අසත්‍ය කරුණු ගොනු කරමින් ජාතිවාදී පදනමින් නඩු පවරන බවට උතුරේ පොලිස් ස්ථානාධිපතිවරයකුට චෝදනා එල්ල වී තිබේ.
“සම්පූර්ණ අසත්‍ය ලෙස හදපු චෝදනාවක්. මේ පලාලි පොලීසියේ ඕ.අයි.සී ජාතිවාදී පදනමින් කටයුතු කරන කෙනෙක්. දෙමළ ජනතාව දෙස ජාතිවාදී කෝණයෙන් තමයි එයා බලන්නේ. අපේ ප්‍රජාතන්ත්‍රවාදී අරගල යටපත් කරලා, ආක්‍රමණය කරපු මේ දෙමළ ජනතාවගේ ඉඩම් ස්ථිර වශේයෙන්ම මේ විහාරයට පවරා දෙන්න ඕනේ කියන අරමුණින් මේ නඩුව ගොනු කරලා තියෙන්නේ.”
දෙමළ ජාතික ජනතා පෙරමුණේ ප්‍රධාන ලේකම්, සෙල්වරාසා ගජේන්ද්‍රන් හිටපු මන්ත්‍රීවරයා ජනවාරි 16 වැනිදා එම චෝදනාව එල්ල කළේ, යුද හමුදාව විසින් කන්කසන්තුරේ වලිකාමම් උතුරේ තයියිට්ටි ප්‍රදේශයේ ඉදිකර තිබෙන තිස්ස විහාරස්ථානය ඉදිරිපිටදී පොදු ජනතාවට හා රථ වාහන ගමනාගමනයට බාධා වන අයුරින් සහ අධිකරණ නියෝගය කඩ කරමින් පසුගිය වසරේ උඳුවප් පෝය දිනයේ විරෝධතා පැවැත්වු බවට චෝදනා නගා පලාලි පොලිස් ස්ථානාධිපතිවරයා විසින් මල්ලාහම් මහේස්ත්‍රාත් අධිකරණයේ ගොනු කර තිබු නඩුව විභාගයට ගැනීමෙන් පසු මාධ්‍යවේදීන් වෙත අදහස් දක්වමිනි.
හිටපු මන්ත්‍රීවරයා තව දුරටත් පෙන්වා දෙන්නේ තිස්ස විහාරස්ථානය ඉදිකර තිබෙන ඉඩමේ අයිතිකරුවන් දෙදෙනකුට සහ තමන් ඇතුළු සිය පක්ෂයේ සාමාජිකයන් හය දෙනකුට එරෙහිව පොලීසිය මෙම චෝදනාව ගොනු කර තිබු බවයි.
හිටපු දෙමළ ජනතා නියෝජිතයා ඇතුළු පිරිස වෙනුවෙන් අධිකරණය හමුවේ පෙනී නීතිඥ කනගරත්නම් සුගාස් අධිකරණයට දැනුම් දී ඇත්තේ විරෝධතාකරුවන් සියළු දෙනා එදින රටේ නීතියට යටත්ව විරෝධතා දියත් කළ නමුත් නීති විරෝධි ආකාරයෙන් ඒ මොහොතේ කටයුතු සිදු කළේ පොලිස් නිලධාරින් විසින් බවයි.
කරුණු සලකා බැලු මහේස්ත්‍රාත්වරයා චුදිතයන් සියළු දෙනා ඇප මත නිදහස් කිරීමට නියෝග කරමින් මෙම නඩුව ජුලි මස 12 වැනිදා යලි කැදවීමට නියෝග කළ බව නීතිඥ කනගරත්නම් සුගාස් වැඩි දුරටත් සදහන් කරයි.
උඳුවප් පුර පසළොස්වක පෝදා
2024 වසරේ උඳුවප් පුර පසළොස්වක පෝය දිනයේ තිස්ස විහාරය ඉදිරිපිටදී විරෝධතාවයක් දියත් කර තිබුනේ දෙමළ ජාතික ජනතා පෙරමුණේ ප්‍රධාන ලේකම් සෙල්වරාජා ගජේන්ද්‍රන්ගේ නායකත්වයෙනි.
ඡන්දයට පෙර විවෘත කර තිබූ කන්කසන්තුරයේ පාරක් ‘ජාතිවාදයෙන්, ආගම්වාදයෙන් තොර වෙනසක්’ වෙනුවෙන් පෙනීසිටීමට බලයට පත් අනුර කුමාර දිසානායක ආණ්ඩුව යටතේ පොලිසිය විසින් පාර වසා දමා, ඉඩම් අයිතිය වෙනුවෙන් කරන උද්ඝෝෂණයකට බාධා කිරීමට පියවර ගෙන ඇති බවට ඔහු එදින චෝදනා කර තිබුනි.
“මේ මාර්ග බාධක දැමීමට නියෝගය දුන්නේ මෙම නීතිවිරෝධි විහාරස්ථානයට වග කිව යුතු හාමුදුරුවෝ. එයාගේ නියෝග මත පලාලි ස්ථානාධිපති මේ බාධක දාලා තියෙන්නේ. පලාලි ස්ථානාධිපති වැඩ කරන්නේ ආණ්ඩුවටද? නැතිනම් මේ හාමුදුරුවන්ගේ වහලෙක් ලෙසද කියලා අපි ප්‍රශ්න කරනවා.”
ප්‍රදේශවාසී දෙමළ ජනතාව පවසන පරිදි යුද හමුදා අනුග්‍රහයෙන් තිස්ස විහාරය ඉදිකර ඇත්තේ දෙමළ පවුල් 14 කට අයත් ඉඩම් අක්කර හයකට වැඩි භූමි භාගයකය.
2024 වසරේ දෙසැම්බර් 13 වැනිදා පැවැති යාපනය දිස්ත්‍රික් සංවර්ධන කමිටු රැස්වීමේදී දෙමළ ජාතික ජනතා පෙරමුණේ නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් යාපනය දිස්ත්‍රික් සංවර්ධන කමිටුවේ සභාපති ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර්ට දැනුම් දී තිබුනේ තිස්ස විහාරස්ථානය ඉදි කර ඇත්තේ නීති විරෝධි ආකාරයෙන් බවයි.
“තයියිට්ටි පිහිටි පෞද්ගලික ඉඩමක ඇත්තටම බෞද්ධ විහාරයක් නීති විරෝධී ලෙස ඉදිකරලා තියනවා. ඒකේ තියෙන ප්‍රශ්නය තමයි පන්සලට අයිති ඉඩම තයියිට්ටියේ තියෙද්දී පෞද්ගලික ඉඩමක් අත්පත් කරගෙන කිසිම අවසරයකින් තොරව ඒක හදලා තියෙන්නේ. ”
තිස්ස විහාරය ඉදිකිරීමට අල්ලා ගත් දෙමළ ජනයාගේ ඉඩම් නිදහස් කිරීමට හිටපු අමාත්‍ය ඩග්ලස් දේවානන්ද නායකත්වය දුන් දිස්ත්‍රික් සංවර්ධන කමිටු රැස්වීමේදී මීට ඉහතදී තීරණය කළ බව අවධාරණය කරන ගජේන්ද්‍රන් මන්ත්‍රීවරයා රාමලිංගම් ඇමැතිවරයාගෙන් ඉල්ලා තිබුනේ එම තීරණය ක්‍රියාවේ යොදවන ලෙසයි.
දෙමළ ජාතික ජනතා පෙරමුණේ නායකයාට ප්‍රතිචාර දක්වමින් ධීවර, ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් සදහන් කර තිබුනේ එම ඉඩම් නිදහස් කිරීමට මීට ඉහතදී ගෙන ඇති තිරණය ක්‍රියාත්මක විය යුතුය යන ස්ථාවරයේ තමන්ද සිටින බවයි.
“අනවසරයෙන් අල්ලාගත් ඉඩම් නිදහස් කළ යුතුයි. පළවෙනි කාරණය එම ඉඩම හමුදාව විසින් අත්පත් කරගෙන ඇත්නම් ඒ පිළිබඳ සම්පූර්ණ වාර්තාවක් ලබාදෙන ලෙස අප ඉල්ලා තිබෙනවා. දෙවැනි කාරණය හමුදාවට එය අවශ්‍ය ද ? අවශ්‍යතාවය මොකක් ද? ඉඩම ගන්නේ ඇයි? ඇතුළු සම්පුර්ණ වාර්තාවක් අපි ඉල්ලා තිබෙනවා. හමුදාව ගත්තත් සියයට 90ක ඉඩම නිදහස් කරන්න සූදානමකින් තමයි ඉන්නේ. ඒ නිසා ඔබ කියු පරිදි දැනටමත් ගත් තීරණයක් තිබෙනවා. ඒ තීරණයත් එක්ක අපි ඉදිරියට යමු කියන එක තමයි මගෙ ස්ථාවරයත් .”
“කන්කසන්තුරේ ඓතිහාසික තිස්ස විහාරස්ථානයේ ප්‍රතිසංස්කරණය කරන ලද චෛත්‍යයෙහි කොත තැන්පත් කිරීමේ පුණ්‍ය උත්සවය” 2023 අප්‍රේල් 27 වැනි දින සිදු කළ බව අප්‍රේල් 29 වැනිදා ශ්‍රී ලංකා යුද හමුදාව සිය නිල පුවත් වෙබ් අඩවියේ සදහන් කර තිබුනි.
“ක්‍රිස්තු වර්ෂ 3 වන සියවස දක්වා දිව යන ඉතිහාසයකයට උරුමකම් කියන මෙම විහාරස්ථානය දේවානම්පියතිස්ස රජු විසින් කරවන ලද බව ඉතිහාසයේ සඳහන් වෙතැ,” යි යුද හමුදාව පවසයි.
විහාරස්ථානය ඉදිකිරීම වෙනුවෙන් තෙලිප්පලෙයි ප්‍රාදේශිය ලේකම්වරයාගේ අනුමැතිය පවා හිමිව නොමැති බවටද සෑම පොහොය දිනකම තිස්ස විහාරස්ථානය ඉදිරිපිට දී උද්ඝෝෂණයේ යෙදෙන දෙමළ ජනයා කරුණු දක්වති.
Facebook Comments
