පුත්තලමේ පාරිසරික කලාපයක් ඉස්සන්ට බාරදෙයි

ජෛව විවිධත්වය අතින් සුවිශේෂී වන පුත්තලම් දිස්ත්‍රික්කයේ තෙත් බිමක් රජයේ හිතවතුන්ගේ ඉස්සන් බෝකිරීම සදහා ඩෝසර් කර ඇති බව පරිසර සංවිධානයක් විසින් අනාවරණය කර තිබේ.

1971 පෙබරවාරි 02 දින ඉරානයේ රැම්සා නුවරදී අරමිභ කරන ලද රැම්සා සමිමුතිය යටතේ තෙත් බිමක් ලෙස ඇතුලත් කර ඇති මෙම භුමිය ලංකාවේ ඇති රැම්සා බිම් අතරින් 2001 වර්ෂයේ අගොස්තු තුන්වන දින රැම්සා තෙත් බිමක් ලෙස නම් කර ඇති බවයි පරිසර හා සොබාදහම් අධ්‍යයන මධ්‍යස්ථානය පවසන්නේ.

මෙම තෙත් භුමිය 1997 ජුනි මස 11 වන දින වන ජීවී සංරක්ෂණ දෙපාර්තමේන්තුව යටතේ පාලනය වන අභය භුමියක් ලෙස නම්කර ඇති බව පරිසර හා සොබාදහම් අධ්‍යයන මධ්‍යස්ථානයේ ජාතික සම්බන්ධීකාරක රවීන්ද්‍ර කාරියවසම් පෙන්වා දෙයි.

සිය මුහුණු පොතේ සටහනක් තබමින් පරිසරවේදී රවීන්ද්‍ර කාරියවසම් අවධාරණය කර ඇත්තේ ඉස්සන් වගාව සදහා ඩොසර් කරන ප්‍රදේශය වන සංරක්ෂණ දෙපාර්තමේන්තුව කඩොලාන නැවත් ස්ථාපිත කර අධීක්ෂණ මටිටමින් පවත්වාගෙන යාමට සැළසුමක කරන ලද ප්‍රදේශයක් බවයි.

හෙක්ටයාර් 1400 ලෙස තීබු මෙම රැමිසා තෙත් බිම ප්‍රධාන පරිසර පද්ධති ත්‍රිත්වයක් එක භූමියක දැක ගත හැකි ප්‍රදේශයක් බව ඔහු වැඩි දුරටත් පෙන්වා දෙයි.

“කලපු පරිසර පද්ධතිය එක් පසකිනුත්, ගොඩබිමි පරිසර පද්ධතිය සුවිශේෂි වු ජෛව විවිධත්වයකිනුත් බිම පුරාණ වාරි පරිසර පද්ධතියකිනුත් මෙය සමන්විතය.”

පං කට්ටය වැව, මරදන්සොල වැව, ආනවිලුන්දාව වැව, මයියාව වැව, සුරැවිල වැව හා වේල්ලවාලි වැව යන පුරාණ එල්ලංගා පද්ධතියේ ජල පෝෂක ප්‍රදේශයක් ලෙසත් මෙය මෙම තෙත් බිමෙන් පෝෂණය ලබන අතර එම වාරි පද්ධතිය සමග මුලු වැව් 11 ප්‍රමාණයක් තෙත් භුමිය ඇතුලත හා ඒ අවට දැකගත හැකි බව පරිසරවේදී රවීන්ද්‍ර කාරියවසම් පවසයි.

පක්ෂි විශේෂ 150 ක්

ජලජ පක්ෂින් ඇතුලු පක්ෂි විශේෂ 150 ට අධික පිරිසක් මෙම තෙත් භූමයේ නිරික්ෂණය කළ හැකි අතර බොහෝ සංචාරක පක්ෂින්ගේ පළමු නවාතැන බවට ආනවිලුන්දාව රැමිසා තෙත් බිම පත්වන බව පරිසරවේදියා වැඩි දුරටත් සදහන් කරයි.

“බොහෝ පක්ෂින් රට අභ්‍යන්තරයට හා රටේ දකුණු දෙසට ගමන් කරන්නේ ආනවිලුන්දාාව තෙත් භූමිය තුළ විඩා නිවීමෙින් අනතුරුවයි. Opens bill, Great commorent, white ibis, Stork, Pheasant tailes jacana, ඇතුලු පක්ෂි විශේෂ වල විශාල ජනාවාස මෙහිදි දැක ගත හැකිය.”

ක්ෂිරපායි විශේෂ 24 පමණ මෙම ප්‍රදේශයෙන් වාර්තා වී ඇති අතර 75 ට වැඩි සමනළ විශේෂ සංඛ්‍යාවක් මෙහි වාර්තා වන බව රවීන්ද්‍ර කාරියවසම් සිය මුහුණු පොතේ තබන ලද සටහනේ වැඩි දුරටත් සදහන්ය.

ජෛව විවිධත්වය අතින් ඉතාමත් ඉහළ ප්‍රදේශයක් වන ආනවිලුන්දාව රැම්සා තෙත් බිම 2008 වර්ෂයේ සිට විටින් විට විනාශ වු අතර එම ප්‍රදේශයේ ජනතාව තෙත් බිමට අයිති ඉඩම් අල්ලා ගැනීම, දේශපාලන බලහත්කාරකම් මත ඉඩම් ඉස්සන් වගාවට හා පුද්ගලික අයිතියට පැවරීම හා කර්මාන්ත ශාල වල අවශ්‍ය ඉඩම් මෙම භුමියෙන් නිදහස් කිරීම නිසා පසුගිය වසර 15 පමණ සිට මෙහි විනාශයආරම්භ වු බව පරිසරවේදී රවීන්ද්‍ර කාරියවසම් පවසයි.

” එය එතනින්ද නොනැවති වර්තමාන රජය විසින්ද මෙහි ඉඩම් තම හිතවතුන්ගේ ඉස්සන් වගා ව්‍යාපෘති සදහා අද වන විට විනාශ කිරීමට ලබාදී ඇත.”

මෙය වන සත්ව හා වෘක්ෂලතා ආඥාපනත හා ජාතික පාරිසරික පනත අහු අමුවේ උල්ලංඝනය කිරීමක් බව පෙන්වා දෙන පරිසරවේදී රවීන්ද්‍ර කාරියවසම් අවධාරණය කරන්නේ මෙවැනි පරිසර පද්ධතියක් විනාශ කිරීමට ඉඩ දීම රටේ අනාගත ආර්ථිකයටද ද සැලකිය යුතු බලපෑමක් එල්ල කරනු ඇති බවයි.