දෙමළ මාධ්‍යවේදීන්ට එරෙහි හිංසා නවත්වන්න: ජාත්‍යන්තර සංවිධානයක් කියයි

ශ්‍රී ලංකාව තුළ රාජකාරියේ යෙදෙන මාධ්‍යවේදීන්ට පළිගැනීමේ බියෙන් සහ රාජ්‍ය මර්දනයෙන් තොරව කටයුතු කිරීමට ඉඩදිය යුතු බව ජාත්‍යන්තර සංවිධානයක් ශ්‍රී ලංකා රජයට දැඩි ලෙස කියා සිටී.

නිව්යෝර්ක් නගරය මුලස්ථාන කොට ගත් මාධ්‍යවේදීන් සුරැකීම සඳහා වන කමිටුව (CPJ) කමිටුව ශ්‍රී ලංකා රජයට අවධාරණය කරන්නේ වාර්තාකරණය හේතුවෙන් පරීක්ෂණ වලට ලක්වී සිටින දෙමළ මාධ්‍යවේදීන් දෙදෙනාට එරෙහි පරීක්ෂණ වහාම නවත්වන ලෙසයි.

“පුන්‍යමුර්ති සසිකරන් සහ වලසිංහම් ක්‍රිෂ්ණකුමාර් යන මාධ්‍යවේදීන් දෙදෙනාට එරෙහිව සිදුවන සියලුම ආකාරයේ පලිගැනීම් ශ්‍රී ලංකාවේ බලධාරීන් විසින් වහාම නැවැත්විය යුතු අතර, ඔවුන්ට නිදහසේ වාර්තාකරණයේ නියැලිය හැකි තත්වයක් තහවුරු කළ යුතුය. සිය ප්‍රජාවට බලපාන මානව හිමිකම් උල්ලංඝන වාර්තාකරණයේ නියැලී සිටින දෙමළ මාධ්‍යවේදීන් ඉලක්ක කොටගෙන සිදුවන දීර්ඝකාලීන හිංසා ශ්‍රී ලංකා රජය අවසන් කළ යුතුයැ,” යි CPJ සංවිධානයේ ආසියානු කලාපයේ වැඩසටහන් සම්බන්ධීකාරක බේ ලී යි පැවසුවාය.

නැගෙනහිර පළාතේ දෙමළ මාධ්‍යවේදීන් දෙදෙනා ශ්‍රී ලංකා පොලිසිය විසින් මඩකලපුවේ පිහිටි ඔවුන්ගේ නිවෙස්වලදී ප්‍රශ්න කරන ලද්දේ ඔක්තෝබර් 8 වැනිදා විරෝධතාවක් පිලිබඳ වාර්තා කිරීම හේතුවෙනි.

ශ්‍රි ලංකාවේ ප්‍රජාතන්ත්‍රවාදය සඳහා වූ ජනමාධ්‍යවේදියෝ [JDS] සංවිධානය උපුටා දක්වමින් CPJ කමිටුව තවදුරටත් සඳහන් කරන්නේ විරෝධතාවෙන් දින 20 කට පසුව පොලිස් නිලධාරියෙක් ප්‍රශ්න කිරීම සඳහා ඔවුන්ගේ නිවෙස්වලට ගොස් ඇති බවයි.

මෙම දෙමළ මාධ්‍යවේදීන් දෙදෙනා, රාජ්‍ය සහයද ඇතිව සිංහල ජනයා විසින් බලයෙන් තමන්ට අයත් තණබිම් අල්ලාගැනීමට ලක්වූ දෙමළ කිරි ගොවීන් විසින් දියත් කළ විරෝධතාවක් වාර්තා කරමින් සිටියෝය. මෙම කිරි ගොවීන්ගේ විරෝධතාව දැනට මාස දෙකකට අසන්න කාලයක් තිස්සේ අඛණ්ඩව දියත්වෙමින් තිබේ.

ජනාධිපති රනිල් වික්‍රමසිංහගේ මඩකලපු සංචාරය අතරතුරදී කිරි ගොවීන් සහ අතුරුදහන්වුවන්ගේ පවුල් වල සාමාජිකයන් විරෝධතා දියත් කරද්දී පුන්‍යමුර්ති සසිකරන් සහ වලසිංහම් ක්‍රිෂ්ණකුමාර් එම ස්ථානයේ ප්‍රවෘත්ති වාර්තාකරණය සදහා සිය රාජකාරි වල නිරතව සිටියහ.

මෙම මාධ්‍යවේදීන් දෙදෙනා දේශීය සහ විදේශීය මාධ්‍ය වෙනුවෙන් වාර්තාකරණයේ නියැලී සිටි අතර, CPJ කමිටුවට අනුව, පොලිස් නිලධාරියා විසින් ඔවුන් දෙදෙනාගේ පෞද්ගලික තොරතුරු, මාධ්‍ය කටයුතු පිලිබඳ පසුබිම, සහ විරෝධතාව අතරතුරදී සිදුවූ කටයුතු ආදී කරුණු පිළිබඳව ප්‍රශ්න කොට ඇත.

ප්‍රශ්න කිරීමෙන් පසුව, අදාළ පොලිස් නිලධාරියා මෙම දෙමළ මාධ්‍යවේදීන් දෙදෙනාට ඔවුන්ගේ වාචික සාක්ෂිවල ලිඛිත ප්‍රකාශවලට අත්සන් කිරීමට ද බල කර තිබේ. තවද, ගොවීන්, දේශපාලකයන්, සහ ක්‍රියාකාරීන් කිහිපදෙනකු සමග ඔවුන් දෙදෙනාද විරෝධතාව සම්බන්ධයෙන් පොලිසිය සිදුකරන අපරාධ පරීක්ෂණයක නම් කර ඇති බවත්, ඒ සම්බන්ධයෙන් නොවැම්බර් 17 වැනිදා එරාවුර් මහේස්ත්‍රාත් අධිකරණය හමුවේ පෙනී සිටිය යුතු බවත්, ඔවුන්ට දැනුම් දී ඇත.

කෙසේ නමුත්, CPJ කමිටුව පවසන්නේ නොවැම්බර් 8 වැනිදා වනතුරුම සසිකරන්ට හෝ ක්‍රිෂ්ණකුමාර්ට ලිඛිත සිතාසියක් හෝ ඔවුන්ට එරෙහි චෝදනා මොනවාද යන්න සඳහන් පොලිස් වාර්තාවක පිටපතක් හෝ ලැබී නොමැති බවයි.

2009 වසරේ යුද්ධය අවසන්වීමෙන් පසුව පවා බහුතරය වන සිංහල ජනයා සහ සුළුතරය වන දෙමළ ජනයා අතර ජනවාර්ගික ගැටලු පවතින බවද CPJ සංවිධානය නිකුත්කළ ප්‍රකාශයේ සඳහන් වේ.

“රට තුළ වෙසෙන දෙමළ ජනයා ආයතනගත වෙනස්කම් පෑමකට ලක්ව ඇත.”

මෙම දෙමළ මාධ්‍යවේදීන් දෙදෙනාටම නොවැම්බර් 4 වැනිදා ලැබුණු අධිකරණ නියෝගයක් හරහා නියෝග කර තිබුණේ, මංගලාරාම විහාරාධිපති අම්පිටියේ සුමනරතන හිමියන් දකුණේ වෙසෙන දෙමළ ජනයාට ජීවිත බියක් ඇති වන ආකාරයන් සිදුකළ තර්ජනාත්මක ප්‍රකාශයේ සංස්කරණය නොකළ වීඩියෝ දර්ශන භාර දෙන ලෙසත්, භික්ෂුවගේ ක්‍රියාකාරකම් පිලිබඳ ඔවුන් වෙන වෙනම සිදුකළ ගවේෂණ පිලිබඳ පොලිසියට ප්‍රකාශයක් ලබා දෙන ලෙසත් ය.

මාධ්‍යවේදීන් දෙදෙනාට එරෙහි පරීක්ෂණ වහාම නවතා දමන ලෙස ඉල්ලා සිටින CPJ සංවිධානයේ ප්‍රකාශය සඳහන් කරන්නේ, ඉන් පසුව, නොවැම්බර් 7 වැනිදා සසිකරන් සහ ක්‍රිෂ්ණකුමාර් මඩකලපුව කොට්ඨාශ අපරාධ විමර්ශන කාර්යාංශය හමුවේ පෙනීසිටි බවත්, වීඩියෝ දර්ශන පොලිසියට ලබාදුන් බවත් ය. එහිදී, ඔවුන් වාර්තා කරන්නේ මොනවාද සහ ඔවුන් වීඩියෝ දර්ශන ලබාදුන් මාධ්‍ය ආයතන මොනවාද යන්න පිළිබඳ ඔවුන් දෙදෙනා වෙන වෙනම පැයක් බැගින් ප්‍රශ්න කර ඇත.

සසිකරන් සහ ක්‍රිෂ්ණකුමාර් CPJ සංවිධානයට පවසා තිබුණේ මෙම නවතම සිදුවීම ගොවීන් සහ ආන්තිකකරණයට ලක්වූ ප්‍රජාවන් පිලිබඳ ඔවුන්ගේ වාර්තාකරණ කටයුතු නවතා දැමීම අරමුණු කොටගත් තවත් ආකාරයක හිංසනයක් බවයි.

පොලිසිය CPJ සංවිධානයට ප්‍රතිචාර දක්වා නැත.

අගෝස්තු 22 වැනිදා, මඩකලපුව ප්‍රදේශයේ රාජ්‍ය අනුග්‍රහය ඇතිව සිදුවන බවට චෝදනා කෙරෙන ඉඩම් බලෙන් අල්ලාගැනීම් වාර්තා කරමින් සිටි ක්‍රිෂ්ණකුමාර් සහ තවත් මාධ්‍යවේදීන් දෙදෙනකු සිංහල පිරිමින් 50 දෙනකුගෙන් පමණ යුතු කණ්ඩායමක් විසින් බලෙන් රඳවා තබාගන්නා ලදී.

“නොවැම්බර් 8 වැනිදා වන තෙක් කිසිඳු සැකකරුවකු (එකී සිද්ධියට) වගකිවයුතු බව හඳුනාගෙන තිබුණේ නැති” බව ක්‍රිෂ්ණකුමාර් CPJ සංවිධානයට පවසා තිබිණ.

මයිලත්තමඩු, මාදවනෙයි කිරි ගොවීන්ගේ ගැටළු පිළිබදව වාර්තාකිරීම සදහා කොළඹ සිට මඩකලපුව බලා ගිය මානව හිමිකම් ක්‍රියාධරයකු ඇතුළු මාධ්‍යවේදීන් කිහිප දෙනෙකුටද සිංහල ගොවීන් ඉඩම් අත්පත්කරගෙන සිටින භුමියට දැක බලා ගැනීමේ අවස්ථාව අහිමි කරමින්, එම ප්‍රදේශයට ඇතුළු වීම වලක්වාලීමට නොවැම්බර් 9 වැනිදා පොලීසිය සහ යුද හමුදාව ක්‍රියා කර තිබුනි.

රුකී ප්‍රනාන්දු, කමන්ති වික්‍රමසිංහ, රේඛා නිලුක්ෂි, ගනේෂන් ජෙගන්, මෙලනි මානෙල් පෙරේරා යන මාධ්‍යවේදීන් ඒ සම්බන්ධයෙන් පොලිස්පතිවරයාට ලිඛිත පැමිණිල්ලක් ද ඉදිරිපත් කර තිබේ.