පාසල් නිරෝධායන මධ්‍යස්ථාන කිරීමට උතුරේත් දකුණේත් විරෝධය

0

නාවික හමුදා භටයන් විශාල පිරිසක් ආසාදිත වී රටේ කෝවිඩ් රෝගීන් සංඛ්‍යාව සීග්‍රයෙන් ඉහල යාමත් සමග රජයේ ආරක්ෂක අංශ වල සාමාජිකයන් නිරෝධායනය කිරීම සදහා පාසල් යොදා ගැනීම සම්බන්ධයෙන් උතුරේත් දකුණේත් විරෝධතා එල්ල වෙමින් තිබේ.

උතුරේ ජනයා විදී බසිමින් සිය විරෝධතාවය දක්වද්දී දකුණේ විරෝධතා පවත්වා ඇත්තේ පුවත් නිවේදන සහ සමාජ මාධ්‍ය ඔස්සේය.

වැලිසර පිහිටි නාවික නෞකා ගැමුණු කඳවුරේ සේවය කළ සාමාජිකයන් විශාල පිරිසකට කොරෝනා වෛරසය ආසාදනය වීමත් සමග ත්‍රිවිධ හමුදාවේ නිවාඩු ලබා සිටි සාමාජිකයන්ගේ නිවාඩු අවලංගු කර ඔවුන්ට නැවත සිය කදවුරු වෙත වාර්තාකරන ලෙස ආරක්ෂක අමාත්‍යාංශය නියෝග කර තිබුනි.

යුද හමුදාපති ලුතිනන් ජෙනරාල් ශවේන්ද්‍ර සිල්වා පසුගියදා සඳහන් කළේ දුරස්ථභාවය පවත්වාගෙන යා නොහැකි කඳවුරු ආශ්‍රිතව පිහිටා ඇති පාසල් කිහිපයක් හමුදා සාමාජිකයන්ගේ අවශ්‍යතා සඳහා අධ්‍යාපන අමාත්‍යංශයෙන් ඉල්ලා ඇති බවයි.

පොලිස් නිලධාරීන්ගේ බැරැක්ක තුලද දුරස්ථභාවය පවත්වාගනිමින් කටයුතු කරන ලෙස පොලිස්පති චන්දන වික්‍රමරත්න මේ වන විටත් නියෝග නිකුත් කර ඇත.

අධ්‍යාපන අමාත්‍යාංශයේ ලේකම් එන්. එච්. එම්. චිත්‍රානන්ද මාධ්‍ය වේදීන් සමග පසුගියදා කියා තිබුනේ ආරක්ෂක අංශ වලට පහසුකම් සැපයීම සඳහා පාසල් ලබාගැනීමට විමසු අතර ඒ අනුව මේ වන විට කොළඹ දිස්ත්‍රික්කයේ පාසල් කිහිපයක් ලබා දී ඇති බවයි.

මීට අමතරව ආරක්ෂක අංශ වෙත පහසුකම් සැපයීමට අවශ්‍යනම් පාසල් ලබාදෙන ලෙස අනිකුත් පාසල් වල විදුහල්පතිවරුන්ට ද දැනුම්දී ඇති බවද ඔහු වැඩි දුරටත් පවසා තිබුනි.

රාජකාරි අවසන්කරන ආරක්ෂක අංශ සෙබලුන්ට සහ රාජකාරියට පැමිණෙන ආරක්ෂක අංශ සෙබලුන්ට දින 14ක කාලයක් නවාතැන් ගැනීම සදහා මෙලෙස පාසල් යොදා ගැනීම සම්බන්ධයෙන් මේ වන විට විරෝධතා රැසක් මතු වෙමින් තිබේ.

දරුවන්ගේ ජීවිත සමග සෙල්ලම්

ආරක්ෂක අංශ වල සාමාජිකයන් සදහා නිරෝධායන මධ්‍යස්ථාන ලෙස පාසල් යොදා ගැනීම සම්බන්ධයෙන් හිටපු අධ්‍යාපන අමාත්‍ය නීතිඥ අකිල විරාජ් කාරියවසම් සිය මුහුණු පොතේ සටහනක් තබමින් අවධාරණය කර තිබුනේ කොළඹ රාජකීය විද්‍යාලය, ඩී.එස් සේනානායක විද්‍යාලය සහ තර්ස්ටන් විද්‍යාලය දැනටමත් නිරෝධායන මධ්‍යස්ථාන ලෙස යොදා ගන්නා බවට තොරතුරු ලැබී ඇති බවය.

“දරුවන්ගේ ජීවිත එක්ක සෙල්ලම් කරන්න එපා. පාසැල් ආරම්භ කළ විට රාජකීය විද්‍යාලය ගත්තොත් දරුවන් හත් අට දාහක් දිනපතා එනවා. මේ දවස්වල දරුවන් නැතත් මුරකරුවන්, අනධ්‍යන සේවකයන්ටත් අවදානම්. වෙන ඕන තැනක් ගන්න. දරුවන්ගේ අනාගතය සමග සෙල්ලම් කරන්න එපා,” යනුවෙනි.

හිටපු අධ්‍යාපන අමාත්‍ය අකිල විරාජ් කාරියවසම්ගේ අදහස අනුමත කරන ලංකා ගුරු සංගමයේ ප්‍රධාන ලේකම් ජෝසප් ස්ටාලින්ද නිවේදනයක් නිකුත් කරමින් පෙන්වා දෙන්නේ කොළඹ පමණක් නොව දිවයිනේ ස්ථාන කිහිපයකම පාසල් නිරෝධායන කටයුතු සදහා යොදා ගෙන තිබෙන අතර මෙය ඉතා භයානක තත්වයක් බවයි.

මේ අතර නිරෝධායන කටයුතු සදහා උතුරේ පාසල් යොදා ගැනීමට ගන්නා වු උත්සාහයට විරුද්ධත්වය පාමින් උතුරේ දිස්ත්‍රික්ක දෙකක විරෝධතා දියත් කර තිබේ.

යාපනය ජාතික අධ්‍යාපන විද්‍යාපීඨය නිරෝධායන කටයුතු සදහා යොදා ගැනීම වෙනුවෙන් අප්‍රේල් 27 දින එහි පැමිණි හමුදා සාමාජිකයන්ට ප්‍රදේශවාසීන් විසින් විරෝධය එල්ල කර තිබේ.

ප්‍රදේශවාසීන්ගේ විරෝධතාවය නොතකා හමුදා සාමාජිකයන් යාපනය ජාතික අධ්‍යාපන විද්‍යාපීඨයට ඇතුලු වුවද එහි පහසුකම් මදි බව පවසමින් ඔවුන් එම ස්ථානයෙන් පිටව ගිය බව යාපනයේ මාධ්‍යවේදීහු වාර්තා කරති.

මුලතිව් මුත්තුඅයියන්කඩ්ඩු වම් ඉවුර රජයේ දෙමළ මිශ්‍ර පාසල, මුත්තුඅයියන්කඩ්ඩු වලදකරෙයි මහා විද්‍යාලය, අලම්බිල් රෝමානු කතෝලික මහා විද්‍යාලය, විශ්වමඩු භාරතී විද්‍යාලය, ඇතුළු පාසල් කිහිපයක් නිරෝධායක කටයුතු වෙනුවෙන් සුදානම් කිරීම සදහා මේ වන විටත් පාසලේ තිබු ලිපි ලේඛන සහ උපකරණ ඉවත් කර ඇති බවට ප්‍රදේශවාසීහු චෝදනා කරති.

මුලතිව් මුත්තුඅයියන්කඩ්ඩු වම් ඉවුර රජයේ දෙමළ මිශ්‍ර පාසලේ සහ මුත්තුඅයියන්කඩ්ඩු වලදකරෙයි මහා විද්‍යාලයේ සිසුන්ගේ දෙමාපියන් පාසල අසලට පැමින විරෝධතා දියත් කළ බව ප්‍රදේශයේ වාර්තාකරුවෝ පවසති.

යාපනය අරාලිතුඩුව වට්ටුකෝට්ටෙයි විද්‍යාලය ඉදිරිපිට අප්‍රේල් 29 ත් මුලතිව් මුල්ලියාවලි වට්ට්‍රාපලෙයි මහා විද්‍යාලය ඉදිරිපිටදී අප්‍රේල් 28 ත් ප්‍රදේශවාසීන් විසින් විරෝධතා දියත් කර තිබේ.

මේ අතර උතුරේ පාසල් ආරක්ෂක අංශ වල නිරෝධායන කටයුතු සදහා යොදා ගැනීම සම්බන්ධයෙන් ප්‍රදේශයේ දේශපාලඥයන්ගේද විරෝධය මතු වෙමින් තිබේ.

හිටපු පාර්ලිමේන්තු මන්ත්‍රී එම්.කේ සිවාජිලිංගම් උතුරේ මාධ්‍යවේදීන් සමග කියා ඇත්තේ යුද්ධ හමුදා කදවුරු තුළ විශාල ඉඩම් ප්‍රමාණයක් පවතින බැවින් කදවුරු ඇතුලතම නිරෝධායන මධ්‍යස්ථාන පවත්වා ගත යුතු බවයි.

උතුරු පළාත් සභාවේ හිටපු සභාපති සී.වී.කේ.සිවඥානම් පෙන්වා දී ඇත්තේ පාසල් ඇතුළු පොදු ස්ථාන තුළ කොරෝනා නිරෝධායන මධ්‍යස්තාන ස්ථාපිත නොකළ යුතු බවයි.

යාපනය මහ නගර සභාවේ නගරාධිපති ඉමානුවෙල් ආනෝල්ඩ් චෝදනා කරන්නේ උතුරු පළාත සම්බන්ධයෙන් මධ්‍යම රජය අත්තනෝමතික තීරණ ගන්නා බවයි. උතුරේ පාසල් ආරක්ෂක අංශ වල නිරෝධායන කටයුතු සදහා යොදා ගැනීම සම්බන්ධයෙන් ඔහු සිය අප්‍රසාදය පල කර තිබේ.

නිරෝධායන කටයුතු සඳහා පාසල් ලබාගත් බව ප්‍රතික්ෂේප කරන ආරක්ෂක ලේකම් කමල් ගුණරත්න කොළඹදී මාධ්‍යවේදීන් හමුවේ පැවසුවේ අමතර කඳවුරු සඳහා ඒවා යොදාගන්නා බවයි.

ආරක්ෂක අංශ සාමාජිකයන් සඳහා තවත් කඳවුරු අවශ්‍ය වී ඇත්තේ ඇයිදැයි ආරක්ෂක ලේකම්වරයා පැහැදිලි කර නැත.

Facebook Comments