මහා සංඝරත්නයේ උපදෙස් අනුව බෞද්ධයන්ගේ මුලිකත්වයෙන් ආගමික සංහිඳියාව ඇති කිරීමට මණ්ඩලයක් පිහිටුවන බවට අගමැතිවරයා විදේශ දුත පිරිසකට සහතික වී තිබේ.
“ත්‍රෛ නිකායික මහා සංඝරත්නයේ උපදෙස් අනුව ආගමික සංහිඳියාව ඇති කිරීම සඳහා ස්ථිර ආගමික සංහිඳියා මණ්ඩලයක් නීති මගින් ඇති කිරීමට තමන් කටයුතු කරන බවද, ඒ පිළිබඳව සෙසු ආගමික නායකයන් සමගද සාකච්ඡා කරන බවද අග්‍රාමාත්‍යවරයා ප්‍රකාශ කළේය,” යි අගමැතිවරයාගේ උපදේශක නීතිඥ සුදර්ශන ගුණවර්ධන නිකුත් කළ ට්විටර් පණිවිඩයක සඳහන් වේ.
ජුනි 12 වනදා අරලිය ගහ මන්දිරයේ අගමැති – යුරෝපා හමුව පැවතියේ අතුරලියේ රතන හිමි විසින් දියත් කරන ලද උපවාසයෙන් පසු මුස්ලිම් අමාත්‍යවරුන් සාමුහිකව ඉල්ලා අස්වීමත් සමගය.
ඉල්ලා අස්වූ මුස්ලිම් අමාත්‍යවරුන්ට නැවත රජයට එක්වී තනතුරු භාරගන්නා ලෙස ඉල්ලා සිටියේ යැයි අගමැතිවරයා විදේශීය දූත මණ්ඩලයට කියා සිටි බව ද නීතිඥ ගුණවර්ධන කියා සිටී.
“රටේ සාමය සහ සංහිඳියාව අනතුරේ හෙලමින් ශ්‍රී ලංකාවේ මුස්ලිම් ප්‍රජාව ඉලක්ක කර ගනිමින් ක්‍රියාත්මක වන දේශපාලනික සහ ආගමික බලපෑම් පිලිබඳ අපේ දැඩි අවධානය යොමුවී ඇත,” යි අරලියගහ මන්දිරයේ පවත්වන ලද සාකච්ඡාවෙන් අනතුරුව යුරෝපා දූත මණ්ඩලය වෙනුවෙන් නිකුත් කරන ලද නිවේදනයේ දැක්වේ.
“දිගින් දිගටම මාධ්‍ය මගින් ප්‍රචාරය කරනු ලබන අගතිගාමී සහ අභූත චෝදනා මගින් සිදුවන්නේ නොසන්සුන්තාව තවත් වැඩිවීම පමණි.”
“වෛරී ප්‍රකාශ සම්බන්ධයෙන් පියවර ගැනීමට හා ආගමික සංහිඳියා මණ්ඩලයක් ස්ථාපනය කිරීමට රජය දක්වා ඇති කැපවීමද අපි අනුමත කරමු,” යි යුරෝපා දූත මණ්ඩල නිවේදනයේ වැඩි දුරටත් සඳහන් වෙයි.
ශ්‍රී ලංකාවේ සිටින ප්‍රංශ, ජර්මන්, ඉතාලි, නෙදර්ලන්ත, රුමේනියාව, නෝර්වේ, ස්විට්සර්ලන්ත සහ බ්‍රිතාන්‍ය නියෝජිතයන් අගමැතිවරයා සමග සාකච්ඡාවට සහභාගි වූ බව යුරෝපා සංගමය පවසයි.
Facebook Comments
