කරුණු නොදක්වා දෙවතාවක්ම අධිකරණය මග හැරි අපරාධ චෝදනා ලබා සිටින ශ්‍රී ලංකා නාවික හමුදාවේ ඉහලම තනතුරු හිමි ප්‍රධානියා ජනාධිපති කොමිසම හමුවට පැමිණ තිබේ.
කෙළඹ ඇතුළු තදාසන්න ප්‍රදේශ වලින් 11 දෙනකු පැහැරගෙන ගොස් අතුරුදහන් කිරීමේ චෝදනා යටතේ කොළඹ ත්‍රිපුද්ගල මහාධිකරණයේ ගොනු කර ඇති නඩුව මග හැර සිටින හිටපු නාවික හමුදාපති වසන්ත කරන්නාගොඩ එම චෝදනා වලට එරෙහිව දේශපාලන පලිගැනිම් පිළිබඳ සෙවීමේ ජනාධිපති පරීක්ෂණ කොමිශන් සභාව වෙත කරන ලද පැමිණිල්ලේ කැඳවීමට අනුව 11 අඟහරුවාදා කොමිසම හමුවට පැමිණ ඇත.
ඔහුට එරෙහිව ගොනු කර ඇති එම නඩුව පසුගිය රජය විසින් පලිගැනිමේ අරමුණින් ගොනු කරන ලද බවටයි මෛත්‍රීපාල සිරිසේන හිටපු ජනපතිවරයා විසින් අද්මිරාල් ඔෆ් ද ෆ්ලීට් ධුරයට ඔසවා තබන ලද හිටපු නැව්පති වසන්ත කරන්නාගොඩ පැමිණිලි කර ඇත්තේ.
මෙම නඩුව දේශපාලන පලිගැනීමක් බව පවසමින් නැවත දැනුම් දෙන තුරු නඩු කටයුත්ත නවතා දමන ලෙසට දේශපාලන පළිගැනීම් පිළිබඳව පරීක්‍ෂා කොට කොට තොරතුරු ලබාගැනීම සඳහා පත් කළ ජනාධිපති පරීක්ෂණ කොමිසම දෙන ලද නියෝගය නීතිපතිවරයා විසින් ප්‍රතික්ෂේප කරන ලදී.
කොමිසන් සභාව විසින් දුන් ලිඛිත නියෝගයට පෙරළා පිළිතුරු යවා ඇති නීතිපති දප්පුල ලිවේරා අධිකරණයේ විභාග වන නඩු කටයුත්තක් සම්බන්ධව නිර්දේශ හෝ නියෝග ලබා දීමට පරීක්ෂණ කොමිසන් සභාවකට බලයක් නොමැති බව දන්වා තිබුනි.
හිටපු නාවික හමුදාපති වසන්ත කරන්නාගොඩ හට සිතාසි ලබා දීමට ගන්නා ලද උත්සාහය ව්‍යර්ථ වී ගියේ ඔහු සොයා ගැනීමට නොහැකි වු නිසාවෙන් බව ජනාධිපතිවරයා යටතේ ඇති පොලිසිය හා රහස් පොලිසිය අධිකරණය හමුවේ ප්‍රකාශ කළේය.
කෙසේ වෙතත් චුදිත නාවික හමුදාපතිවරයා 72 වන රාජ්‍ය නිදහස් දින උත්සවයේදී නීතිපති දප්පුල ලිවේරා සමඟ එක පෙලට අසුන් ගෙන සිටිනු දක්නට ලැබීය.
දෙවතාවක්ම අධිකරණ නියෝග වලට අවනත නොවී උසාවිය මග හරින ලද හිටපු නැව්පතිවරයා හට වැඩ බලන පොලිස්පතිවරයා හා නාවික හමුදාපතිවරයා මාර්ගයෙන් තුන් වන වතාවට සිතාසි යොමු කරන ලෙස පසුගිය දා කොළඹ ත්‍රිපුද්ගල මහාධිකරණය නියෝග කර තිබුනි.
Facebook Comments
