පාර්ලිමේන්තු මන්ත්‍රී බන්දුල ගුණවර්ධන පාර්ලිමේන්තුවේදී ප්‍රශ්න කළ ආකාරයට මද්‍යසාරවල යෙදවුමක් ලෙස සහල් භාවිත කිරීමට වත්මන් රජය විසින් කිසිදු අනුමැතියක් ලබා දී නොමැති අතර ස්ප්‍රීතු නිෂ්පාදනය සඳහා සහල් යෙදවීමට 2006 වසරේ සිට අනුමැතිය ලබා දී ඇත්තේ රාජපක්ෂ පාලනය විසින් බව මුදල් අමාත්‍යංශය පවසයි.
මෙරට මධ්‍යසාර නිෂ්පාදනය සඳහා අවශ්‍ය ස්ප්‍රීතු නිෂ්පාදනය කරන කිසිදු ස්කාගාරයකට සහල් යොදවා ස්ප්‍රීතු නිෂ්පාදනය කිරීමට යහපාලන රජය විසින් කිසිදු අනුමැතියක් ලබා දී නොමැති බව 05 අඟහරුවාද මුදල් හා ජනමාධ්‍ය අමාත්‍යාංශය නිවේදනයක් නිකුත් කරමින් කියා සිටියේය.
එහෙත් 2006 වසරේ පැවැති රජය විසින් මධ්‍යසාර නිපදවීම සඳහා සහල් යෙදාගැනීමට අනුමැතිය දී තිබූ බව ද එම අමාත්‍යංශය මඟින් නිකුත් කළ නිවේදනයේ සඳහන් වේ.
ශ්‍රී ලංකාවේ දැනට ස්කාගාර 14 ක් පවතින අතර ඒවායෙහි ස්ප්‍රීතු නිෂ්පාදනය කිරීම සඳහා රා, තල් රා, මොලාෂස්, බඩ ඉරිගු හා පළතුරු ආදිය උපයෝගී කරගනු ලබයි.
ස්ප්‍රීතු නිෂ්පාදනය සඳහා සහල් අමුද්‍රව්‍යයක් ලෙස භාවිත කිරීමට එක් ආයතනයකට පමණක් එවකට බලයේ සිටි රජය විසින් 2006 වර්ෂයේදී අනුමැතිය ලබා දී ඇති බව පවසන මුදල් හා ජනමාධ්‍ය අමාත්‍යාංශය මෑතදී සහල් අමුද්‍රව්‍ය ලෙස යොදාගැනීමට අමතරව බඩ ඉරිගු යොදා ගැනීම සඳහා එම ආයතනයට අනුමැතිය ලබා දෙන ලද බව කියා සිටී.
2018 අයවැය මගින් එතනෝල් නිෂ්පාදනය සඳහා භාවිත කරන අමුද්‍රව්‍ය වලට එහි සුරා බදු අනුපාතය අනුව බදු අය කිරීමට යෝජනා කල බැවින් 2017 නොවැම්බර් මස 09 වන දින සුරා බදු ආඥා පනත යටතේ නිකුත් කරන ලද විශේෂ ගැසට් නිවේදනය මගින් ස්ප්‍රීතු නිෂ්පාදනය සඳහා යොදා ගනු ලබන, දැනට අනුමත කර ඇති අමුද්‍රව්‍ය සඳහා ලීටරයකට රුපියල් 5 සිට රුපියල් 10 දක්වා බද්දක් නියම කර ඇති බව වැඩි දුරටත් නිවේදනය කරයි.
Facebook Comments
