අයහපත් සෞඛ්‍ය තත්වය හේතුවෙන් මාස දෙකක පමණ කාලයක් පාසල් නොපැමිණි පහ වසරේ දරුවකුට ශිෂ්‍යත්ව විභාගයට පෙනී සිටීමේ අවස්ථාව අහිමිකළ බවට වන්නියේ පාසලක විදුහල්පතිවරයකුට චෝදනා එල්ල වී තිබේ.
ශ්‍රී ලංකා මානව හිමිකම් කොමිෂන් සභාවේ වව්නියාව කාර්යාලයට නොවැම්බර් 8 වැනිදා දරුවාගේ මව පැමිණිලි කර ඇත්තේ සැත්කමකට මුහුණ දීම නිසා පාසල් නොගිය සිය පුතුට ශිෂ්‍යත්ව විභාගය අහිමි කළ ගුරුවරුන් ශිෂ්‍යත්ව විභාගය වැදගත් නොමැති විභාගයක් ලෙසද පැවසු බවයි.
පළාත් බද වාර්තාකරුවන්ට අනුව මෙලෙස විභාගයට මුහුණ දීමේ අවස්ථාව අහිමිව ඇත්තේ මුලතිව් අධ්‍යාපන කලාපයේ පුදුකුඩිඉරිප්පු, කෝම්බාවිල් විග්නේෂ්වර විද්‍යාලයේ පහ වසරේ අධ්‍යාපනය ලැබු පිරිමි දරුවකුටය.
දරුවාගේ මව පවසන්නේ සිය පුතුගේ උදරයේ සිදු කළ සැත්කමක් නිසා මාස දෙකක පමණ කාලයක් දරුවාට පාසල් යෑමට නොහැකි වු අතර ඔක්තෝබර් 15 වැනිදා ශිෂ්‍යත්ව විභාගය පැවැත්වෙන බැවින් එම මාසයේ මුල් සතියේ සිට දරුවා යළි පාසලට ගිය බවයි.
එහෙත් විභාගයට පෙනී සිටීම සදහා අවශ්‍ය ප්‍රවේශ පත්‍රය දරුවාට නොලැබිම සම්බන්ධයෙන් විමසීමට පාසලට ගිය මවට පාසලෙන් දැනුම් දී ඇත්තේ මෙම දරුවාට විභාගයට මුහුණ දිමේ අවස්ථාව ලබා දිය නොහැකි බවයි.
එම අවස්ථාවේදී තමන් පාසලේදී මුහුණ දුන් අත්දැකීම පළාත් බද මාධ්‍යවේදීන්ට විස්තර කරමින් මහේන්ද්‍රන් ජනනි මාතාව සදහන් කළේ සිය දරුවාට විභාගයට පෙනී සිටීමට නොහැකි බව සදහන් කරමින් පාසලෙන් තමන්ගෙන්ද ලිපියක් ලියා ගත් බවයි.
“අපි ගිහින් ඇහුවම විදුහල්පතිතුමා කිව්වා එයාට ලියන්න බෑ, ලකුණු 70 ට අඩු නිසා ලියන්න බෑ කියලා කිව්වා. ඊට පස්සේ අපි ඒක එහෙම්මම අත ඇරලා දැම්මා. එයාලා කතා කරයි කියන විශ්වාසයෙන් අපි බලාගෙන සිටියා. නමුත් එයාලා කතා කරේ නැ. ඇඳුම් ටික මහලා අපි ලැස්ති වෙලා හිටියා. සතියකට පස්සේ ඉස්කෝලේ ගියාම ශිවනාදන් සර් එයාට ගහලා කිව්වා විභාගේ ලියන්න දෙන්නේ නෑ කියලා. එතකොට විදුහල්පතිතුමයි, ගුරුතුමියයි බලාගෙන හිටියා. කිසිවක් කීවේ නෑ. ඊට වඩා මගෙන් ලියුමක් ලියලා ගත්තා මෙයාට විභාගය ලියන්න බෑ කියලා. එයා ඉස්කෝලේ එන්නේ කලාතුරකින් කියලයි, එයාලා කිව්වේ. මෙයා ලියලත් වැඩකුත් නැ. ශිෂ්‍යත්ව විභාගයත් වැදගත් නැලු.”
පළාත් බද වාර්තාකරුවන් සැක පළ කරන්නේ මෙම දරුවා විභාගයට මුහුණ දී යම් හෙයකින් අසමත් වූවහොත් එය පාසලට අගෞරවයක් සේ සලකා පාසලේ විදුහල්පතිවරයා මේ ආකාරයෙන් ක්‍රියා කරන්නට ඇති බවයි.
Facebook Comments
