රාජපක්ෂ පාලන සමයේ ශ්‍රී ලංකාවේ භූමිය විදේශ රට වලට විකුණා දැමු දේශප්‍රේමීන් යැයි කියා ගන්නා පුද්ගලයින් වත්මන් රජය ඉඩම් විකුණා දමන බවට සාවද්‍ය ප්‍රකාශ සිදු කරන බවට සුව ඇමැතිවරයා චෝදනා කරයි.
වත්මන් රජය කිසිදු ඉඩමක් විකුණා දමා නොමැති බව සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න 16 සෙනසුරාදා දිවයින පුරා ජාතික වශයෙන් ක්‍රියාත්මක වන ඉඩම් ලියාපදිංචි කිරීමේ කඩිනම් එක්දින සේවාව ආරම්භ කිරීමේ වැඩපිළිවෙලට සමගාමීව කළුතර දිස්ත්‍රීක් වැඩසටහනේ සමාරම්භ උත්සවයට එක්වෙමින් පැවසීය.
“අපේ රටේ යුධ හමුදා මූලස්ථානය පිහිටා තිබූ භූමිය හෝටල් සංකීර්ණයක් ඉදිකිරිම සදහා පසුගිය රජය විකුණා දැමුවා. රටක යුධ හමුදා මූලස්ථානයක් විකුණා දැමූ පළමු අවස්ථාව මෙයයි. අද විනවිට අපට යුධ හමුදා මූලස්ථානයක් නැහැ. තවම හදනවා.”
“යුධ හමුදා මූලස්ථානය විකුණා දැමූ දේශප්‍රේමීන් අද කෑ ගහනවා වත්මන් රජය ඉඩම් විකුණනවා කියලා. මම කියන්න කැමැතියි වත්මන් රජය කිසිදු ඉඩමක් විකුණා දමා නැහැ.” යි සුව ඇමැතිවරයා කියා සිටියේය.
පසුගිය රජය විසින් වරාය නගරය නිර්මාණ කිරීමට චීනයට සින්නකරව ලබා දී තිබු භූමියද යහපාලන රජය යටතේ ගිවිසුම වෙනස් කරමින් වසර 99 බදු ගිවිසුමකට යටත් කල බව ද අමාත්‍යවරයා සඳහන් කළේය.
ශ්‍රී ලංකාවට ඉඩම් පිළිබද ජාතික ප්‍රතිපත්තිය හඳුන්වා දෙනු ලැබුවේ තමන් ඉඩම් ඇමැති ධුරය දරන සමයේ බව ද අමාත්‍ය රාජිත සේනාරත්න වැඩි දුරටත් පැවසීය.
Facebook Comments
