දෙමළ දේශපාලන සිරකරුවන් සම්බන්ධයෙන් තීරණයක් ගැනීම සදහා දෙමළ ජාතික සන්ධානය සමග සාකච්ඡා කිරීමට ජනාධිපතිවරයා දුන් පොරොන්දුව මත දේශපාලන සිරකරුවන් සිය උපවාසය අත්හල බව දෙමළ ජාතික සන්ධානය පවසයි.
එම සාකච්ඡාව ලබන 17 වනදා පාර්ලිමේන්තු සංකීරණයේදී පවත්වන බවයි පාර්ලිමේන්තු මන්ත්‍රී එම් ඒ සුමන්දිරන් පවසන්නේ.
ත්‍රස්තවාදය වැළැක්වීමේ පනත යටතේ සිරගත කර ඇති එම සිරකරුවන් පුනරුත්ථාපනය සදහා යොමු කිරීම සම්බන්ධයෙන් මෙම සාකච්ඡාවේදී වැඩි අවධානයක් යොමු කරන බවත් ඒ සදහා සාධනීය පිළීතුරක් ජනාධීපතිවරයාගෙන් අපෙක්ෂා කරන බවයි මන්ත්‍රීවරයා පෙන්වා දෙන්නේ.
“සමහර අය අවුරුදු 25 වැඩි කාලයක් ඇතුලෙ ඉන්නවා. ඒගොල්ලො ඉල්ලන්නෙ තමන්ව නිදහස් කරන්න කියල නෙමෙයි ගොඩක් කල් යන නිසා වරද පිළිගන්න ඒ අය ලෑස්තිය කියලා ලිඛිතව දැනුම් දීලා තියෙනවා. වරද පිළි අරන් පුනුරුත්ථාපනයට යවන්න කියලයි ඒ අය ඉල්ලන්නෙ.” යි සුමන්තිරන් මන්ත්‍රීවරයා පැවසීය.
දිර්ඝ කාලයක් තිස්සේ සිරගත කර ඇති දෙමළ දේශපාලන සිරකරුවන් නිදහස් කිරීමට පියවර ගන්නේනම් පමණක් මෙවර අයවැය සදහා රජයට සහය දෙන ලෙස තමන් ද්‍රවිඩ ජාතික සන්ධානයෙන් ඉල්ලීමක් කරන බව උතුරු පළාත් ප්‍රධාන අමාත්‍ය සී වී විග්නේෂ්වරන් කියා සිටියේය.
ත්‍රස්ත ක්‍රියා සදහා අණදුන් කරුණා අම්මාන් වැනි හිටපු එල්ටීටී නායකයින් නිදහස භුක්තිවිදිමින් සිටියදී එම අණ ක්‍රියාත්මක කළ පිරිස් පමණක් බන්ධනාගාරයේ රැදවා තැබීම අසාධාරණ බවයි උතුරු පළාත් මහ ඇමැතිවරයා වැඩි දුරටත් පෙන්වා දෙන්නේ.
Facebook Comments
