දිලීපන් සමරුව තහනම් කිරීමට ගත් තවත් තැතක් වරදී

දෙමළ විමුක්ති අරගලය වෙනුවෙන් තිලීපන් සිදු කළ ජීවිත පරිත්‍යාගය අනුස්මරණය කිරීම වෙනුවෙන් ගමන් ගන්නා සාමකාමී රථ පෙළපාලිය තහනම් කරමින් අතුරු තහනම් නියෝගයක් නිකුත් කරන ඉල්ලා මුලතිව් පොලිසිය විසින් ගොනු කළ පෙත්සමක් අධිකරණය විසින් ප්‍රතික්ෂේප කර තිබේ.

අපරාධ නඩු විධාන සංග්‍රහයේ 106 (1) වගන්තිය යටතේ පොලිසිය මෙම පෙත්සම ගොනු කර ඇත්තේ එම රථ පෙළපාලිය මඟින් සාමයට තර්ජනයක් ඇති වන අතර, එමගින් ජාතීන් අතර අසමගිය වර්ධනය වනවා මෙන්ම, එවැනි අනුස්මරණයක් දිරිමත් කිරීම එල්.ටී.ටී.ඊ.ය නැවත පණ ගැන්වීමට හිතකර වාතාවරණයක් ඇති කරන බව පවසමිනි.

පොලිසිය ඉදිරිපත් කළ සියලු කරුණු ප්‍රතික්ෂේප කරමින් 2023 සැප්තැම්බර් 19 වැනි දින මුලතිව් මහේස්ත්‍රාත්වරයා ප්‍රකාශ කර ඇත්තේ , තිලීපන් මාරාන්තික උපවාසක නිරත වූ සාමකාමී උද්ඝෝෂකයෙකු බව කවුරුත් දන්නා අතර, ඔහුව සාමකාමීව අනුස්මරණය කිරීම මඟින් සාමයට සහ සංහිඳියාවට බාධාවක් වන ආකාරය ඔප්පු කිරීමට පොලිසිය අපොහොසත් වූ බවයි.

තිලීපන්හට දෙමළ ජනතාවගේ හදවත් තුළ සුවිශේෂී වූ තැනක් තිබීමත්, ඔහු දිවි පිදූවෙකු ලෙස සලකනු ලැබීමත් හේතුවෙන්, ඔහුව සැමරීම ඔවුන්ගේ අයිතියක් බව අධිකරණය වැඩිදුරටත් පිළිගෙන ඇත.

අනෙක් අතට, එවැනි අනුස්මරණයක් තහනම් කිරීමම මහජනතාව අතර සාමය කඩ වීමට හේතු විය හැකි වනවා මෙන්ම, පුද්ගල අයිතිවාසිකම් සහ නිදහස ප්‍රතික්ෂේප කිරීමකට සමාන වන බවද අධිකරණය ප්‍රකාශ කළ බවයි පළාත් බද වාර්තාකරුවන් වැඩි දුරටත් පවසන්නේ.

අනුස්මරණ කටයුතුවලට සම්බන්ධ පුද්ගලයන් යම්කිසි නීති කඩ කිරීමක් සිදු කළහොත්, ඒ සම්බන්ධයෙන් පියවර ගැනීමට අපරාධ නඩු විධාන සංග්‍රහයේ 120 සහ 185 වගන්ති, පොලිස් ආඥාපනත, ICCPR පනතේ 3 (1) සහ (2) වගන්ති, ත්‍රස්තවාදය වැලැක්වීමේ පනත සහ මෝටර් රථ ප්‍රවාහන පනත් වලට අදාල විධිවිධාන පවතින බව පෙන්වා දුන් අධිකරණය, හිස් වාරණ නියෝගයක් අනවශ්‍ය බව ප්‍රකාශ කර තිබේ.

අවසානයේ දී තිලීපන් අනුස්මරණය කිරීමට දෙමළ ජනතාවට ඇති අයිතිය යළි තහවුරු කළ අධිකරණය විසින් පොලීසිය විසින් ඉදිරිපත් කළ පෙත්සම නිෂ්ප්‍රභ කර ඇත.

සිංහල හමුදා කඳවුරු දෙමළ පළාත් වලින් ඉවත් කර ගත යුතුයි, දෙමළ ජනතාවගේ පළාත්වල තාවකාලික දෙමළ ආණ්ඩුවක් පිහිටුවන තෙක් පුනරුත්ථාපන වැඩ තාවකාලිකව අත්හිටවිය යුතුයි, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්විය යුතුයි, දෙමළ පළාත්වල සිංහල පොලිස් ස්ථාන පිහිටුවීම නතර කළ යුතුයි, ත්‍රස්තවාදය වැලැක්වීමේ පනත යටතේ පොලිස් ආරක්ෂක මූලස්ථාන වල සිටින දේශපාලන රැඳවුම්කරුවන් වහා නිදහස් කළ යුතුයි ආදී ඉල්ලිම් ඉදිරිපත් කරමින් 1987 සැප්තැම්බර් 15 වනදා එල්.ටී.ටී.ඊ සංවිධානයේ රාසයියා පාර්තිපන් උපවාසයක් ආරම්භ කළේය.

යාපනය විශ්ව විද්‍යාලය ඉදිරිපිට ඉන්දීය හමුදාවට එරෙහිව මාරාන්තික උපවාසයේ යෙදී සිටියදී දිලීපන් මිය ගියේ 1987 සැප්තැම්බර් 26 වෙනිදා ය.

ඔහුගේ 36 වැනි වාර්ෂික අනුස්මරණට සමගාමීව සැප්තැම්බර් 15 වැනිදා දෙමළ ජාතික ජනතා පෙරමුණ පොතුවිල් වලින් ආරම්භ කළ රථ පෙළපාලිය නැගෙනහිර පළාත ඔස්සේ වන්නියට පැමිණ යාපනය නල්ලුර් කන්දසාමි කෝවිල අසල ඉදිකර තිබී 2010 දී රජයේ ආරක්ෂක අංශ විසින් කඩා බිඳ දමන ලද තිලීපන්ගේ ස්මාරකය දක්වා ගමන් කිරීමින් සිටි.