වසංගතයේ සමාජ ව්‍යාප්තියක් නැති බවට “රජය කියන්නේ බොරු”

කොරෝනා ආසාදිතයන් සිය ගණනින් දෛනිකව සමාජයෙන් වාර්තා වී තිබියදීත්, වෛරසය සමාජයේ ව්‍යාප්ත වී නොමැති යැයි රජය ප්‍රමුඛ කොවිඩ් මර්දන බලධාරීන් නිකුත් කරන ප්‍රකාශ අසත්‍ය බවට දිවයිනේ ප්‍රමුඛතම හෙද නිලධාරී සංගමයක් විසින් ප්‍රතික්ෂේප කර තිබේ.

“මම දැක්කා එක අධ්‍යක්ෂවරයෙක් සෞඛ්‍ය ක්ෂේත්‍රයේ, ඇවිල්ලා කියනවා, නියෝජ්‍ය පළාත් සෞඛ්‍ය සේවා අධ්‍යක්ෂවරයෙක්, ඊයේ රෝගීන් වාර්තා උනා 80 ක්. ඒකෙන් නිරෝධායන මධ්‍යස්ථානවලින් 25 යි. එතකොට අසුවෙන් විසි පහක් අඩු කරාම පනස් පහයි. ඒ පනස් පහ ආශ්‍රිතයෝ. හැබැයි සමාජ ව්‍යාප්තියක් නෑ කියලා.”

රජයේ හෙද නිලධාරීන්ගේ සංගමයේ සභාපති හා හිටපු පාර්ලිමේන්තු මන්ත්‍රී සමන් රත්නප්‍රිය පළාත් සෞඛ්‍ය බලධාරියාගේ ප්‍රකාශය විහිලුවක් ලෙස හෙලා දකිමින් පෙන්වා දෙන්නේ ආශ්‍රිතයන් යනු වෛරසය ආසාදිත පුද්ගලයා සිටි ආසන්නයේ හා ඔහු ගමන් ගත් ස්ථාන වලින් හදුනාගන්නා රෝගීන් බවයි.

“එතකොට 55 ක් ආශ්‍රිතයෝ නම් මේ සමාජයේ නෙමෙයිද මේ ගොල්ලෝ ඉන්නේ. කොහෙද ඉන්නේ.දැන් දවස ගානේ ලෙඩ්ඩු 80ක් 90ක් 100 ක්, 120 ක් වාර්තාවෙන්නේ කොහෙන්ද? සමාජයෙන් වාර්තා වෙන්නේ.”

රජයේ හෙද නිලධාරීන්ගේ සංගමයේ සභාපති සමන් රත්නප්‍රිය ඒ බව සදහන් කළේ ජාතික වෘත්තීය සමිති පෙරමුණ විසින් ඔක්තෝබර් 20 අඟහරුවාදා කොළඹදී පැවැත්වු මාධ්‍ය හමුවකදීය.

මෙවැනි අසත්‍ය ප්‍රකාශ කරමින් ඇන්දීමට හදන්නේ කවුරුන්දැයි ප්‍රශ්න කරන ජ්‍යෙෂ්ඨ වෘත්තිය සමිති නායකයා එහිදී වැඩි දුරටත් අවධාරණය කළේ මේ වන විට සමාජයෙන් කොරෝනා වෛරසය ආසාදිත රෝගීන් වාර්තා වන අතර බොරු කියමින් එම තත්වය වසං කළ නොහැකි බවයි.

රජයේ ප්‍රවෘත්ති දෙපාර්තමේන්තුව නිවේදනය කර ඇති පරිදි ඔක්තෝබර් 21 බදාදා සවස 4.55 වනවිට දිවුලපිටිය කෝවිඩ් පොකුරෙන් වාර්තා වී ඇති සමස්ත ආසාදිතයන් ගණන 2451 කි.

අලුතින් හඳුනාගෙන තිබෙන වෛරසය ආසාදිතයන් සංඛ්‍යාව 109ක් වන අතර ඉන් 37 දෙනෙක් නිරෝධායන මධ්‍යස්ථානවල සිටින ආශ්‍රිතයන් හෝ කාර්යමණ්ඩලය වේ.

23 දෙනකු ආශ්‍රිතයන් වන අතර තවත් 49 දෙනකු පෑලියගොඩ මාළු වෙළෙඳපොලින් හමු වුවන්ය.

රජයේ ප්‍රවෘත්ති දෙපාර්තමේන්තුව වැඩි දුරටත් පවසන්නේ ඔක්තෝබර් 20 අගහරුවාදා රාත්‍රී දහය වන විට ශ්‍රී ලංකාවෙන් තහවුරු කරන ලද සමස්ත කොරෝනා වෛරස් ආසාදිත රෝගීන් ගණන 5811 ක් බවයි. එයින් 2341 දෙනකු මේ වන විටත් රෝහල් වල ප්‍රතිකාර ලබමින් සිටී.