PTA සිරකරුවන්ට නිදහස දෙන බවට ජනපති දෙමළ පක්ෂයකට සහතික වෙයි

0

ත්‍රස්තවාදය වැළක්වීමේ පනත යටතේ දඩුවම් ලබා සිරගතව සිටින දෙමළ දේශපාලන සිරකරුවන් නිදහස් කරන බවට ජනාධිපතිවරයා දෙමළ දේශපාලන පක්ෂයකට පොරොන්දු වී තිබේ.

තම සංවිධානයේ නියෝජිතයන් ජනාධිපති රනිල් වික්‍රමසිංහ හදිසියේ හමුවී පැවති සාකච්ජාවකින් අනතුරුව මෙම පොරොන්දුව දුන් බව දෙමළ ඊළාම් විමුක්ති සංවිධානයේ (TELO) මාධ්‍ය ප්‍රකාශක සුරේන්ද්‍ර ගුරුසාමි පවසයි.

“දඩුවම් ලබා සිටින දෙමළ දේශපාලන සිරකරුවන් 24 වහාම නිදහස් කරන බවත්, රඳවා තබාගෙන සිටින 22 දෙදෙනාට එරෙහිව කිසියම් පැමිණිලි තිබේද, නැද්ද යන්න ගැන සොයා බලා ජනාධිපති කොමිසමේ නිර්දේශ අනුව ඔවුන්ව නිදහස් කරන බවට ජනාධිපති පොරොන්දු වුණා.“

පොරොන්දුව දී ඇත්තේ ශ්‍රී ලංකා රජයේ මානව හිමිකම් චර්යාව පිළිබඳව විශේෂ වාර්තාවක් විවාදයට ගැනීමට නියමිත එක්සත් ජාතීන්ගේ මානව හිමිකම් මණ්ඩලයේ 51 වැනි සැසිවාරය ජිනීවා නුවරදී මුළු දීමට දින කීපයක් තිබියදීය.

ත්‍රස්තවාදය වැළැක්වීමේ පනත හා හදිසි නීති රෙගුලාසි යටතේ අත්අඩංගුවට ගෙන වසර 10 සිට 26 දක්වා කාලයක් විවිධ බන්ධනාගාර වල සිරගත කර සිටින දෙමළ දේශපාලන සිරකරුවන් 46 දෙනකු නිදහස් කරන මෙන් `හඬක් නැතියවුන්ගේ හඬ` සංවිධානයේ කැඳවුම්කරු මුරුගයියා කෝමගන් විසින් අගෝස්තු 3 වැනිදා නිකුත් කර ඇති නිවේදනය ගැනත් ටෙලෝ නියෝජිත පිරිස ජනාධිපතිවරයාගේ අවධානය යොමු කර ඇත.

ජනාධිපති සමාවක්

එම නියෝජිත පිරිස ජනාධිපති වික්‍රමසිංහගෙන් ඉල්ලා ඇත්තේ දෙමළ දේශපාලන සිරකරුවන් 24 දෙනකුට දඩුවම් ලබා දී ඇති හෙයින් ඔවුන් නිදහස් කිරීමට ජනාධිපති වික්‍රමසිංහට හැකියාවක් ඇති බැවින් තවත් ප්‍රමාද නොකොට ඔවුන් මුදා හරින ලෙසත්, තවදුරටත් රඳවා ගෙන සිටින අනෙක් දේශපාලන සිරකරුවන් 22 දෙදෙනා ජනාධිපති පොදු සමාව යටතේ මුදා හරින ලෙසයි.

“ආණ්ඩුක්‍රම ව්‍යවස්ථාවේ ස්ථාවරය සැලකිල්ලට අරන් දඩුවම් ලබා දීමෙන් පස්සේ නිදහස් කරනවා කියන්නේ නිදහස තවත් පරක්කු වෙනවා. යහපාලන කාලේදී වගේ පුනරුත්ථාපන වැඩසටහනක් ඔස්සේ මේ දේශපාලන සිරකරුවන් නිදහස් කරන්න පුළුවන්,“යැයි ටෙලෝ නියෝජිතයන් මෙහිදී පෙන්වා දී තිබේ.

බලහත්කාරයෙන් අතුරුදහන් කළවුන්ගේ ඥාතීන්ගේ සංගමයේ ඉල්ලීම වන ජාත්‍යන්තර විමර්ශනයක අවශ්‍යතාව සදහන් කළ ටෙලෝ නියෝජිත කණ්ඩායමට ජනාධිපතිවරයා පොරොන්දු වී ඇත්තේ එක්සත් ජාතීන්ගේ ජිනීවා මානව හිමිකම් සැසියෙන් පසු අධිකරණ ඇමතිවරයාගේ ප්‍රධානත්වයෙන් යුත් කොමිටියක් මගින් ඒ සම්බන්ධයෙන් සියලු දෙමළ පාර්ශවයන් සමග සාකච්ඡා කරන බවයි.

දෙමළ දේශපාලන සිරකරුවන් සම්බන්ධයෙන් හිටපු විනිසුරු අශෝක ද සිල්වා සකස් කළ වාර්තාවක් ලැබුණු පසු ඔවුන් මුදා හරින බවට ජනාධිපති රනිල් වික්‍රමසිංහ සහතික වූ බව දෙමළ ජනතා ජාතික සන්ධානයේ නායක, පාර්ලිමේන්තු මන්ත්‍රී සී.වී.විග්නේශ්වරන් මන්ත්‍රීවරයාද මීට ඉහතදී පවසා තිබුණි.

කෙසේවෙතත්, දෙමළ දේශපාලන සිරකරුවන් නිදහස් කිරීමේ කතා ආණ්ඩුවේ තවත් ‘ව්‍යාජ රංගනයක්’ දැයි ප්‍රකට දෙමළ නීතිවේදියකු ප්‍රශ්න කර තිබේ.

ජනාධිපති නීතිඥ කේ.වී.තවරාසා පවසන්නේ යහපාලන ආණ්ඩුව පැවති කාලයේදීත් මෙවැනි අයුරින් රඟ දැක්වීමක් සිදු කෙරුණු බවයි.

ඒ අමයේ නීතිපතිවරයා විසින් උසාවියට ගොනු කළ අසත්‍ය වාර්තා මගින් ත්‍රස්ත පනත යටතේ දඩුවම් පනවා ඇති සහ මහාධිකරණයේ නඩු පවරා විමර්ශනය කෙරෙන දෙමළ දේශපාලන සිරකරුවන් කිසිවකු මේ දක්වා නිදහස් කර නොමැති බව ජ්‍යෙෂ්ඨ නීතිඥ තවරාසා වැඩිදුරටත් පවසයි.

දෙමළ ජාතික ජනතා පෙරමුණේ (TNPF) මහලේකම් වරයාද පවසන්නේ ත්‍රස්තවාදය මර්දනය කිරීමේ පනත යටතේ නඩු ගොනු කිරීමට අධිකරණයට අසත්‍ය වාර්තා ලබා දෙන බවයි.

“PTA යටතේ බොරු චෝදනා නගා 2018 දී සිරගත කළ අය අතර උදයසොරූබන් උමාසුදන් සහ රමේෂ් සිවන්දන් කියන ළමයි දෙන්නත් ඉන්නවා. යුද්දේ ඉවර වෙන දවස්වල ඒගොල්ලන්ට යන්තම් වයස අවුරුදු අටයි. ඒ ළමයි ඒ දවස්වල යුද්දේ ගැන මුකුත් දන්නේ නෑ,” යි සෙල්වරාජා ගජේන්ද්‍රන් මන්ත්‍රීවරයා ඉකුත්දා පාර්ලිමේන්තුවේදී ප්‍රකාශ කළේය.

Facebook Comments

wedding people