ඉඩමේ අයිතිය ඉල්ලන මයිලත්තමඩු කිරිගොවීන්ට පුංචි පහේ ජයක්

නැගෙනහිර පළාතේ කිරි ගවයන්ට තණ කෑම සදහා වෙන්කර තිබෙන භුමියේ බලහත්කාරයෙන් වාඩි ලා ගොවිතැන් කටයුතු කළ සිංහලයන් දහතුන් දෙනකුට එම භුමියෙන් ඉවත් වන ලෙස අධිකරණය නියෝග කර තිබේ.

එරාවුර් සංචාරක මහේස්ත්‍රාත් අධිකරණය විසින් නොවැම්බර් 13 වැනිදා එම නියෝගය ලබා දී ඇත්තේ සිය අධිකාරියට අයත් භුමියක් බලහත්කාරයෙන් අත්පත්කරගනිමින් පිටස්තරයන් පිරිසක් තාවකාලික නිවාස ඉදිකර වගා කටයුතු කරන බවට මහවැලි සංවර්ධන අධිකාරිය මේ වසරේ සැප්තැම්බර් 22 ගොනු කළ නඩුවේ තීන්දුව ප්‍රකාශයට පත් කරමිනි.

මඩකලපුව, මයිලත්තමඩු, මාදවනෙයි ප්‍රදේශයේ පිහිටි තෘණ භුමිය බලහත්කාරයෙන් අල්ලාගෙන සිටින සිංහල ගොවීන් ඉවත් කරන ලෙස ඉල්ලමින් මඩකලපුව සිත්තාන්ඩි පාසල ඉදිරිපිටදී සැප්තැම්බර්15 වැනි සිකුරාදා දෙමළ කිරි ගොවීන් ආරම්භ කළ විරෝධතාවය අද වන විට 60 වැනි දිනයත් අඛණ්ඩව ක්‍රියාත්මක වෙමින් තිබේ.

පළාත් බද වාර්තාකරුවන් පවසන්නේ මහවැලි සංවර්ධන අධිකාරිය ගොනුකළ නඩුව නොවැම්බර් 10 වැනි සිකුරාදා විභාගයට ගත් අවස්ථාවේ, ඉඩම්වල අයිතිය තහවුරු කිරීම සදහා නීත්‍යනුකූල ලියකියවිලි පවතීනම් නොවැම්බර් 13 වැනිදා අධිකරණය හමුවේ එම ලේඛන ඉදිරිපත් කරන ලෙස විනිසුරුවරයා මෙම පුද්ගලයන් 13 දෙනාට එදින නියෝග කළ බවයි.

ඉඩම් වල අයිතිය තහවුරු කිරීම සදහා බලය ඇති රජයේ නිලධාරියකු නිකුත් කළ ලේඛන නොවැම්බර් 13 වැනිදා අධිකරණය හමුවේ ඉදිරිපත් කිරීමට සිංහල ගොවීන්ට නොහැකි වු අතර ඒ අනුව එම භුමියෙන් ඉවත් වන ලෙස එරාවුර් සංචාරක අධිකරණයේ මහේස්ත්‍රාත් අන්වර් සදාත් නියෝග කළ බවයි පළාත් බද වාර්තාකරුවන් වැඩි දුරටත් පවසන්නේ.

මහවැලි සංවර්ධන අධිකාරිය වෙනුවෙන් රජයේ නීතිඥ ඩිල්කා ද සිල්වා අධිකරණය හමුවේ පෙනි සිට තිබේ.

විරෝධතාවයේ නිරත කිරි ගොවියන් පෙන්වා දෙන්නේ සිය ගවයන් තණකොළ කෑම සදහා භාවිත කළ ඉඩම් අක්කර දෙදාස් පන්සීයක් පමණ භුමි භාගයක් සිංහල ගොවීන් විසින් හේන් කටයුතු වෙනුවෙන් අත්පත්කරගෙන තිබීම නිසා කිරී ගොවීන් දැඩි අර්බුදයකට මුහුණ දී සිටින බවයි.

මඩකලපුව, මයිලත්තමඩු, මාදවනෙයි ප්‍රදේශයේ පිහිටි තෘණ භුමිය හිටපු ජනාධිපති ගෝඨාභය රාජපක්ෂ විසින් නැගෙනහිර ආණ්ඩුකාරධුරය සඳහා පත් කරන ලද වියත් මග ක්‍රියාකාරිණි අනුරාධා යහම්පත් විසින් මෑතකාලීනව පදිංචි කළ සිංහල පවුල් 150 ට පමණ බඩ ඉරිඟු ඇතුළු බෝග වගා කිරීම සඳහා පවරා දීමත් සමග පාරම්පරිකව කිරි ගවයන් පාලනය කරන්නන් සහ වගාකරුවන් අතර පසුගිය කාලයේ අවස්ථා කිහිපයකදීම ගැටුම් ඇති වී තිබුනි.

කිරි ගොවීන් පෙන්වා දෙන්නේ ගවයන්ට කැවීම සඳහා භාවිත කළ තණ බිම් අක්කර 6000 ක භුමියෙන් සිංහල ගොවියන් බලහත්කාරයෙන් අල්ලා ගෙන සිටින්නේ සරුසාරෙට තෘණ වැවෙන අක්කර 2500 ක ප්‍රදේශයක් බවයි.

ජනාධිපතිවරයා පසුගියදා නැගෙනහිර පලාතේ සංචාරයක නිරත වු අවස්ථාවේ සිය ගැටළු වලට විසදුම් ඉල්ලා විරෝධතා දියත් කළ කිරි ගොවීන්ට පොලීසිය විසින් පහර දී තිබුනි.

නැගෙනහිර සංචාරය අතරතුරදී ජනාධිපතිවරයාට විරෝධතා දැක්වු බෞද්ධ භික්ෂුවක් සහ මන්ත්‍රීවරයකු ඇතුළු හතලිස් දෙනකුට එරෙහිව පොලීසිය මේ වන විටත් අධිකරණය හමුවේ නඩු පවරා ඇති අතර චුදිතයන් සාතිශය බහුතරය දෙමළය.

ජනාධිපති ලේකම් කාර්යාලයේදී ඔක්තෝබර් 15 වැනි ඉරිදා කිරි ගොවි ගැටළුවට විසදුම් සෙවීම සම්බන්ධයෙන් ජනාධිපතිවරයා සමග දෙමළ ජනතා නියෝජිතයන් පැවැත්වු සාකච්ඡාවේදී කිරි ගොවීන්ගේ ඉඩම් අත්පත්කරගනිමින් කෘෂිකර්මාන්තයේ යෙදී සිටින ගොවීන් ඉවත් කිරීමට අධිකරණ ක්‍රියාමාර්ග ගන්නා ලෙස රනිල් වික්‍රමසිංහ ජනාධිපතිවරයා පොලිසියට සහ මහවැලි සංවර්ධන දෙපාර්තමේන්තු නිලධාරීන්ට ද උපදෙස් ලබා දී තිබුනි.