සමාජ ක්‍රියාධර මුස්ලිම් ලේඛකයාට මිලියනයක් වන්දි ගෙවීමට ආණ්ඩුවට නියම වේ

ජාතීන් අතර සමගිය වර්ධනය කිරීම සඳහා යයි සම්මත කොටගත් පනතක් අනිසි ලෙස යොදා ගනිමින් පස් මසක් සිරකර සිටි මුස්ලිම් ලේඛකයකුගේ මූලික අයිතිවාසිකම් කඩවී ඇති බව තීන්දු කළ ශ්‍රේෂ්ඨාධිකරණ ඔහුට වන්දි හා නඩු ගාස්තු ගෙවන ලෙස රජයට නියෝග කර තිබේ.

නොවැම්බර් 14 වැනිදා ශ්‍රේෂ්ඨාධිකරණ නියෝග කර ඇත්තේ අපරාධ පරීක්ෂණ දෙපාර්තමේන්තුවේ ප්‍රධාන පොලිස් පරීක්ෂක බී.එම් ඒ.එස්.කේ සේනාරත්නට සහ සීඅයිඩී හිටපු අධ්‍යක්ෂ ඩබ්ලිව් තිලකරත්නට ඔවුන්ගේ පුද්ගලික මුදලින් නිදහස් මතධාරි ලේඛකයෙක් මෙන්ම විශ්‍රාමික රජයේ නිලධාරියකු ද වන රම්සි රසීට වන්දි ගෙවන ලෙසයි.

එමෙන්ම රජයේ සේවකයන් කරන වැරදි සම්බන්ධයෙන් රජයද වගකිව යුතු බැවින් රම්සි රසීක්ට රුපියල් මිලියනයක වන්දියක් ගෙවන ලෙස අධිකරණය විසින් රජයටත් නියෝග කර තිබේ.

“නීතිය කඩවීම වැලැක්වීම සඳහා අවශ්‍ය සකල පියවර රාජ්‍යය විසින් ගන්නා ලද බව තහවුරු කර නැතිනම්, තමන්ගේ නිලය යොදා ගනිමින් රාජ්‍ය සේවකයන් ගන්නා සියලු පියවරට රාජ්‍යය වගකිව යුතු,” යයි යසන්ත කෝදාගොඩ, කුමුදුනී වික්‍රමසිංහ, ජනක් ද සිල්වා යන විනිසුරු මඩුල්ල විසින් අද දින දින ප්‍රකාශයට පත් කර ඇති නඩු තීන්දුවේ දැක්වේ.

රම්සි රසීක් සමාජ මාධ්‍යයේ පළ කළ සටහනක් හේතු කොටගෙන ICCPR පනතේ 3(1) වගන්තිය, දණ්ඩ නීති සංග්‍රහයේ 120 වගන්තිය හා පරිගණක අපරාධ පනත යටතේ චෝදනා ගොනු කරමින් අත් අඩංගුවට ගැනීමට එරෙහිව පවරා ඇති SCFR 135/20 මූලික අයිතිවාසිකම් පෙත්සම් විභාගයේදී නීතිඥ චතුර වෙත්තසිංහ සහ නීතිඥ නුවන් බෝපගේ රම්සි රසික් වෙනුවෙන් අධිකරණය හමුවේ පෙනී සිට තිබේ.

2020 අප්‍රේල් 9 දා රහස් පොලීසිය විසින් රම්සි රසීක් අත් අඩංගුවට ගෙන තිබුනේ ශ්‍රී ලංකාවේ මුස්ලිම් ප්‍රජාව පීඩාවට පත් කරන සකලාකාරයේ ජාතිවාදය පිටු දැකීමට පෑනෙන් සහ යතුරු පුවරුවෙන් “මතවාදී ජිහාඩයක් (අරගලයක්)” කළ යුතු බවට ඔහු විසින් අප්‍රේල් මුලදී පල කරන ලද ෆේස්බුක් සටහනක් පදනම් කොටගෙනය.

එම සටහනින් දෙදිනකට පසු ඔහු නැවත පල කළ සටහනකින් කියැවුනේ ගිනිය නොහැකි තරමේ මරණ තර්ජන ලැබුණු අතර කලින් ලියවුනු ප්‍රකාශය වැරදි ලෙස අර්ථ නිරූපනය කළ බොහෝ දෙනා ජාතිවාදී අදහස් වපුරන බවට චෝදනා නගමින් ඔහු බන්ධනාගාර ගත කරන ලෙස උද්ඝෝෂණය කළ බවයි.

කෙසේවෙතත්, පොලිසිය විසින් ඔහු අත් අඩංගුවට ගෙන රඳවා තබා ගැනීමට හේතුවක් ලෙස ලේඛකයා ‘ජිහාඩ් යුද්ධයක් ප්‍රකාශයට පත් කළ’ බව මහේස්ත්‍රාත් අධිකරණයට කරුණු දැක්වීම ශ්‍රේෂ්ඨාධිකරණයේ අවධානයට යොමුවී තිබුණි.

සමාජ මාධ්‍ය තුළ මෙන්ම පුවත්පත් හා ජනමාධ්‍ය තුළත් සිංහල, දමිළ හා ඉංග්‍රීසි තෙබසින්ම සිය අදහස් දක්වමින් සමාජ ක්‍රියාකාරිකයකු ලෙස කටයුතු කළ රම්සි රසික් සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පනත (ICCPR) යොදා ගනිමින් දින 161 ක් සිරගත කොට තැබීමෙන් පසු 2020 සැප්තැම්බර් 17 බ්‍රහස්පතින්දා ඔහුට ලබා දුන් කොළඹ මහාධිකරණයේ නිරීක්ෂණය වී තිබුනේ රටක නීති සකස් කර තිබෙන්නේ පුද්ගලයන්ගේ නිදහස් අදහස් ප්‍රකාශ කිරීමේ අයිතිය ආරක්ෂා කිරීම සදහා බවයි.

ෆේස්බුක් සටහනක් පාදක කොට ගෙන 2020 අප්‍රේල් 9 දා කටුගස්තොට, පොල්ගස්දෙනියේ සිය නිවසේදී අත් අඩංගුවට ගන්නා ලද රම්සි රසීක්ට ඇප ලබාදීම නිර්දේශ කළ මහාධිකරණ විනිසුරු ආදිත්‍ය පටබැදිගේ පුද්ගල නිදහස ඇහිරෙන ලෙස නීතියේ ප්‍රතිපාදන යොදා ගැනීම සම්බන්ධයෙන් නීතිපති දෙපාර්තමේන්තුව වෙනුවෙන් පෙනී සිටි නීතිඥවරයාගේ ද අවධානය යොමු කර තිබුනි.

දෙස් විදෙස් විරෝධය

සිවිල් හා දේශපාලන අයිතිවාසිකම් පිළිබඳ ජාත්‍යන්තර සම්මුතිය පනත (ICCPR) යොදා ගනිමින් රම්සි රසීක් සිරගත කර සිටි පස් මසකට වැඩි කාල සීමාව තුලදි ඔහුගේ නිදහස වෙනුවෙන් දෙස් විදෙස් මානව හිමිකම් සංවිධාන කිහිපයක් ම හඩ නැගුවේය.

නෛතික පැහැදිලි කමක් නොමැතිව, වෙනස්කම් පාමින් ICCPR පනත යොදාගැනීම සම්බන්ධයෙන් ශ්‍රී ලංකා පොලිසියට ලියන ලිපියක් මගින් 2020 සැප්තැම්බරයේ මානව හිමිකම් කොමිසම විසින් ද පෙන්වා දී තිබුනි.

එක්සත් ජාතීන්ගේ සංවිධානය ඇතුළු ජාත්‍යන්තර මානව හිමිකම් සංවිධානද ශ්‍රී ලංකාව විසින් ICCPR පනත අනිසි ලෙස යොදාගැනීම ගැන මීට ඉහත කිහිප වාරයක් අනතුරු අඟවා තිබේ.