රජය විසින් පුනරුත්ථාපනය කරන ලද හිටපු එල්ටීටීඊ සාමාජික සාමාජිකාවන් පූර්ණ වෛද්‍ය පරීක්ෂණයකට ලක් කිරීම සඳහා උතුරු පළාත් සෞඛ්‍ය අමාත්‍යංශය විසින් තීරණය කර ඇත.
පුනරුත්ථාපනය වූ හිටපු එල්ටීටීඊ සාමාජිකයන් හට විෂ සහිත ඖෂධ වර්ග එන්නත් කොට ඇති බවට පළ වන වාර්තාවල සත්‍ය අසත්‍යතාව තහවුරු කර ගැනීම සඳහා ඉහත කී වැඩපිළිවල ආරම්භ කළ බවයි උතුරු පළාත් සෞඛ්‍ය අමාත්‍ය වෛද්‍ය පී.සත්‍යලිංගම් පවසන්නේ.
පුනරුත්ථාපනය වීමෙන් පසුව මියගිය හිටපු එල්ටීටීඊ සාමාජික සාමාජිකාවන් පිළිබඳ තොරතුරු සොයා ඒ සම්බන්ධයෙන් පළමුව පරීක්ෂණයක් ආරම්භ කරන බවත් පළාත් සෞඛ්‍ය අමාත්‍යවරයා සඳහන් කළේය.
ඉන් පසුව පුනරුත්ථාපනය වී දැනට විවිධ පළාත්වල වෙසෙන හිටපු එල්ටීටීඊ සාමාජික සාමාජිකාවන් එම පළාත්වල රජයේ රෝහල් හරහා පූර්ණ වෛද්‍ය පරීක්ෂණයකට ලක් කිරීමට බලාපොරොත්තු වන බවයි ඔහු ප්‍රකාශ කරන්නේ.
උතුරු පළාත් සභාවෙන් සහ දෙමළ ජාතික සන්ධානයේ මධ්‍යම කාරක සභාවෙන්ද ඉහත කී වැඩපිළිවල සඳහා පූර්ණ සහාය ලැබී ඇති බව පැවැසූ උතුරු පළාත් සෞඛ්‍ය අමාත්‍ය පී.සත්‍යලිංගම් වෛද්‍ය පරීක්ෂණ සඳහා සහභාගි වන මෙන් පුනරුත්ථාපනය වූ හිටපු එල්ටීටීඊ සාමාජික සාමාජිකාවන්ට දන්වා ඇති බවත් වැඩිදුරටත් කියා සිටියේය.
හිටපු එල්ටීටීඊ සාමාජිකයන්ට නිදහස ලබා දීමට පෙර විෂ ශරීර ගත කොට ඇති බවට එල්ල වන චෝදනා ආණ්ඩුව ප්‍රතික්ෂේප කරයි.
Facebook Comments
