නියංසායෙන් දෙලක්ෂයකට වැඩි පිරිසකට පීඩා

පවතින වැසි රහිත වියළි කාලගුණික තත්ත්වය හේතුවෙන් දිවයිනේ දිස්ත්‍රික්ක හයක පවුල් අනු දෙදෙහස් අටකට අයත් පුද්ගලයන් 295,468 පීඩාවට පත්ව සිටින බව ආපදා කළමනාකරණ මධ්‍යස්ථානය පවසයි.

පුත්තලම, කුරුණෑගල, මහනුවර, අනුරාධපුර, පොළොන්නරුව හා මන්නාරම දිස්ත්‍රික්ක වලට නියං තත්ත්වය දැඩිව බලපා ඇති බවයි එම මධ්‍යස්ථානයේ වාර්තා පෙන්වා දෙන්නේ.

නියංසායෙන් වැඩිම බලපෑම සිදුව ඇත්තේ පුත්තලම දිස්ත්‍රික්කයට වන අතර එම දිස්ත්‍රික්කයේ පවුල් 66436 අයත් පුද්ගලයන් 216018 ක් පීඩාවට පත්ව ඇත.

කුරුණෑගල දිස්ත්‍රිකයේ පවුල් 17194 ක්ද අනුරාධපුර දිස්ත්‍රිකයේ පවුල් 3189 ක්ද මන්නාරම දිස්ත්‍රික්කයේ පවුල් 4789 ක්ද පොළොන්නරුව දිස්ත්‍රිකයේ පවුල් 250 ක්ද මහනුවර දිස්ත්‍රිකයේ පවුල් 150 ක්ද වියළි කාලගුණික තත්ත්වයේ බලපෑම නිසා පීඩාවට පත්ව සිටින බව අපදා කළමනාකරණ මධ්‍යස්ථානය නිවේදනය කරයි.

වියලි කාළගුණ තත්ත්වය ඉදිරියටත් පැවතිය හැකි බවයි ආපදා කළමනාකරණ මධ්‍යස්ථානය වැඩි දුරටත් පෙන්වා දෙන්නේ.

මේ අතර වැසි රහිත වියළි කාලගුණය හේතුවෙන් විදුලි බලාගාර ආශ්‍රිත මධ්‍යම කඳුකරයේ ප්‍රධාන ජලාශවල ජල මට්ටම් ද සැලකිය යුතු අයුරින් පහත බැස තිබේ.

රන්ටැඹේ ජලාශය සක්‍රීය ජල ධාරිතාව 3.5 % ක් දක්වා පහළ බැස ඇති අතර කොත්මලේ ජලාශයේ පවතින සක්‍රීය ජල ධාරිතාව සමස්ත ජල ධාරිතාවයෙන් 29 %ක්, වික්ටෝරියා ජලාශයේ ‍73 %ක් ද රන්දෙණිගල ජලාශය 47% ක්ද බෝවතැන්න 36% ක් හා මොරගහකන්ද 78% ක ජල ධාරිතාවයෙන් යුක්ත බව ශ්‍රී ලංකා මහවැලි අධිකාරිය පවසයි.