ස්මාර්ට් හැඳුනුම්පත නිකුත් කරයි

පැරණි හැඳුනුම්පත වෙනුවට නවීන තාක්ෂණයෙන් සුහුරු කාඩ්පතක (SMART Card)නව ජාතික හැඳුනුම්පත නිකුත් කිරීම ආරම්භ කෙරේ.

ඒ අනුව නව ජාතික හැඳුනුම්පත ඉලක්කම් 12කින් යුතු අංකයකින් මෙන් ම ජාත්‍යන්තර සිවිල් ගුවන් සේවා සංවිධානයේ ( International Civil Aviation Organisation – ICAO) ප්‍රමිතයෙන් යුතු ඡායාරූපයකින් සහ යන්ත්‍රානුසාරයෙන් කියවිය හැකි තීරු සංකේත (Barcode) ක්‍රමයකින් සමන්විත වනු ඇති බව රජය පවසයි.

නම, උපන් ස්ථානය, ලිපිනය හා ස්ත්‍රී පුරුෂ භාවය යන තොරතුරු භාෂාත්‍රයෙන් ම මුද්‍රිතව දැක්වෙන අතර හැඳුනුම්පත්ලාභියාගේ අත්සන ද නව හැඳුනුම්පතට ඇතුළත් කිරීමට කටයුතු කොට ඇත.

මෙම සුහුරු කාඩ්පත ජාත්‍යන්තරව පිළිගත් හැඳුනුම්පත් සඳහා වන ප්‍රමිතියට අනුකූල වන අතර, එමගින් මහජනතාවට ඉතා පහසුවෙන් හා කඩිනමින් තම සේවා අවශ්‍යතා ඉටු කරගැනීමේ හැකියාව පවතින බවට රජය විශ්වාසය පල කරයි.

මෙම කාඩ්පත හඳුන්වාදීමත් සමඟ මෙතෙක් පැවැති හැඳුනුම්පත අවලංගු නොවන අතර 27 සිකුරාද සිට පුද්ගලයන් ලියාපදිංචි කිරීමේ දෙපාර්තමේන්තුව වෙත යොමු කරන ඉල්ලුම්පත් සඳහා පමණක් සුහුරු කාඩ්පත ලබාදීමට කටයුතු කරන බව රජය දැනුම් දෙයි.