පුරුෂයකුගේ හෝ කාන්තාවකගේ වඳබව හෝ මඳසරු බව ඇති කළ හැකි කිසිදු පෙත්තක් දැනට ලෝකයේ නැතැයි දිවයිනේ ජ්‍යේෂ්ඨ විශේෂඥ වෛද්‍යවරුන් කණ්ඩායමක් ප්‍රකාශ කරති.
එසේම කිසියම් ජන කණ්ඩායමක් හෝ ජන වර්ගයක සරු බවට සැළකිය යුතු බලපෑමක් ඇති කළ හැකි ඖෂධ බටහිර වෛද්‍ය විද්‍යාවේ නොමැති අතර එසේ කළ බවට කිසිදු විද්‍යාත්මක සාක්ෂියක්ද නෙහැකි බවද ඔවුන් අවධාරණය කර සිටියේ 15 බ්‍රහස්පතින්දා කොළඹ, ශ්‍රී ලංකා වෛද්‍ය සංගම් ශ්‍රවණාගාරයේ පැවති මාධ්‍ය සාකච්ඡාවකදී ය.
බටහිර වෛද්‍ය විද්‍යාවේ මූල ධර්ම අනුව මඳසරුභාවය හෙවත් වඳ බව ඇති කරන පෙත්තක් නිපදවිය නොහැකි බව කායික විශේෂඥ වෛද්‍ය උපුල් දිසානායක මාධ්‍ය හමුවට එක්වෙමින් කියා සිටියේය.
වඳ බව ඇති කළ හැකි ඖෂධ නිපදවීම බටහිර වෛද්‍ය විද්‍යාවේ නොයෙකුත් පර්යේෂණ සිදු කොට ඇති නමුත් ඒවා අසාර්ථක වී ඇති අතර දැනට නිපදවා ඇත්තේ තාවකාලික ගැබ් තැනීම වළක්වන උපත් පාලන පෙති පමණකි.
එම පෙති නොකඩවා පාවිච්චි කළ යුතු අතර අතර මගදී පෙති ගැනීමෙන් එක් පෙත්තක් හෝ මග හැරුනොත් පිළිසිද ගැනීමේ ඉඩ ඇති බවයි වෛද්‍ය උපුල් දිසානායක පෙන්වා දෙන්නේ.
එබැවින් නිසරු බව ඇති කළ හැකි වඳ පෙති තිබෙන බවට පළ වී ඇති මිත්‍යා මත සියලුම වෛද්‍යවරුන් විසින් ප්‍රතික්ෂේප කරන බවද වෛද්‍යවරයා ප්‍රකාශ කළේය.
”අපි ශ්‍රී ලංකාවෙහි සෞඛ්‍ය සේවයෙහි නියුතු ජ්‍යෙෂ්ඨ වෛද්‍යවරු පිරිසක් වෙමු. ආහාර සමඟ වඳ පෙති මිශ්‍ර කිරිමෙන් වඳ භාවය ඇති කළ හැකි බවට අනියත බියක් සමාජය තුළ ඇතිව තිබෙන හෙයින් එ ගැන සත්‍ය තත්වය පැහැදිළි කිරීම අපේ යුතුකමක් බව අපි සිතමු. මේ මතය විද්‍යාත්මක වශයෙන් කිසිදු පදනමක් නැති අසත්‍ය ප්‍රකාශයක් බව අපි වගකීමෙන් ප්‍රකාශ කර සිටිමු. ඖෂධ පෙති, කුඩු හෝ එන්නත් මඟින් කණ්ඩායමක් හෝ ජනවර්ගයක් වඳ බවට පත් කිරීම ප්‍රායෝගිකව කෙසේවත් කළ නොහැකි බවද අවධාරණය කරමු.” යි විශේෂඥ වෛද්‍යවරුන් සහ වෛද්‍යවරුන් 143 දෙනෙකු විසින් මේ පිළිබඳව නිකුත් කරන ලද ප්‍රකාශයක සඳහන් වේ.
ඇතැම් රෝගවලට දීර්ඝකාලීනව භාවිතා කරන ඖෂධ හේතුවෙන් මඳසරු බව ඇති වීමට ඉඩක් තිබුණ ද එම ඖෂධ තනි මාත්‍රවක් හෝ මාත්‍රා කීපයක් පාවිච්චියෙන් එවන් තත්ත්වයක් ඇතිවීමට කිසිදු ඉඩක් නැති බව ද මාධ්‍ය සාකච්ඡාවට සහය පල කරමින් නිකුත් කල නිවේදනයේ දැක්වේ.
කායික රෝග විශේෂඥ වෛද්‍ය අනුලා විජේසුන්දර, ප්‍රසව හා නාරිවේද විශේෂඥ වෛද්‍ය ලක්ෂ්මන් සේනානායක, ප්‍රජනන වෛද්‍ය විද්‍යාව පිළිබඳව මහාචාර්ය චන්ද්‍රකා විජේරත්න, රක්තවේද හා පුනරුත්ථාපන විශේෂඥ වෛද්‍ය ලලිත් විජේරත්න, විශේෂඥ වෛද්‍ය හා ජ්‍යෙෂ්ඨ කථිකාචාර්ය පණ්ඩුක කරුණානයක, ළමා රෝග විශේෂඥ වෛද්‍ය ලක් කුමාර් ප්‍රනාන්දු, ප්‍රසව හා නාරි විශේෂඥ වෛද්‍ය යු. ඩී. පී. රත්නසිරි, ඖෂධ විද්‍යාව පිළබද මහාචාර්ය චාන්දනී වනිගතුංග, ළමා රෝග විශේෂඡ වෛද්‍ය හා ඖෂධ විද්‍යාව පිළිබඳ මහාචාර්ය ශලිනි ශ්‍රී රංගනාදන්, කායික රෝග විශේෂඥ වෛද්‍ය ප්‍රියංකර ජයවර්ධන, හෘද රෝග විශේෂඥ වෛද්‍ය නියොමලී අමරසේන සහා මහාචාර්ය රවින්ද්‍ර ප්‍රනාන්දු, ප්‍රජාවෛද්‍ය විශේෂඥ ජානකී විදානපතිරණ මාධ්‍ය හමුවට එක්වන ලදි.
Facebook Comments
