අවුරුදු තිහකට ආසන්න කාලයක් ශ්‍රී ලංකා යුද හමුදාව අත්පත් කරගෙන සිටි ඉඩම් අක්කර 54 ආපසු ඒවායේ හිමිකරුවන්ට බාර දී තිබේ.
මයිලඩ්ඩි ධීවර වරාය ඇතුළු යාපනය දිස්ත්‍රික්කයේ තයියඩ්ඩි ග්‍රාම නිලධාරී වසමට අයත් ඉඩම් අක්කර 54ක් යාපනය ආරක්ෂක සේනා ආඥාපති විසින් යාපනය දිසාපති වරයා වෙත 3 සඳුදා උත්සවාකාරයෙන් භාරදෙන ලදී.
මෙම ඉඩම් නිදහස් කිරීම හේතුවෙන් දශක තුනක් තිස්සේ අනාථ කඳවුරු වල සිටින පවුල් 187 කට නැවතත් තමන්ගේ මුල් ඉඩම්වල පදිංචිවීමේ අවස්ථාව උදා වනු ඇති බව ශ්‍රී ලංකා යුද හමුදාව පවසයි.
හමුදා ප්‍රධානීන්, රජයේ නිලධාරීන් සහ දේශපාලකයන්ද සහභාගී වූ එම රැස්වීමේදී පලාලි හමුදා කඳවුර අවට හමුදාව අත්පත් කරගෙන සිටින නැගෙනහිර වාසවිලාන්, නැගෙනහිර තයියිඩ්ඩි, උතුරු පලාලි සහ කුරුම්පසිද්දි යන ප්‍රදේශවල ඉඩම් නිදහස් කර දෙන ලෙසටද ඉල්ලීමක් කර ඇත.
යාපනය ආරක්ෂක සේනා ආඥාපති මේජර් ජෙනරාල් දර්ශන හෙට්ටිආරච්චි අතින් ඉඩම් නිදහස් කිරීමේ නිල ලේඛන භාරගත් යාපනය දිසාපති නාගලිංගම් වේදනායගම් හමුදාව යටතේ ඇති අනිකුත් ඉඩම් මුදා හැරීම පිළිබඳව ඉන් අනතුරුව යාපනය කච්චේරියේ පැවති සාකච්ඡාවක් අවසානයේ මාධ්‍යවේදීන් හා ප්‍රකාශ කළේ තවත් ඉඩම් අක්කර 5400 කට අධික ප්‍රමාණයක රජයේ ආරක්ෂක අංශ සහ පොලිසිය වාඩිලාගෙන සිටින බවයි.
Facebook Comments
