලකා හරිනවා.”

මරියසුරේෂ් ඊශ්වරී මාතාව වැඩි දුරටත් සදහන් කළේ ජනාධිපතිවරයාට ජාත්‍යන්තර ප්‍රජාව රැවටීමට හැකි නමුත් බලහත්කාරයෙන් අතුරුදහන් කළ අයගේ පවුල් වල ඥාාතීන් රැවටිය නොහැකි බවයි.

” යුද්ධය ඉවර වෙලා අවුරුදු 15 ක්. ඒ වගේම අනිත් දිස්ත්‍රික්ක වල අවුරුදු ගාණක් ගිහිල්ලත් මුදල් වෙන් කරන්න එයාලට අමතක උනාද ? එහෙම තැත්තං අතුරුදන් වුවන් සිටින බව එයාලට අමතක උනාද ? නමුත් අද ජාත්‍යන්තර බලපෑම් මධ්‍යයේ ඔවුන්ට මතක් වෙලා මේ මුදල් වෙන් කරලා තියනවා. මේක ඔවුන්ගේ වියදමට සහ ඔවුන්ගේ වටා ඉන්න අයගේ වියදමට කියලා අපි හිතනවා. මේ රටේ ජනාධිපතිවරයාට ජාත්‍යන්තර ප්‍රජාව රවට්ටන්න පුළුවන්. නමුත් අතුරුදහන්කරවු අයගේ ඥාාතීන්ව රවට්ටන්න බැ.”

ශ්‍රී ලංකා පාර්ලිමේන්තුවේ 78 වැනි අය වැය වාර්තාව ඉදිරිපත් කරමින් 8 වැනි ජනාධිපති රනිල් වික්‍රමසිංහ මුදල් අමාත්‍යවරයා ලෙස පාර්ලිමේන්තුවේදී හෙළි කර තිබුනේ අතුරුදහන් වු සහ විපතට පත් වු පවුල් 181 ක් මේ වන විට වන්දි මුදල් ලබා ගෙන ඇති බවයි.

“උතුරු සහ නැගෙනහිර පළාත් වල අභ්‍යන්තර ගැටුමෙන් බලපෑම් එල්ල වු අතුරුදහන් වුවන් සහ විපතට පත් වුවන් 181 දෙනෙකු සදහා මේ වන විට වන්දි ලබා දී ඇති අතර, තවත් 170 දෙනෙකුට 2023 වසර අවසන් වන විට වන්දි ලබා දීමට නියමිතයි.”

එහෙත් ඔහු මේ වසරේ අගෝස්තු මාසයේ දී පාර්ලිමේතුවේදී සදහන් කර තිබුනේ උතුරු නැගෙනහිර පැවති යුද ගැටුමෙන් අතුරුදන් වූ පුද්ගලයන් 203 දෙනකු සඳහා 2023 ජූලි වන විට රුපියල් මිලියන 40.6 ගෙවා ඇති බවයි.

යුද්ධයේ අවසාන දින වලදී ආරක්ෂක අංශ භාරයට පත් වීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ ආදරණීයයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ විය.

යුද්ධාවසානයේ රජයේ හමුදාවට භාරවීමෙන්ද, පැහැරගනු ලැබීමෙන්ද අනතුරුව අතුරුදහන් කරන ලද සමීපතමයන්ගේ ඉරණම හෙළි කරගැනීම සඳහා දෙමළ ජනතාව ඉකුත් පහළොස් වසරකට ආසන්න කාලයක් තිස්සේ ඉල්ලා සිටින්නේ ජාත්‍යන්තර මැදිහත්වීමකි.

රාජ්‍ය ආරක්ෂක අංශ ප්‍රධාන සැකකරුවන්ව සිටින බැවින්, යුද අපරාධ චෝදනා පිලිබඳ පරීක්ෂණ ක්‍රියාත්මක කිරීමට ශ්‍රී ලංකා රජයට දේශපාලනික උවමනාවක් නොමැති බව මානව හිමිකම් ක්‍රියාකාරීන් දිගින් දිගටම පෙන්වා දී තිබේ.

බලහත්කාරයෙන් අතුරුදහන්කරවුවන් වෙනුවෙන් යුක්තිය ලබා දෙන බව පවසමින් ආණ්ඩුව යෝජනා කර තිබෙන අතුරුදන්වූවන් සඳහා නිකුත් කරන සහතිකය ලබා ගැනීමත්, වන්දි මුදල් ලබා ගැනීමත් තම සමීපතමයන් අහිමිව සිටින යුද වින්දිත දෙමළ මව්වරුන් ප්‍රසිද්ධියේම ප්‍රතික්ෂේප කර තිබේ.

ආණ්ඩුක්‍රම ව්‍යවස්ථාවේ 13 වැනි සංශෝධනය සහ බලය බෙදීම පිළිබඳ සිය යෝජනා සහ ඉදිරි ක්‍රියාමාර්ග සම්බන්ධයෙන් අගෝස්තු 9 වැනිදා ජනාධිපති රනිල් වික්‍රමසිංහ පාර්ලිමේන්තුවවේ සිදු කළ විශේෂ ප්‍රකාශයේදී ඔහු සදහන් කර තිබුනේ උතුරු නැඟෙනහිර ජනතාවට යුක්තිය ඉටු කිරීමේ අවශ්‍යතාව තමන් යළිත් අවධාරණය කරන බවයි.

අතුරුදහන් වූවන් පිළිබඳ කාර්යාලය වෙත ලැබී ඇති පැමිණිලි 21,374 න් 3,462 ක විමර්ශන මේ වන විට අවසන් කර ඇති අතර ඉතිරි පැමිණිලි සඳහා විමර්ශන ප්‍රගතියක් ලබන අතර, සත්‍ය සෙවීමේ යාන්ත්‍රණය සම්පූර්ණයෙන් ක්‍රියාත්මක වීමෙන් පසු මෙම ක්‍රියාවලිය වේගවත් විය හැකි බවටත් ඔහු විශ්වාසය පළ කර තිබුනි.

යුද සමයේත්, ඉන් පසුවත් අතුරුදහන් තම ඥාතීන් සොයමින් දින දෙදහස් පන්සියකට ආසන්න කාලයක් උතුරු නැගෙනහිර අරගලයේ යෙදී සිටින මුල් පෙලේ සාමාජිකයන් පවසන පරිදි මේ වන විටත් යුක්තිය නොලබාම මියගොස් ඇති මව්පියන් ගණන188 ට වැඩිය.