රජයේ මුදල් රුපියල් මිලියන 38ක් වැය කරමින් ඩී. ඒ. රාජපක්ෂ ස්මාරකය සහ කෞතුකාගාරය ඉදිකිරීම සම්බන්ධයෙන් ආරක්ෂක අමාත්‍යාංශයේ හිටපු ලේකම් නන්දසේන ගෝඨාභය රාජපක්ෂ ඇතුළු විත්තිකරුවන් හත්දෙනකුට එරෙහිව බස්නාහිර පළාත් විශේෂ ත්‍රිපුද්ගල මහාධිකරණය හමුවේ නීතිපතිවරයා අධිචෝදනා ගොනු කර තිබේ.
ඉඩම් ගොඩකිරීමේ හා සංවර්ධනය කිරීමේ මණ්ඩලය සතු මුදල් මේ ව්‍යාපෘතියට වැය කිරීම සම්බන්ධයෙන් විත්තිකරුවන්ට එරෙහිව 24 සිකුරාදා අධිචෝදනා ගොණු කල බව නීතිපති ජනාධිපති නීතිඥ ජයන්ත ජයසූරිය තහවුරු කල බව දිනමිණ පුවත්පත වාර්තා කරයි.
ගෝඨාභය රාජපක්ෂ ඉඩම් ගොඩකිරීමේ හා සංවර්ධනය කිරීමේ සංස්ථාවේ එවකට හිටපු සභාපති එල්. ප්‍රසාද් සිල්වා, සාමාන්‍යාධිකාරී බී. උදුලාවතී කමලදාස, අධ්‍යක්ෂක මණ්ඩල සාමාජිකයන් වන සුදම්මික ආටිගල, සමන් කුමාර ගලප්පත්ති, මහින්ද සාලිය, මල්ලිකා කුමාරි සේනාධීර අයවලුන්ට එරෙහිව මෙසේ අධිචෝදනා ගොනු කර ඇත.
සාපරාධී විශ්වාසය කඩකිරීම, කුමන්ත්‍රණය කිරීම, අනුබල දීම යනාදී චෝදනා හතක් සම්බන්ධව මොවුන්ට එරෙහිව අධිචෝදනා ගොණු කර තිබේ.
නීතිපතිවරයා විසින් නීතිමය අධ්‍යයනය සිදුකර පරීක්ෂණ කළ වාර්තා අගවිනිසුරු ප්‍රියසාත් ඩෙප් වෙතට ඉදිරිපත් කර ඇති අතර අගවිනිසුරුවරයා නීතිපතිවරයා වෙත ලබා දුන් නියමයට අනුවයි විත්තිකරුවන්ට එරෙහිව අධිචෝදනා ගොණු කර ඇත්තේ.
Facebook Comments
