පසුගිය ජනාධිපතිවරණ සමයේ කූඨ ලේඛනයක් ප්‍රදර්ශනය කරමින් ජාතීන් අතර සුහදතාවය කඩා කප්පල් කිරීමට තැත් කළේ යැයි චෝදනා ලැබ සිටින එක්සත් ජාතික පක්ෂයේ හිටපු මහලේකම් තිස්ස අත්තනායකට එරෙහි නඩුවේ සාක්ෂිකරුවන් වන ජනාධිපතිවරයා හා අගමැතිවරයා හට කොළඹ මහාධිකරණය විසින් යළි සිතාසි නිකුත් කර තිබේ.
රාජකාරිමය හේතුවක් මත ජනාධිපතිවරයා සහ අගමැතිවරයා අධිකරණයේ පෙනී නොසිටින බව මෙන්ම ඔවුන්ට වෙනත් දිනයක් ලබා දෙන නීතිපතිවරයා විසින් පෙනී සිටි ජ්‍යෙෂ්ඨ රජයේ නීතිඥ ලක්මිනි ගිරිහාගම 26 සඳුදා අධිකරණයට දැනුම් පසු මෙසේ සිතාසි නිකුත් කර ඇත.
සාක්ෂිකරුවන් දිගින් දිගටම අධිකරණයට ඉදිරිපත් නොවීම නිසා විත්තිකරුට අගතියක් සිදුවන බව පෙන්වා දී ඇති කොළඹ මහාධිකරණ විනිසුරු විකුම් කළුවාරච්චි ඔහුට දිගටම විත්තිකරුවෙකු විය නොහැකි බව ද කියා සිටියේය.
එම නිසා එදිනට යළි අධිකරණය වෙත පෙනී සිටින්නැයි සිතාසි නිකුත් කල විනිසුරුවරයා ජුනි මස 24 වන දින නඩුව කැඳවීමට නියෝග කළේය.
පසුගිය ජනාධිපතිවරණ සමයේදී එවකට විපක්ෂයේ පොදු අපේක්ෂක මෛත්‍රීපාල සිරිසේන සහ විපක්ෂ නායක රනිල් වික්‍රමසිංහ අතර රහසිගත ගිවිසුමක් අත්සන් කර ඇතැයි කියමින් කූඨ ලේඛනයක් ප්‍රසිද්ධියට පත්කළ බවට එක්සත් ජාතික පක්ෂයේ හිටපු මහලේකම් තිස්ස අත්තනායක හට චෝදනා එල්ල වී ඇත.
Facebook Comments
