වැලිකඩ බන්ධනාගාරයේ සිරකරුවන් මරා දැමීමට සැක පිට බන්ධනාගාර ගත කර සිටි පොලිස් පරීක්ෂක නියෝමාල් රංගජීව සහ එමිල් රන්ජන් ළමාහේවා බන්ධනාගාරය තුල ඉහළ සැලකුම් ලබමින් සිටින බවට බන්ධනාගාර රැඳැවියන්ගේ අයිතිවාසිකම් සුරැකීමේ කමිටුව චෝදනා කරයි.
සැකකරුවන් දෙදෙනා බන්ධානාගාර රෝහලේ රිමාන්ඩ් කරන ලෙසට අධිකරණයට නියෝග කර තිබුණද ඔවුන් දෙදෙනා රැඳී සිටින්නේ බන්ධනාගාර නිලධාරින්ගේ විවේකාගාර වල බවටයි සංගමයේ ලේකම් මෙන්ම වැලිකඩ බන්ධනාගාරයේ සිරකරුවන් ඝාතනයේ ඇසින් දුටු ප්‍රධාන සාක්ෂිකරුවකු වන සුදේෂ් නන්දිමාල් සිලෝන් නිවුස් හා කියා සිටියේ.
“අපිට තොරතුරු ලැබිල තියෙනවා බන්ධනාගාර රෝහලේ ඉන්න ඕන ඒ දෙන්නා ඉන්න‍ෙ බන්ධනාගාර නිලධාරින්ගේ සුපිරි රෙස්ට් රූම් වල කියල, රෑ වෙද්දි එමිල් රන්ජන් ගෙදර ගිහින් පාන්දර ආයේ බන්ධනාගාරයට එන්නෙ. රංගජීවත් රෑට ඉන්නේ එමිල් රන්ජන්ගෙ ගෙදර,” යි සුදේෂ් නන්දිමාල් සිලෝන් නිවුස් අමතමින් පැවසීය.
2012 වසරේදි වැලිකඩ බන්ධනාගාරයේදී විසි හත් දෙනකු ඝාතනය කිරිමට සැක පිට රහස් පොලිසය විසින් අත්අඩංගුවට ගත් පොලිස් පරීක්ෂක නියෝමාල් රංගජීව සහ එවකට බන්ධනාගාර කොමසාරිස්ව කටයුතු කළ එමිල් රන්ජන් ළමාහේවා අප්‍රේල් 10 වැනිදා තෙක් රක්ෂිත බන්ධනාගාර ගත කරන ලෙස 29 සිකුරාදා කොළඹ මහේස්ත්‍රාත් අධිකරණය නියෝග කළේය.
Facebook Comments
