ද නේෂන්’ පුවත්පතේ හිටපු නියෝජ්‍ය කර්තෘ කීත් නොයාර් පැහැරගෙන ගොස් පහරදීම සම්බන්ධයෙන් සැකපිට රහස් පොලිසිය විසින් අත්අඩංගුවට ගන්නා ලද ශ්‍රී ලංකා යුද හමුදාවේ ඉහල නිලධාරියකු ඇතුළු පස් දෙනකු හඳුනාගැනීමේ පෙරෙට්ටුව මාර්තු 3 දා පැවැත්වීමට ගල්කිස්ස අතිරේක මහේස්ත්‍රාත් නියෝග කල අතර ඒ සඳහා මාධ්‍යවේදී කීත් නොයාර් කැඳවා ගන්නා ලෙස මහේස්ත්‍රාත්වරිය අපරාධ පරීක්ෂණ දෙපාර්තමේන්තුවෙන් ඉල්ලා සිටියාය.
සිද්ධියට අදාළව අපරාධ පරීක්ෂණ දෙපාර්තමේන්තුව අත්අඩංගුවට ගෙන සිටින හමුදා සාමාජිකයින් තිදෙනෙකු ඊයේ (23) අධිකරණය හමුවට ඉදිරිපත් කළ අවස්ථාවේදී ගල්කිස්ස අතිරේක මහේස්ත්‍රාත් ලෝචනා අබේවික්‍රම වීරසිංහ මෙම නියෝගය නිකුත් කර ඇත.
හඳුනාගැනීමේ පෙරට්ටුව පැවැත්වෙන මාර්තු මස 03 දින මාධ්‍යවේදී කීත් නොයාර්ගේ පැමිණීම අනිවාර්ය බවද නැවත පෙරට්ටුවක් නොපවත්වන බවද මහේස්ත්‍රාත්වරිය දැනුම් දී තිබේ.
සැකකරුවන් හඳුනාගන්නා තෙක් පහරදීමට සැක කෙරෙන බුද්ධි අංශ නිලධාරීන් ගේ පුද්ගලික අනන්‍යතාව හෙළි නොකරන ලෙස මාධ්‍යවේදීන්ගෙන් අධිකරණය ඉල්ලීමක් කළේය.
කීත් නොයාර් 2008 මැයි මාසයේ පැහැරගෙන ගොස් දොම්පේ ප්‍රදේශයට ගෙනගොස් පහර දී තිබුණු අතර ඔහු සොයාගැනීමට සමීපතමයන් විසින් හිටපු ආරක්ෂක ලේකම් ගෝඨාභය රාජපක්ෂ ඇමතීමෙන් පසු එදිනම ජ්‍යෙෂ්ඨ මාධ්‍යවේදියා නිදහස් කර තිබුනි.
ද නේෂන්’ පුවත්පතේ හිටපු නියෝජ්‍ය කර්තෘ පැහැරගෙන ගොස් පහරදී ඇත්තේ රජයේ ආරක්ෂක අංශ සම්බන්ධයෙන් ඔහුට තොරතුරු ලබා දෙන්නේ කව්දැයි හෙළි කර ගැනීමට වන අතර සිද්ධියෙන් පසු ජීවිතාරක්ෂාව පතා කීත් නොයාර් විදේශ ගත විය.
Facebook Comments
