වර්ගවාදී ආගම්වාදී වෛරී ප‍්‍රකාශ පැතිරී යාම නියාමනය කිරීම සඳහා ක‍්‍රමවේද සහ ආයතනික ව්‍යුවහයන් ස්ථාපනය කිරීම සඳහා ෆේස්බුක් බලධාරීන් එකඟ වීම නිසාවෙන් ජනාධිපතිවරයාගේ උපදෙස් මත ෆේස්බුක් වෙබ් අඩවිය වෙත පිවිසීමට තිබූ අවහිරය ඉවත් කල බව රජය නිවේදනය කරයි.
ජනාධිපති ලේකම් ඔස්ටින් ප‍්‍රනාන්දු සහ ෆේස්බුක් නිලධාරීන් අතර 15 බ්‍රහස්පතින්දා පැවති සාකච්ඡාවේ තීරණ සහ එකඟතා ජනාධිපතිවරයාට දැනුම් දුන් පසු ජනපති ෆේස්බුක් මුදා හැරීමට නියෝග කල බවයි ජනාධිපති මාධ්‍ය අංශය නිවේදනය කරන්නේ.
පසුගිය දිනවලදී ජාතික සමගියට සහ මහජන ආරක්ෂාවට බාධා වන අයුරින් පැතිර ගිය කලහකාරී සිදුවීම් පැතිර යාම වැළැක්වීම පිණිස ඇතැම් සමාජ මාධ්‍ය ජාලා වෙත පිවිසීම තාවකාලිකව අවහිර කිරීමට රජය කටයතු කළේය.
ෆේස්බුක් එකඟතා
ෆේස්බුක් සමාජ ජාලයේ නියෝජිතයින් සමග පැවති සාකච්ඡාවේදී සමාජ මාධ්‍ය ජාලය අවභාවිත කරමින් ජාතිවාදය,වර්ගවාදය, ආගම්වාදය පතුරුවා හරිමින් ජන ජීවිතය අඩාල කිරීම සහ මහජන ආරක්ෂාව කඩාකප්පල් කිරීම සඳහා ඇතැම් කලහකාරී හා අන්තවාදී පිරිස් විසින් සමාජ මාධ්‍ය ජාල අවභාවිත කිරීම පිළිබඳ දැඩි අවධානය යොමුවු බවයි රජය පවසන්නේ.
රජය, සිවිල් වැසියන් හෝ අපරාධ පරීක්ෂණ ආයතනයන් විසින් කෙරෙන කරුණු දැක්වීම් පිළිබඳව කඩිනමින් ප‍්‍රතිචාර දැක්වීමට හා ක‍්‍රියා කිරීමට ෆේස්බුක් බලධාරින් එකඟ වී ඇති බවයි ජනපති මාධය අංශය නිවේදනය කරන්නේ.
ෆේස්බුක් සමාජ වෙබ් අඩවිය භාවිතා කරමින් වෛරී ප‍්‍රකාශ පතුරුවා හැරීම ශ‍්‍රී ලංකා නීතිය යටතේ වරදක් වන අතර එවන් කාර්යයන්හි නිරත වන ඕනෑම කෙනෙකු පිළිබඳව ෆේස්බුක් හි ප‍්‍රජා සම්මතයන් අනුව කටයුතු කිරීමට එම සමාගම එකඟ වී තිබේ.
මෙම එකඟතා පිළිබඳව ප‍්‍රගති සමාලෝචනයක් නියමිත කාල නියමයන් තුළ දෙපාර්ශවය අතර සමාලෝචනය කිරීමටත් ඒ අනුව වඩාත් කාර්යක්ෂම සහ ඵලදායී පියවර සැලසුම් සහගතව අනාගතයේදී ක‍්‍රියාත්මක කිරිමටත් දෙපාර්ශවය එකඟත්වය පල කර ඇත.
මෙම තාවකාලික සමාජ මාධ්‍ය අවහිරය හේතුවෙන් සමාජ මාධ්‍ය ජාල භාවිතා කරන ප‍්‍රජාවට සිදු වූ අපහසුතාව පිළිබඳව රජය කණගාටුව පළ කරන බවයි ජනාධිපති මාධ්‍ය අංශය වැඩි දුරටත් නිවේදනය කර සිටී.
Facebook Comments
