මෙරට ප්‍රමුඛ පෙළේ ක්‍රිකට් ක්‍රීඩයෙකු වන සනත් ජයසුරිය හට ක්‍රිකට් සම්බන්ධ සියලු ක්‍රියාකාරකම් වසර දෙකක කාලයක් සඳහා තහනම් කිරීමට ජාත්‍යන්තර ක්‍රිකට් කවුන්සිල තීන්දු කර තිබේ.
ඒ එම කවුන්සිලයේ දූෂණ විරෝධි සංග්‍රහයේ වගන්ති දෙකක් කඩ කිරීමට වරදකරු වීම නිසාවෙනි.
අයි.සී.සී.යේ දුෂණ මර්දන ඒකකය විසින් සිදු කරනු ලබන විමර්ශනයට අදාළව අවශ්‍ය කරන ලියවිලි ලබා නොදීම සහ ඒවා සඟවා තැබීම සනත් ජයසූරියට එරෙහිව නගා ඇති චෝදනා වේ.
සනත් දූෂණ විරෝධි නීති සංග්‍රහයේ නීති දෙකක් උල්ලංඝණය කර ඇති බව සඳහන් කරමින් 2018 ඔක්තෝබර් මස 15 වැනි දින ජාත්‍යන්තර ක්‍රිකට් කවුන්සිලය ඔහුට ලිපියක් මගින් දන්වා තිබුණි.
කෙසේ වෙතත් එම පරීක්ෂණ අවසානයේ ජාත්‍යන්තර ක්‍රිකට් කවුන්සිලය 26 අඟහරුවාදා නිවේදනයක් නිකුත් කරමින් සඳහන් කළේ දූෂන විමර්ශණ ඒකකයේ පරීක්ෂණ සඳහා සනත් ජයසූරීය සහයෝගය ලබා නොදීම හේතුවෙන් ඔහුට වසර දෙකක තහනමක් පැනවීමට තීරණය කළ බවයි.
ජාත්‍යන්තර ක්‍රිකට් කවුන්සිලය නිවේදනය කළ ආකාරයට සනත් ජයසූරීය කඩ කළ එක් නීතියක් වූයේ දූෂන විරෝධි ඒකකය මෙහෙයවු පරීක්ෂණයට සහයෝගය නොදැක්වීම සහ පරීක්ෂණයට අදාල තොරතුරු හෝ ලේඛන නිවැරදි ලෙස ඉදිරිපත් කිරීමට අපොහොසත් වීමයි
ඔහු විසින් කඩ කළ දෙවන නීතිය ලෙස සඳහන් වූයේ පරීක්ෂණයට අදාළ හෝ පරීක්ශණයේ සාක්ෂි විය හැකි වාර්තාවක් හෝ වෙනත් තොරතුරක් ආවරණය කිරීම සහ දූෂන විරෝධි ඒකකය මගින් ක්‍රියාත්මක කළ පරීක්ෂණයට බාධා කිරීම හෝ ප්‍රමාද කිරීමයි.
ජාත්‍යන්තර ක්‍රිකට් කවුන්සිලයේ දූෂණ මර්දන ඒකකය යටතේ කළ පරීක්ෂණවලදී තමා සතු සිම් කාඩ්පත සහ ජංගම දුරකතනය කඩිනමින් පරීක්ෂණ සඳහා ලබාදීමට කටයුතු නොකිරීම සම්බන්ධයෙන් චෝදනාව එල්ල වී ඇති අතර දූෂණ චෝදනා, තරග පාවාදීම් සහ රහසිගත තොරතුරු අනාවරණය කිරීම් සම්බන්ධයෙන් තමන්ට චෝදනා එල්ල වී නොමැති බව සනත් ජයසුරිය අයි.සී.සී.යේ තීරණයට පිළිතුරු ලෙස නිවේදනයක් නිකුත් කරමින් කියා සිටියේය.
තමා මෙතෙක් තම ක්‍රීඩා ජීවිතය තුළ උපරිම අවංකභාවයෙන් යුතුව කටයුතු කළ බවත් සෑම විටම තමන් රට ප්‍රධාන කර කටයුතු කර ඇති බව ද ඔහු සිය නිවේදනයේ වැඩි දුරටත් සඳහන් කර ඇත.
Facebook Comments
