දෙමළ විමුක්ති අරගලය වෙනුවෙන් මාරාන්තික උපවාසයක යෙදී ජීවිතය පරිත්‍යාග කළ එල්.ටී.ටී.ඊ නායකයකු වෙනුවෙන් උතුරේ දෙමළ දේශපාලන පක්ෂයක්, රනිල් වික්‍රමසිංහ පාලන සමයේ දියත් කළ රිය පෙළපාලියක් සම්බන්ධයෙන් ප්‍රකාශයක් ලබා ගැනීම සදහා එම පක්ෂයේ නීති උපදේශක අපරාධ පරීක්ෂණ දෙපාර්තමේන්තුව වෙත කැදවා තිබේ.
2023 වසරේ දියත් කළ එම රථ පෙලපාලියට නැගෙනහිර දී සිංහල මැර කණ්ඩායමක් විසින් ප්‍රහාරයක් එල්ල කර තිබු අතර එම ප්‍රහාරයෙන් දෙමළ ජාතික ජනතා පෙරමුණේ එවක පාර්ලිමේන්තු මන්ත්‍රී සෙල්වරාජා ගජේන්ද්‍රන් මෙන්ම එම පෙරමුණේ නීතිඥ නඩරාජ් කාන්දීපන් ද තුවාල ලැබූහ.
2025 ජනවාරි 16 වැනිදා ත්‍රස්ත මර්දන හා විමර්ශන කොට්ඨාශ (CTID) ය විසින් වැල්ලවත්ත පොලිස් ස්ථානයට දැනුම් දී ඇත්තේ 2023.09.17 වැනි දින ත්‍රිකුණාමලය ප්‍රදේශයේ පවත්වන ලද එකී තිලීපන් සැමරුම් රථ පෙළපාලිය සම්බන්ධයෙන් කරනු ලබන විමර්ශනයකට අදාලව ප්‍රකාශයක් ලබා ගැනීම සදහා 2025.01.21 වැනි දින පැය 09.00 ට පැරණි පොලිස් මුලස්ථාන ගොඩනැගිල්ල කොළඹ 01 ලිපිනයේ පිහිටි ත්‍රස්ත මර්ධන සහ විමර්ශන කොට්ඨාසයේ විමර්ශන අංශයේ පෙනී සිටින ලෙස එම පොලිස් බල ප්‍රදේශයේ පදිංචි නඩරාජ් කාන්දීපන් ට දැනුම් දෙන ලෙසයි.
ගජේන්ද්‍ර කුමාර් පොන්නම්බලම් පාර්ලිමේන්තු මන්ත්‍රීවරයාගේ නායකත්වයෙන් යුතු දෙමළ ජාතික ජනතා පෙරමුණේ (TNPF) නීති උපදේශක ලෙස කටයුතු කරන්නේ නීතිඥ නඩරාජ් කාන්දීපන්ය.
පොලිස් කැඳවීම කර ඇත්තේ ඉඩම් අයිතිය ඉල්ලා පැවැත්වූ විරෝධතාවක් සම්බන්ධයෙන් TNPF මහලේකම් සෙල්වරාජා ගජේන්ද්‍රන් පොලිසිය විසින් උසාවි ගෙන්නා දින කීපයකිනි.
2023 මැර ප්‍රහාරය
ඉන්දීය හමුදාවට එරෙහිව මාරාන්තික උපවාසයක යෙදී ජීවිතය පරිත්‍යාග කිරීම නිසා ත්‍යාගී තිලීපන් ලෙසින් ගෞරවයට පාත්‍ර වන එල්.ටී.ටී.ඊ සංවිධානයේ ලුතිතන් කර්නල් රාසයියා පාර්තිපන් අනුස්මරණ සතිය නිමිත්තෙන් 2023 වසරේ සැප්තැම්බර් 15 වැනිදා දෙමළ ජාතික ජනතා පෙරමුණ පොතුවිල් වලින් ආරම්භ කළ රථ පෙළපාලිය මඩකලපුව, ත්‍රිකුණාමලය, කිලිනොච්චිය හරහා නල්ලුර් කන්දසාමි කෝවිල අසල ඉදිකර තිබී 2010 දී රජයේ ආරක්ෂක අංශ විසින් කඩා බිඳ දමන ලද තිලීපන්ගේ ස්මාරකය දක්වා ගමන් කිරීමට සැලසුම් කර තිබුනි.
සැප්තැම්බර් 17 වැනිදා ත්‍රිකුණාමලය හරහා ගමන් කරමින් තිබු තිලීපන්ගේ රුව සහිත රථයට සර්ධාපුර මංසන්ධියේ දී පොලු මුගුරු අතැතිව පැමිණි කාන්තාවක්ද සහිත මැර කණ්ඩායමක් දැඩි ලෙස පහර දී දැඩි අලාභහානි කර පාර්ලිමේන්තු මන්ත්‍රීවරයාටද පහර දෙන ආකාරය පළාත් බද මාධ්‍යවේදීන් විසින් විඩියෝ ගත කර තිබේ.
“මු එල්.ටී.ටී.ඊ නායකයා. එල්.ටී.ටී.ඊ නායකයා.” යනුවෙන් හා අසභ්‍ය වචන වලින් සිංහල මැර කණ්ඩායම මන්ත්‍රීවරයාට චෝදනා කරමින් පහර දෙද්දි කාන්තාවක් මන්ත්‍රීවරයාට පහර දී තිබුනේ සිංහ කොඩිය සවිකර තිබෙන මුගුරකිනි.
පොලිසිය බලා සිටියදී මැර ප්‍රහාරය දියත් කළ කිසිවකුත් ඒ අවස්ථාවේ අත් අඩංගුවට ගෙන තිබුනේ නැත.
මැර කණ්ඩායමේ තවත් සාමාජිකයෙක් සෙල්වරාජා ගජේන්ද්‍රන් මන්ත්‍රීවරයාට පහර දී තිබුනේ යතුරුපැදිය සදහා පළදින හෙල්මටයකිනි.
“මේක රාජ්‍යය විසින් කරන ලද පහර දීමක්,” යයි ගජේන්ද්‍රන් මන්ත්‍රීවරයා එදින මාධ්‍යවේදීන්ට පවසා තිබුණි.
සිංහල හමුදා කඳවුරු දෙමළ පළාත් වලින් ඉවත් කර ගත යුතුයි, දෙමළ ජනතාවගේ පළාත්වල තාවකාලික දෙමළ ආණ්ඩුවක් පිහිටුවන තෙක් පුනරුත්ථාපන වැඩ තාවකාලිකව අත්හිටවිය යුතුයි, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්විය යුතුයි, දෙමළ පළාත්වල සිංහල පොලිස් ස්ථාන පිහිටුවීම නතර කළ යුතුයි, ත්‍රස්තවාදය වැලැක්වීමේ පනත යටතේ පොලිස් ආරක්ෂක මූලස්ථාන වල සිටින දේශපාලන රැඳවුම්කරුවන් වහා නිදහස් කළ යුතුයි ආදී ඉල්ලිම් ඉදිරිපත් කරමින් 1987 සැප්තැම්බර් 15 වනදා තීලිපන් උපවාසයක් ආරම්භ කළේය.
යාපනය විශ්ව විද්‍යාලය ඉදිරිපිට උපවාසයක යෙදී සිටියදී තිලීපන් මිය ගියේ 1987 සැප්තැම්බර් 26 වැනිදා ය.
Facebook Comments
