පසුගිය ජනාධිපතිවරණයට මලය කඳුරට දෙමළ නියෝජිතයකු ලෙස ස්වාධීනව ඉදිරිපත් වු අපේක්ෂකයෙක් උතුරු නැගෙනහිර පදනම වු දෙමළ දේශපාලන සන්ධානයකින් මෙවර මහ මැතිවරණයට තරග වැදීමට තිරණය කර තිබේ.
ද්‍රවිඩ එක්සත් විමුක්ති පෙරමුණේ නායක වී. ආනන්ද සංගරීගේ ප්‍රධානත්වයෙන් යුත් එක්සත් සන්ධානයෙන් මෙවර නුවරඑළිය දිස්ත්‍රික්කය සදහා තමන් තරග වදින බව ජනාධිපති අපේක්ෂකයකු වු මයිල්වාහනම් තිලකරාජ් ඔක්තෝබර් 9 වැනිදා නිවේදනය කර තිබුනි.
පසුගිය මහ මැතිවරණයේදී සජිත් ප්‍රේමදාසගේ නායකත්වයෙන් යුත් සමගි ජන බලවේගයෙන් බදුල්ල දිස්ත්‍රික්කය නියෝජනය කරමින් පාර්ලිමේන්තුවට පිවිසි වඩිවේල් සුරේෂ් ඔකෝතොබර් 9 වැනිදා හිටපු පාර්ලිමේන්තු මන්ත්‍රී රන්ජන් රාමනායකගේ නායකත්වයෙන් පිහිටවු “එක්සත් ප්‍රජාතන්ත්‍රවාදී හඬ” පක්ෂය සමග එක්විය.
ඔහු මෙවර එම පක්ෂයෙන් බදුල්ල දිස්ත්‍රික්කයෙන් තරග වැදීමට නියමිතය.
කදුරට ජනතා පෙරමුණේ ආරම්භක නායකයා වු හිටපු පාර්ලිමේන්තු මන්ත්‍රී පෙරියසාමි චන්ද්‍රසේකරන්ගේ දියණිය වන නීතිඥ චන්ද්‍රසේකරම් අනුෂා ද මෙවර නුවරඑළිය දිස්ත්‍රික්කයෙන් රන්ජන් රාමනායකගේ නායකත්වයෙන් යුත් එක්සත් ප්‍රජාතන්ත්‍රවාදී හඬ පක්ෂයෙන් තරග වදින බව දෙමළ ජනමාධ්‍ය වාර්තා කර තිබේ.
මනෝ ගනේෂන් නායකත්වය දරන ප්‍රජාතන්ත්‍රවාදී ජනතා පෙරමුණ, පලනි දිගම්බරම් නායකත්වය දරන කම්කරු ජාතික පෙරමුණ හා වේලු සාමි රාධා ක්‍රිෂ්නන් නායකත්වය දරන කදුරට ජනතා පෙරමුණ එක්ව පිහිටුවා ගත් මනෝ ගනේෂන් නායකත්වය සපයන දෙමළ ප්‍රගතිශීලි පෙරමුණ ද මෙවර මහ මැතිවරණයට ඉදිරිපත් වන්නේ සජිත් ප්‍රේමදාසගේ නායකත්වයෙන් යුත් සමගි ජන සන්ධානයෙනි.
දෙමළ ප්‍රගතිශීලි පෙරමුණ සජිත් ප්‍රේමදාසගේ නායකත්වයෙන් යුත් සමගි ජන සන්ධානයෙන් මලයහ ජනයා වැඩි වශයෙන් ජීවත් වන කොළඹ, ගම්පහ, කළුතර, කැගල්ල, රත්නපුර, නුවර, නුවරඑළිය හා බදුල්ල යන දිස්ත්‍රික්ක සදහා තරග කිරීමට නියමිතය.
ජීවන් තොණ්ඩමාන් නායකත්වය පවසන ලංකා කම්කරු කොංග්‍රසය (CWC) නුවරඑළිය දිස්ත්‍රික්කය සදහා අලියා ලකුණ යටතේත්, බදුල්ල දිස්ත්‍රික්කය සදහා සිලින්ඩරය ලකුණ යටතේත් තරග කිරීමට නියමිතය.
හිටපු ජනාධිපති රනිල් වික්‍රමසිංහගේ නායකත්වයෙන් යුත් එක්සත් ජාතික පක්ෂය ප්‍රමුඛ සන්ධානය මෙවර මහ මැතිවරණයේදී ප්‍රධාන වශයෙන් ගෑස් සිලින්ඩරය ලකුණ යටතේ තරග වැදීමටත් දිස්ත්‍රික්ක කිහිපයක් සදහා පමණක් අලියා ලකුණින් තරග වැදීමටත් පසුගියදා තීරණය කළ බව ජනමාධ්‍ය වාර්තා කර තිබේ.
ලංකා කම්කරු කොංග්‍රසයේ උප සභාපති ලෙස කටයුතු කළ භාරත් අරුල්සාමි ඔක්තෝබර් 7 වැනිදා එම පක්ෂ සාමාජිකත්වයෙන් සහ උප සභාපති තනතුරින් ඉවත් වී ඔක්තෝබර් 8 වැනිදා මනෝ ගනේෂන්ගේ නායකත්වයෙන් යුත් දෙමළ ප්‍රගතිශිලි පෙරමුණ සමග එක්ව තිබුනි.
ඒ අනුව භාරත් අරුල්සාමි මෙවර පාර්ලිමේන්තු මැතිවරණය සදහා සජිත් ප්‍රේමදාසගේ නායකත්වයෙන් යුත් සමගි ජන සන්ධානයෙන් නුවරඑළිය දිස්ත්‍රික්කය සදහා තරග කිරීමට නියමිතය.
Facebook Comments
