ලබන අයවැය: සුව සේවයට කප්පාදු, හමුදාවට අධිවේගයට වැඩි සැලකිලි

කොරෝනා වසංගත පීඩාවෙන් රටේ ජනතාවගේ සෞඛ්‍ය ආරක්ෂාව බරපතල අවදානමකට මුහුණ දී තිබියදී, පසුගිය වසරට සාපේක්ෂව ඉදිරි වසරේ සෞඛ්‍ය වියදම් සියයට පහලොවකට වැඩි ප්‍රතිශතයකින් කපා දැමීමට රජය සැලසුම් කර තිබේ.

නමුත් ආණ්ඩුව විසින් ලබන වසර සඳහා ප්‍රකාශයට පත්කර ඇති විසර්ජන පනත් කෙටුම්පතෙන් මෙවරත් වැඩිම වියදම ලෙස රුපියල් බිලියන 355ක්ම යොදවා ඇත්තේ ආරක්ෂක කටයුතු වලටය. අධිවේගී මාර්ග සඳහා යොදවන මුදල සියයට අනූවකට ආසන්න ප්‍රමාණයකින් ඉහල නංවා ඇත.

2021මුදල් වර්ෂය සදහා වන විසර්ජන පනත (අය-වැය බිල්පත) ඔක්තෝබර් 16 වැනිදා ජනාධිපති ගෝඨාභය රාජපක්ෂගේ ප්‍රධානත්වයෙන් රැස්වූ කැබිනට් මණ්ඩලයට අග්‍රාමාත්‍ය හා මුදල් අමාත්‍ය මහින්ද රාජපක්ෂ ඉදිරිපත් කරන ලදුව එයට අනුමැතිය හිමිව තිබේ.

එය එළැඹෙන නොවැම්බර් 17 වැනිදා පාර්ලිමේන්තුවේ සභාගත කිරීමට නිමිතය.

අමාත්‍ය මණ්ඩලයේ අනුමැතිය හිමි වු එම අය-වැය සටහනට අනුව 2021 මුදල් වර්ෂය සදහා වන රජයේ වියදම රුපියල් බිලියන 2,660 ක් වන අතර ප්‍රාග්ධන වියදම 2,216 ක් ලෙස දැක්වෙයි.

විසර්ජන පනතේ දැක්වෙන පරිදි මෙවර සෞඛ්‍ය සදහා වෙන්කර ඇත්තේ පසුගිය වසරවලට සාපේක්ෂව අඩු මුදලකි.

සෞඛ්‍ය සදහා 2018 හා 2019 යන වසරවල දී ‍ බිලියන 187 බැගින් වෙන් කර තිබුනද ලබන වසර සදහා වෙන් කර ඇත්තේ බිලියන 159 ක් පමණක් පමණි. ඒ විසර්ජන පනත කැබිනට්ටුව සම්මත කර ඇත්තේ ගතවූ සති දෙක ඇතුලත කෝවිඩ් 19 ආසාදිතයන් 2000 ක් රෝහල් ගතව තවත් දහස් ගණනක් නිරෝධායනයට යොමු කර තිබියදීය.

එය බිලියන 28 ක එනම් 17.6% අඩු වීමකි.

කෙසේ නමුත් ලබන වසරේ ආරක්ෂාව සඳහා වැඩිම වියදම දැරීමට අනුමැතිය දී ඇති අමාත්‍ය මණ්ඩලය පාරවල් හැදීම සඳහා දරන වැය ගිය අවුරුද්ද හා සසඳද්දී දෙගුණයකට ආසන්න ප්‍රමාණයකින් ඉහල දමා ඇත.

ආරක්ෂක කටයුතු සඳහා රු. බිලියන 355 ක් හෙවත් මුළු වැයෙන් 13.2% ක් ආණ්ඩුව වෙන් කරද්දී, සෞඛ්‍ය සදහා වෙන් කර ඇත්තේ සමස්ත වියදමින් 5.91% ක් පමණි.

අධිවේගී මාර්ග සඳහා 2019 යේ වෙන්කළ බිලියන 176 ට සාපෙක්ෂව බිලියන 330 ක් දක්වා 87.5% කින් වැඩි කර තිබේ.

2021 මුදල් වර්ෂය සදහා වන රජයේ වියදම රුපියල් බිලියන 2,660 ක් හා ප්‍රාග්ධන වියදම 2,216 ක් ලෙස දැක්වෙද්දී, පසුගිය මැර්තු මස පාර්ලිමේන්තුව විසුරුවා හැරීමෙන් පසු 2020 මුදල් වර්ෂය තුල දී ජනාධිපති බලතල අනුව අතුරු සම්මත ගිණුම් කිහිපයක් මගින් ලබාගත් මුදල් ද මේ විසර්ජන පනතට ඇතුලත් කර තිබේ.

එම වැයපත් එකතුවීමෙන් මුලු වියදම බිලියන 2,692 ක් දක්වා වැඩි කෙරී ඇත.

ණය ගෙවමු

ඒ අතර 2019 වසරේ නොගෙවූ ආණ්ඩුවේ වියදම් පියවීම සදහා ද රුපියල් බිලියන 211 ක ප්‍රතිපාදන මේ විසර්ජන පනතෙන් සලසා දී තිබේ.

විසර්ජන පනත ඉදිරිපත් කරමින් මුදල් ඇමතිවරයා පවසා තිබුනේ ආණ්ඩුවේ ප්‍රතිපත්ති ප්‍රකාශනය වන රට හදන සෞභාග්‍යයේ දැක්මේ අපේක්ෂිත ප්‍රතිපල ලබා ගත හැකි වන පරිදි සම්පත් බෙදා හැරීමට මින් කටයුතු යොදා ඇති බවයි.

එහි දී තමන් ප්‍රමුඛත්වය ලබා දී ඇති ක්ෂේත්‍ර පිලිබදව අමාත්‍ය මණ්ඩලයේ දී කරුණු ඉදිරිපත් කරමින් ඔහු පවසා තිබුනේ සැමට පානීය ජලය, කිලෝ මීටර් ලක්ෂයක මංමාවත් අලුත් වැඩියා කිරීම හා වාරිමාර්ග අංශයට ප්‍රමුඛත්වය දී ඇති බවයි.

ඒ අතර රජයේ ආදායම අඩුම තරමින් දළ ජාතික නිෂ්පාදිතයෙන් 10.20% බවට පත් කර ගැනීම සදහා පවතින තත්වයන් යටතේ අවශ්‍ය වන ව්‍යාපාරික පිරිවැය කළමනාකරන ක්‍රමවේදයන් හා ආයෝජන වැඩසටහන් සදහා අවශ්‍ය පරිදි සම්පත් වෙන් කිරීම් කර ඇති බවත් රජයේ කටයුතු ඩිජිටල් කරණය කිරිමට අවශ්‍ය අනුග්‍රහය ලබා දීමට විධිවිධාන සලසීමත්, අඩු සම්පත් මගින් වැඩි පලදාවක් ලැබෙන පරිදි සම්පත් යෙදවීමට අවශ්‍ය සරල ක්‍රමවේදයන් දෙසට පවත්නා ක්‍රමවේදයන් ප්‍රතිසංවිධානය කීරීමටත් සම්පත් වෙන් කර ඇති බවයි.

නමුත් මේ විසර්ජන පනත තුළ එම ක්ෂේත්‍රයන් සදහා මුදල් වෙන් කිරීම් පසුගිය වසර වලට සාපේක්ෂව අඩු බව වාර්තා පෙන්වා දෙයි.

ජල සම්පාදනයට 2019 විසර්ජන පනතේ දී රුපියල් බිලියන 127ක් වෙන් කෙරුනද මෙවර වෙන් කර ඇත්තේ බිලියන 96 කි.

කෘෂිකර්මය සදහා 2019 දී වෙන්කළ බිලියන 114 ට සාපෙක්ෂව මෙවර වෙන් කර ඇත්තේ බිලියන 24 කි.

ජල පෝෂණ ප්‍රදේශ ගැන ආණ්ඩුව කතා කළද පරිසරය සදහා වෙන් කර ඇත්තේ බිලියන 02 ක් පමණි.

කර්මාන්ත හා වාණිජ්‍ය යන ප්‍රවර්ගය යටතේ 2019 දී රුපියල් බිලියන 13 ක් වෙන් කෙරී තිබුනද මෙවර එය දෙකට බෙදා කර්මාන්ත යන ප්‍රවර්ගය යටතේ බිලියන 3.5 කුත් වෙළෙඳ යන ප්‍රවර්ගය යටත් බිලියන 5.5 කුත් වෙන් කර ඇත. එකතුව බිලියන 09 ක් පමණි.