කෝටි හයසීයක් හොයාගන්න රටේ ඉඩම් විකිණීමේ සැලසුම්

ඩොලර් හිඟයට පිළියම් වශයෙන් රටේ ඉහල වටිනාකම් ඇති ඉඩම් පනහකට වැඩි ප්‍රමාණයක් දේශීය සහ විදේශීය ආයෝජකයන්ට බදු දීමට ආණ්ඩුව ඉදිරිපත් වී තිබේ.

කොළඹින් පලකෙරෙන ජනමාධ්‍ය වාර්තා වලට අනුව මෙම ඉඩම් වලින් සමහරක් මෙයට පෙරදී ද බදුදීමට සූදානම් කර ඇති නමුත්, ගැනුම් කරුවන් ඉදිරිපත් වී නොමැත.

ඒ සම්බන්ධයෙන් නාගරික සංවර්ධන අමාත්‍යාංශයේ ලේකම් සිරිනිමල් පෙරේරා ජනමාධ්‍ය වෙත පවසා ඇත්තේ, මෙම ඉඩම් රාජ්‍ය සහ පෞද්ගලික හවුල් ව්‍යාපාර හෝ බද්ධ ව්‍යාපාර සඳහා, ඒවායේ කොටස් වලින් සියයට 51 ක් රජය සන්තකයේ තබාගනිමින් පිරිනැමීමට නියමිතව ඇති බවයි.

අගනුවරත්, ඉන් පිටතත් පිහිටි එම ඉඩම්වලින් ඇමරිකානු ඩොලර් කෝටි හයසීයක් උපයා ගැනීම ආණ්ඩුවේ අපේක්ෂාවයි.

මෙයට පෙර, ඕමාන් රාජ්‍යයේ ‘ශුමූක් ආයෝජන සහ සේවා’ නම් පාර්ශවයක් විසින්, අක්කර නවයක් වන කොළඹ චාමර්ස් ධාන්‍යාගාරය පිහිටි ඉඩම සහ ගුවන් හමුදා මූලස්ථානය ලබාගනු ඇතැයි බලාපොරොත්තු වුවද, එය ක්‍රියාත්මක වී නැත.

කෙසේ වෙතත් මේ වන විට, එම බිම් කොටස් වලට අමතරව බදු දීම සඳහා අලුතින් ඉඩම් හඳුනාගෙන තිබේ.

කොළඹින් පලකෙරෙන වාර්තාවලට අනුව මෙම බද්දට සූදානම් කර ඇති ඉඩම් ලැයිස්තුවේ අඩංගු දේපල අතරට සුඛෝපභෝගී මහල් නිවාස සංකීර්ණයක් සඳහා ඉදිරිපත් කර ඇති කොළඹ 5 හි සමිට් නිවාස භූමියේ අක්කර 10 ක්, වොක්ෂෝල් වීදියේ සහ ඩී.ආර්. විජේවර්ධන මාවතේ අක්කර හයක්, නුගේගොඩ සහ කොල්ලුපිටිය පොදු වෙළඳපොලවල්; අක්කර හතරක් සමඟ පිටකොටුව ලෝක වෙළෙඳපොළ, රාජගිරිය, ඩෙන්සිල් කොබ්බෑකඩුව මාවත සහ බත්තරමුල්ලේ අක්කර තුන බැගින්, නුවරඑළිය සහ මහනුවර පිහිටි ඉඩම් කොටස් සහ ඒකල අක්කර පනස් පහකුත් ඇතුලත්ය.

වැලිකඩ බන්ධනාගාරයේ දේපළ සඳහා කොරියානු ආයෝජකයකු ඉදිරිපත් වී ඇත. දැනට වැලිකඩ බන්ධනාගාර පරිශ්‍රය එසේ පවරා දීමෙන් පසු ඒ වෙනුවට හොරණ ප්‍රදේශයේ යෝජිත නව බන්ධනාගාරය ඉදිකිරීමට යෝජනා වී තිබේ.

මෙම භූමීන් මිශ්‍ර සංවර්ධන ව්‍යාපෘති, මහල් නිවාස සංකීර්ණ, හෝටල්, ආපනශාලා සහ නිවාඩු නිකේතන ව්‍යාපෘති, භාණ්ඩ මෙහෙයුම් මධ්‍යස්ථාන හෝ බහු-මහල් රථ ගාල් ආදිය සඳහා වසර 33, 50 හෝ 99 දක්වා කල්බදු දීමට නියමිතය.

බදු දීමෙන් පසු අදාළ ව්‍යාපෘති සඳහා නාගරික සංවර්ධන අමාත්‍යාංශය විසින් ණය සහ සහාය ලබා දෙනු ඇත. කෙසේ වෙතත්, බදු කාලය ඇරඹී දෙවසරක් ගතවෙද්දීත් ව්‍යාපෘතියේ ප්‍රගතියක් නොමැති නම්, ඉඩම ආපසු පවරාගැනීමට නියමිතය.

කෙසේ වෙතත්, මේ සම්බන්ධයෙන් ගැනුම් කරුවන්ගෙන් පළවී ඇති උනන්දුව අඩු බව වාර්තා වේ.

ඊට එක් හේතුවක් වන්නේ කොළඹ වරාය නගරයෙන් තරඟකාරී ලෙස සියලු යටිතල පහසුකම් ද සහිතව බිම් කොටස් ආයෝජනයට ඉදිරිපත් කර තිබීමයි. මේ අතර කොළඹ නේවාසික මහල් නිවාස සඳහා වන වෙළෙඳපොළ ද දැන් සංතෘප්ත තත්වයකට පත්ව තිබේ.

කෙසේ වෙතත්, නාගරික සංවර්ධන අධිකාරිය විසින් “ශ්‍රී ලංකාවේ ආර්ථිකය සවිබල ගැන්වීම සඳහා” නොවැම්බර් 25 වැනි දින බත්තරමුල්ලේ ‘වෝටර්ස් එජ්’ හි දී තවත් ආයෝජන සංසදයක් පැවැත්වීමට නියමිතය.

එහිදී මිශ්‍ර සංවර්ධන ව්‍යාපෘති, මහල් නිවාස සංවර්ධනය, ආගන්තුක සත්කාර සහ නිවාඩු නිකේතන සංවර්ධනය, කාර්යාල සංකීර්ණ සංවර්ධනය, භාණ්ඩ මෙහෙයුම් මධ්‍යස්ථාන සංවර්ධනය සහ බහු-මහල් රථ ගාල් සංවර්ධනය යනාදිය සඳහා ඉදිරිපත් කර ඇති ප්‍රමුඛ පෙලේ දේපල මෙම වෙළඳ ප්‍රදර්ශනයට ඉදිරිපත් කිරීමට නියමිත බව වාර්තා වී ඇත.

මේ අතර මුදල් අමාත්‍ය බැසිල් රාජපක්ෂ පසුගිය සිකුරාදා 2022 වසර සඳහා වූ තම අය-වැය කතාව ඉදිරිපත් කරමින් ප්‍රකාශ කළේ සෘජු විදේශ ආයෝජන ආකර්ෂණය කර ගැනීම සඳහා දැනට පනවා ඇති කොන්දේසි ලිහිල් කළ යුතුද යන්න පිළිබඳව රජය සොයා බලන බවයි.

එහි දී ඔහු යෝජනා කළේ දුම්රිය දෙපාර්තමේන්තුව සතු ඉඩම් ද, මිශ්‍ර සංවර්ධන ව්‍යාපෘති සඳහා දේශීය හා ජාත්‍යන්තර මූලාශ්‍ර මගින් ආයෝජන ලබා ගැනීම සඳහා ඉදිරිපත් කිරීමට සලකා බැලිය යුතු බව යි.