ලංකාව පැවැත්වූ ඉන්දු, චීන හමු වලින් පසු ඇමරිකානු රාජ්‍ය ලේකම් එයි

ඉන්දු ශාන්තිකර කලාපයේ ඇමරිකානු පැවැත්ම සහතික කරගැනීම කේන්ද්‍රීය අරමුණ කොටගත් ආසියානු සංචාරයකදී ඇමරිකා එක්සත් ජනපද රාජ්‍ය ලේකම් වරයා ශ්‍රී ලංකාවටද පැමිණෙන බව දැනුම් දී තිබේ.

“අපේ මිතුරන් සහ සහකරුවන් සමග පලදායී සාකච්ඡා පැවැත්වීම සඳහා ඉන්දියාව, ශ්‍රී ලංකාව, මාලදිවයින සහ ඉන්දුනීසියාව බලා කෙරෙන සංචාරයත්, ආචාර්ය මාර්ක් ටී එස්පර් හා එක්ව අපේ ඉන්දීය සම පදවි ධාරීන් සමග කෙරෙන අමාත්‍ය මට්ටමේ සාකච්ඡාවත් ගැන මහත් අපේක්ෂාවෙන් යුතුව සිටිමි,” යි රාජ්‍ය ලේකම් මයික් පොම්පියෝ නිකුත් කළ නිල ට්විටර් පණිවිඩයක දැක්වේ.

එක්සත් ජනපද රාජ්‍ය ලේකම්වරයකු අවසන් වතාවට ශ්‍රී ලංකාවට පැමිණියේ 2015 දී සිරිසේන-වික්‍රමසිංහ ආණ්ඩුව බලයට පත්වීමත් සමග 2015 අගෝස්තුවේය.

මෙම ඉහල මට්ටමේ නිල සංචාරය ප්‍රකාශයට පත් කෙරුනේ නරේන්ද්‍ර මෝඩි සහ මහින්ද රාජපක්ෂ ඉන්දු ලංකා අගමැති දෙපල අන්තර්ජාල සමුළුවක් පැවැත්වීමෙන් අනතුරුව චීන කොමියුනිස්ට් පක්ෂ දේශපාලන මණ්ඩල සභික හා විදේශ කටයුතු කොමිසමේ ප්‍රධානී යැං ජියෙෂි ශ්‍රී ලංකාවේ හදිසි නිල සංචාරයක යෙදීමත් සමගමය.

මාර්ක් ටී එස්පර් යනු එක්සත් ජනපද ආරක්ෂක ලේකම් වරයාය. ඔහු ඉන්දු-ශාන්තිකර සාගර කලාපය එක්සත් ජනපදය වෙනුවෙන් නිදහසේ විවෘත කිරීම ගැන ජනාධිපති ගෝඨාභය රාජපක්ෂ හා පසුගිය අගෝස්තුවේදී දුරකතනයෙන් සාකච්ඡා කර තිබුණි.

“ශක්තිමත්, ස්වෛරී” ශ්‍රී ලංකාවක්

රාජ්‍ය ලේකම් සංචාරයේ ප්‍රමුඛ අරමුණ වී ඇත්තේ කලාපීය ආරක්ෂක සැලසුම් වල එක්සත් ජනපද භූමිකාව තහවුරු කිරීම බව රාජ්‍ය දෙපාර්තමේන්තුව විසින් ප්‍රකාශයට පත්කර ඇති නිවේදනයකින් පෙනීයයි.

ශ්‍රී ලංකාව “ශක්තිමත්, ස්වෛරී” රාජ්‍යයක් ලෙස එහිදී අවධාරණය කර ඇත.

“ශක්තිමත්, ස්වෛරී ශ්‍රී ලංකාවක් සමග හවුල්කාරිත්වයක් සඳහා එක්සත් ජනපදයේ ඇති කැපවීම අවධාරණය කිරීමටත්, නිදහස් සහ විවෘත ඉන්දු-ශාන්තිකර කලාපයක් සඳහා වන අපේ පොදු ඉලක්කය ප්‍රවර්ධනය කිරීම සඳහාත් පොම්පියෝ ලේකම්වරයා කොළඹට යනු ඇත,” යි එක්සත් ජනපද රාජ්‍ය දෙපාර්තමේන්තු ප්‍රකාශක මෝර්ගන් ඔර්ටේගුස් නිකුත් කළ නිවේදනයේ දැක්වේ.

එක්සත් ජනපද නිවේදනයේ සඳහන් වන පරිදි රාජ්‍ය ලේකම්ගේ ඉන්දීය සංචාරයේ ප්‍රධාන අරමුණ වන්නේ තුන්වැනි වරටත් පවත්වන වාර්ෂික ඉන්දු ඇමරිකා අමාත්‍ය මට්ටමේ සාකච්ඡාවට සහභාගී වීමයි.

“විස්තීර්ණ එක්සත් ජනපද-ඉන්දීය ගෝලීය උපායික හවුල්කාරිත්වය පෙරට ගෙන යාම සහ ඉන්දු ශාන්තිකර කලාපයේත් ලෝකයේත් ස්ථාවර භාවය හා සෞභාග්‍යය නගා සිටුවීමත්” ද්විපාර්ශවීය සාකච්ඡා වල පදනම වනු ඇත.

මාලදිවයිනේ සහ ඉන්දුනීසියාවේදී විවෘත ඉන්දු-ශාන්තිකර කලාපයක්, කලාපීය සාගරික ආරක්ෂාව සහ නිදහස්, විවෘත ඉන්දු-ශාන්තිකර කලාපයක් පිලිබඳ සාකච්ඡා කිරීමට නියමිත බව එක්සත් ජනපදය කියා සිටී.

ඉන්දීය අගමැතිවරයා සමග පැවති සාකච්ඡාවෙන් අනතුරුව ශ්‍රී ලංකාවට බෞද්ධ කටයුතු සඳහා ඩොලර් මිලියන 1.5 ක ප්‍රදානයක් ලැබුණු අතර, චීන නියෝජිත පිරිස නික්ම ගියේ ඩොලර් මිලියන 900ක ආධාරයක් පොරොන්දු වෙමිනි.

ශ්‍රී ලංකාවට ඩොලර් මිලියන 480 ක මුල්‍යාධාරයක් සහතික කෙරෙන මිලේනියම් චැලේන්ජ් කෝපරේෂන් (MCC) ගිවිසුම අත්සන් කිරීම සහ ඇමරිකානු සෙබළුන්ට හා ආරක්ෂක නිලධාරීන්ට රට තුල නිදහසේ ඔබ මොබ යාමට ඉඩ සලසන හමුදා තත්ව ගිවිසුම (SOFA) ද එක්සත් ජනපද රාජ්‍ය ලේකම්ගේ කොළඹ ගමනේදී සාකච්ඡාවට ගැනෙනු ඇති බවට විශ්වාස කෙරේ.

රාජ්‍ය ලේකම් පොම්පියෝගේ ආසියානු සංචාරයේ දින වකවානු හෙළි කර නැත.

චීන දූත මණ්ඩලයට සේම එක්සත් ජනපද රාජ්‍ය තාන්ත්‍රිකයන්ටත් නිරෝධායන නීති වලංගු නොවනු ඇතැයි අපේක්ෂිතය.