රජයේ බලධාරීන්ගේ නියෝග පවා නොතකා හරිමින්, වන්නියේ දෙමළ ජනතාවගේ කෘෂිකාර්මික භුමියක් වසර ගණනාවක් තිස්සේ බලහත්කාරයෙන් අත්පත්කරගෙන සිටින බවට සිවිල් ආරක්ෂක දෙපාර්තමේන්තුවට චෝදනා එල්ල වී තිබේ.
පළාත්බද වාර්තාකරුවන් පවසන්නේ මුලතිව්, උඩයාර්කට්ටු දකුණ ප්‍රදේශයේ දෙමළ ගොවීන් හතර දෙනෙකුට අයත් අක්කර දොළහක භුමියක් බලහත්කාරයෙන් අල්ලාගෙන සිටින සිවිල් ආරක්ෂක දෙපාර්තමේන්තුවේ භටයන් එහි වගා කටයුතු සිදු කර ඇති බවයි.
උතුරේ දියත් වු යුද්ධයේ අවසන් මොහොතේ දරුණු සටන් ඇවිලීමත් සමග මුලතිව්, උඩයාර්කට්ටු දකුණ ප්‍රදේශයේ ජනයා සිය භුමියෙන් ඉවත් වී තිබෙන අතර යුද්ධය නිමාවීමෙන් පසු 2010 වසරේ යළි ගම් බිම් වෙත පැමිණ පදිංචි වී තිබේ.
සිවිල් ආරක්ෂක දෙපාර්තමේන්තුව අත්පත්කරගෙන සිටින භුමියේ හිමිකරුවන් පවසන්නේ සෙසු ගම් වැසියන්ගේ ඉඩම් රජයේ ආරක්ෂක අංශ විසින් නිදහස් කළද තමන්ට අයත් අක්කර දොළහක භුමිය මේ තාක් නිදහස් කර නොමැති බවයි.
බලහත්කාරයෙන් අල්ලාගෙන සිටින දෙමළ පවුල් හතරකට අයත් භුමිය නිදහස් කරන ලෙස අවස්ථා කිහිපයකදීම උතුරු පළාත් ආණ්ඩුකාර, මුලතිව් දිස්ත්‍රික් ලේකම්, පුදුකුඩ්ඉරිප්පු ප්‍රාදේශිය ලේකම්, ඉඩම් කොමසාරිස් ජෙනරාල්, ශ්‍රී ලංකා මානව හිමිකම් කොමිෂන් සභාව ආදී ආයතන විසින් සිවිල් ආරක්ෂක දෙපාර්තමේන්තුවට ලිඛිතව දැනුම් දී ඇති නමුත් එම භුමිය නිදහස් කිරීමට ඔවුන් කටයුතු කර නොමැති බවයි එම භුමියේ උරුමකරුවන් වැඩි දුරටත් පවසන්නේ.
1976 වසරේ සිට එම භුමිය සිය වගා කටයුතු සදහා භාවිත කළ බව පවසන ඔවුන් පෙන්වා දෙන්නේ ඉඩමේ හිමිකාරීත්වය සම්බන්ධයෙන් වන ලියකියවිලිද තමන් සතු බවයි.
2023 අප්‍රේල් 17 වැනිදා පුදුකුඩිඉරිප්පු ප්‍රාදේශිය ලේකම් එස්.ජෙයකාන්තන් එම භුමිය නැවත එහි අයිතිකරුවන්ට බාර දෙන ලෙස වල්ලිපුරම් පිහිටි සිවිල් ආරක්ෂක දෙපාර්තමේන්තුවවේ අණ දෙන නිලධාරියාට යළිත් වරක් ලිඛිතව දැනුම් දී තිබේ.
ඒ සම්බන්ධයෙන් කිසිදු ප්‍රතිචාරයක් නොලැබීම නිසා තමන් මුහුණ දී සිටින ගැටළුව සම්බන්ධයෙන් දෙමළ ජාතික ජනතා පෙරමුණ දැනුවත් කිරීමට පියවර ගත් බවයි ඉඩමේ හිමිකරුවන් පවසන්නේ.
දෙමළ ජාතික ජනතා පෙරමුණේ නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් හා දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් යන දෙදෙනා අප්‍රේල් 20 වැනි බ්‍රහස්පතින්දා ඒ සම්බන්ධයෙන් සොයා බැලීමට උඩයාර්කට්ටු දකුණ ප්‍රදේශයට පැමිණි බව පළාත් බද වාර්තාකරුවෝ පවසති.
ගජේන්ද්‍ර කුමාර් පොන්නම්බලම් මන්ත්‍රීවරයා එහිදී අවධාරණය කර ඇත්තේ එම භුමිය නිදහස් කිරීම සදහා සිවිල් ආරක්ෂක දෙපාර්තමේන්තුවට යම් කාලයක් ලබා දෙන අතර ඔවුන් එයට යහපත් ප්‍රතිචාරයක් නොදක්වන්නේනම් එම භුමිය නිදහස් කරගැනීම වෙනුවෙන් ජනතාව සමග එක්ව කටයුතු කිරීමට සුදානම් බවයි.
සිවිල් ආරක්ෂක දෙපාර්තමේන්තුවට අමතරව ආරක්ෂක අමාත්‍යංශය, මහවැලි අධිකාරිය, සංචාරක මණ්ඩලය, පුරාවිද්‍යා දෙපාර්තමේන්තුව, වන සංරක්ෂණ හා වනජීවි දෙපාර්තමේන්තුව උතුරු නැගෙනහිර දෙමළ ජනයාගේ වටිනාකමකින් යුත් ඉඩම් බලහත්කාරයෙන් අත්පත්කරගන්නා බවට දිගින් දිගටම චෝදනාවට ලක්ව සිටී.
Facebook Comments
