“බලපෑම් නැතත්” පොලිස්පති ඉල්ලා අස්වන්නට තීරණය කරයි

0

ජනපති සහ අගමැති ගෙන් තමන් හට ඉල්ලා අස්වීමට බලපෑම් නැතත් තමන් එම ධුරයෙන් ඉවත් වීමට තීරණය කර ඇති බව පොලිස්පතිවරයා පවසයි.

තමන් පොලිස්පති ධුරයෙන් ඉවත් වීම සියලු දෙනාගේ කැමැත්ත නම් ඉල්ලා අස්වීමට සුදානම් බව පොලිස්පති පුජිත් ජයසුන්දර පැවසු බව ලංකාදීප පුවත්පත වාර්තා කර තිබේ.

“දැන් ඉතින් හිටියා ඇති කියලා හිතෙනවා. මම අවුරුදු 33 ක් පොලිසියේ අවංකව රාජකාරි කළා. කාගෙන්වත් එක ගල් කැටයක් අරගෙන නැහැ. මේවා දන්න අය දන්නවා. මම හරි හම්බ කර ගත්තේ මිනිස්සුයි, ආත්ම ගරුත්වයයි, නමයි විතරයි. මෙහෙම අවංකව වැඩ කරද්දී ලැබෙන්නේ ගල් විතරක් නම් තවදුරටත් තනතුරුවල ඉඳල වැඩක් නැහැ,” යි පොලිස්පති පවසා ඇත.

ධුරයෙන් ඉල්ලා අස්වන ලෙසට ජනපති හා අගමැති නොකී බව කියන පොලිස්පතිවරයා එහෙත් ඔවුන් හට තමන් පිළිබඳව කලකිරීමක් ඇත්නම් තවදුරටත් ධරයේ රැඳී සිටීම පලක් නොවන බවයි පෙන්වා දෙන්නේ.

පොලිස්පතිවරයාගේ ක්‍රියා කලාපය දෝෂ දර්ශනයට ලක් කරමින් එම ධුරයෙන් ඉවත් වන ලෙසට අගමැතිවරයා සහ ජනාධිපතිවරයා පුජිත් ජයසුන්දරගෙන් ඉල්ලා සිටි බව මීට පෙර මාධ්‍ය වාර්තා කළේය.

එවැනි ඉල්ලීමක් අගමැතිවරයා විසින් නොකළ බවට රජයේ ප්‍රවෘත්ති අධ්‍යක්ෂකවරයා විසින් නිවේදනය කලද ජනාධිපතිවරයා එවැනි ඉල්ලීමක් කල බව හෝ නොකළ බවට එහි සඳහන් නොවීය.

කෙසේ වෙතත් ධුරයෙන් ඉල්ලා අස්වන කාල වකවානුව සම්බන්ධයෙන් පොලිස්පති පුජිත් ජයසුන්දර කිසිවක් ප්‍රකාශ කර නැත.

Facebook Comments