කිසිදු බේදයකින් තොරව, සැමට නීතිය පොදුය, යන සංකල්පය ක්‍රීයාත්මක කිරීමට තම නිල කාලය තුළ කැපවන බව ජනාධිපති මෛත්‍රීපාල සිරිසේන අවධාරණය කරයි.
මූතුර් දිසා/මහේස්ත‍්‍රාත් අධිකරණ ගොඩනැගිල්ල ඊයේ (29) ජනතා අයිතියට කිරීමේ අවස්ථාවට එක්වෙමින් ජනාධිපතිවරයා මේ බව සඳහන් කළේය.
මේ රටේ හැට දෙලක්ෂ පනස්දහසකට වැඩි ජනතාවක් තමා ජනාධිපතිවරයා ලෙස පත් කර ගනිමින් අපේක්ෂා කළ ප‍්‍රධාන කරුණු අතර ස්වාධීන, අපක්ෂපාතී සහ මධ්‍යස්ථ නීති පද්ධතියක් රට තුළ ගොඩනැගීම ප‍්‍රමුඛ වූ බව මෙහිදී පැවසූ ජනාධිපතිතුමා ඒ සඳහා තමා උපරිමයෙන්ම බැදිසිටින බව ද කියා සිටියේය.
නීතියේ විසදුම් සොයා එන පොදු මහජනතාවට එම විසදුම් ලබා ගැනීමේදී සිදුවන ප‍්‍රමාදයන් සියලූදෙනාගේ කඩිනම් අවධානය යොමු විය යුතු කරුණක් බව මෙහිදී පැවසූ ජනාධිපතිතුමා එම ප‍්‍රමාදයන් වැළැක්වීම සඳහා රජය මඟින් ගතයුතු කි‍්‍රයාමාර්ග ඇතුළත් යෝජනා සහ නිර්දේශ රජයට ඉදිරිපත් කරන ලෙස තමා අගවිනිසුරුවරයා ඇතුළු නීති ක්ෂේත‍්‍රයේ සියලූදෙනාගෙන් විවෘත ඉල්ලීමක් සිදු කරන බව ද පැවසීය.
රටේ ප‍්‍රජාතන්ත‍්‍රවාදය, නිදහස සහ ජනතාවගේ මූලික අයිතිවාසිකම් ශක්තිමත් කිරීමට රජය සෑම විටම කටයුතු කරන බව පැවසූ ජනාධිපතිතුමා නව ආණ්ඩුක‍්‍රම ව්‍යවස්ථාව සම්පාදනය කරන්නේ ද එම කරුණුවලට මුල් තැන දෙමින් බව වැඩිදුරටත් මෙහිදී ප‍්‍රකාශ කළේය.
Facebook Comments
