දශක එක හමාරකට අධික කාලයක් තිස්සේ යුද හමුදාව විසින් බලහත්කාරයෙන් අත්පත්කරගෙන සිටින වන්නියේ මහවිරු සුසාන භුමියක් සම්පුර්ණයෙන්ම නිදහස් කරන ලෙස බලකරමින් විරෝධතාවයක් දියත් කර තිබේ.
“සොහොන්කොත් නමස්කාර කිරීමට ඉඩ දෙන්න, සොහොන්කොත් මත රැදී සිටින හමුදාව වහා ඉවත්වනු” ආදී වශයෙන් සිංහල, දෙමළ සහ ඉංශ්‍රීසි යන භාෂා ත්‍රිත්වයෙන් සදහන් බැනරයක් පෙරටු කරගනිමින් නොවැම්බර් 11 වැනිදා තේරාවිල් මහවිරු සුසාන භුමියේදී ප්‍රදේශවා දෙමළ ජනයා විරෝධතා දියත් කළ බවයි පළාත් බද වාර්තාකරුවන් පවසන්නේ.
“හාරන්න එපා, හාරන්න එපා, මිනී වළ හාරන්න එපා, බොරු කියන්න එපා බොරු කියන්න එපා මානව හිමිකම් ගැන බොරු කියන්න එපා, වන්දනා කරන්න ඉඩ දෙන්න” ආදී සටන් පාඨ ප්‍රදර්ශනය කරමින් දෙමළ ජනයා දියත් කළ එම විරෝධයට යාපනය දිස්ත්‍රික් පාර්ලිමේන්තු මන්ත්‍රී ශිවඥානම් ශ්‍රී ධරන් ද සිය සහයෝගය පළ කර තිබේ.
මන්ත්‍රීවරයා එහිදී බලධාරීන්ගෙන් ඉල්ලා සිටියේ ජාත්‍යන්තර මානව හිමිකම් වලට ගරු කරමින් ශ්‍රී ලංකා රජය ජනතාවට ඔවුන්ගේ අනුස්මරණ සිදු කිරීමේ අයිතිය ලබා දිය යුතු බවයි.
“මහ විරුවන් සැතපෙන බිම් සොහොන්කොත් සහ සිරුරු තැන්පත් කළ ස්ථාන 4500කට අධිකයි. මේ මහ විරුවන් සැතපෙන බිම පසුගිය වසර 15 ක් තිස්සේ යුද හමුදාව විසින් හමුදා කඳවුරක් විදිහට පාවිච්චි කරනවා. 2016 ඉදලා අපිට, මේ විරුවන් සැතපෙන බිමේ අනුස්මරණය කරන්න පුළුවන් කියලා එවකට මෛත්‍රීපාල සිරිසේන ආණ්ඩුව නිවේදනය කරා. විරුවන් සැතපෙන බිමේ කොටසක සහ ඒ ආසන්න ප්‍රදේශයේ කොටසක තමයි ජනතාව මේ අනුස්මරණ වැඩසටහන කරගෙන ඉන්නේ. මේ ස්ථානයේ හමුදා කදවුරක් ලෙස භාවිතා නොකළ යුතු ස්ථානයක්. අනුස්මරණය කරන්න ජනතාවට අනුමැතිය නැ කියන එක තමයි තේරාවිල් සුසාන භුමියේ සිද්ධියෙන් අපිට පෙන්නන්නේ. ජාත්‍යන්තර නීතියට අනුකුලව ජාත්‍යන්තර මානව හිමිකම් වලට ගරු කරමින් ශ්‍රී ලංකා රජය ජනතාවට ඔවුන්ගේ අනුස්මරණය කරන්න අනුමැතිය දිය යුතුයි.”
නොවැම්බර් 27 වැනිදාට යෙදී තිබෙන දෙමළ මහවිරු දිනය ඉලක්ක කරගනිමින් මුලතිව්, විශ්වමඩු පිහිටි තේරාවිල් සුසාන භුමිය දෙමළ ජනයා විසින් පසුගියදා ශ්‍රමදානයෙන් ශුද්ධ පවිත්‍ර කිරීමේ කටයුතු සිදු කර තිබුනි.
ප්‍රදේශවාසීන් චෝදනා කරන්නේ සුසාන භුමියෙන් සියයට හැත්තැපහකට වැඩි භුමි ප්‍රමාණයක් යුද හමුදාව අත්පත්කරගෙන සිටින බවටයි.
මිය ගිය එල්.ටී.ටී.ඊ සාමාජිකයන් මිහිදන් කර තිබෙන භුමිය මත යුද හමුදාව ක්‍රිකට් සහ පාපන්දු ක්‍රීඩා කරන බවට චෝදනා කරන ඥාතීන් පසුගිය වසර කිහිපය තුලදීම ඉල්ලා සිටියේ තේරාවිල් සුසාන භුමිය සමීපයේ ස්ථාපිත කර තිබෙන යුද හමුදා කඳවුර වහාම එම ස්ථානයෙන් ඉවත් කරන ලෙසයි.
Facebook Comments
