විසිහතර අවුරුද්දක් සපිරෙන පොංගු තමිල් ප්‍රකාශනය යාපනයේදී සැමරේ

ස්වකීය දේශපාලන ඉරණම ස්වාධීන ලෙස තීන්දු කරගැනීම වෙනුවෙන් දෙමළ ජනයා අරගල කරන අයිතීන් පිළිබඳ පොදු ඉල්ලීම් ඇතුලත් පොංගු තමිල් ප්‍රකාශනය ඉදිරිපත් කොට විසි හතර වසරක් සම්පුර්ණවීම යාපනයේදී සමරා තිබේ.

යාපනය විශ්වවිද්‍යාලය තුල ස්ථාපිත කර තිබෙන පොංගු තමිල් ස්මාරකය ඉදිරිපිටදී 2025 ජනවාරි 17 සිකුරාදා පැවැති සැමරුම යාපනය විශ්වවිද්‍යාල ශිෂ්‍ය සංගමය විසින් සංවිධානය කර තිබු බවයි පළාත් බද වාර්තාකරුවන් පවසන්නේ.

එම අවස්ථාවට විශ්වවිද්‍යාලයේ දෙමළ සිසුන් රැසක් එක්ව සිටි බව ඔවුන් වැඩි දුරටත් සදහන් කරයි.

පොංගු තමිල් හෙවත් දෙමළ පිබිදීමේ ප්‍රකාශනය 2001 ජනවාරි 17 වැනිදා මුල් වරට ප්‍රකාශයට පත් කෙරුණි.

ස්වයං නිර්ණ අයිතිය, සම්ප්‍රදායික දෙමළ නිජබිම, දෙමළ ජාතිකත්වය මුල් කොටගත් දෙමළ ජනයාගේ එක්සත් අභිලාෂ මෙම ප්‍රකාශනයේ ඇතුලත් වන අතර එම අයීතින් රජය විසින් පිළිගත යුතුය යන්න එහි සඳහන් වේ.

සැමරුමට එක් වෙමින් යාපනය විශ්ව විද්‍යාල ශිෂ්‍ය සංගමයේ ලේකම් එස්. සිවගජෙන් කියා සිටියේ මෛත්‍රී-රනිල් පාලන සමයේ කෙටුම්පත් කළ ව්‍යවස්ථාව ශ්‍රී ලංකාවේ අලුත් ආණ්ඩු ක්‍රම ව්‍යවස්ථාව ලෙස සම්මත කරගැනීමේ අභිලාෂය සහිතව නව ආණ්ඩුව කටයුතු කරන බවයි.

“දෙමළ ජනතාවට විසඳුම ඒකීය රාජ්‍ය ව්‍යවස්ථාවකට යට නොවන 13 වැනි සංශෝධනයෙන් ඔබ්බට ගිය එකක්. සකස් කිරීමට යන බව කියන ශ්‍රී ලංකා තුන්වැනි ජනරජයේ ආණ්ඩුක්‍රම ව්‍යවස්ථාවෙන් ඒකීය රාජ්‍ය නමින් යහපාලන රජය විසින් සකස් කර ඇති ව්‍යවස්ථා කෙටුම්පත නැවත ඇදගෙන දෙමළ ජනතාවගේ ඔළුවට නැවතත් දෙමළ ජනතාවගේ නියෝජිතයන්ගේ එකඟතාව සහිතව මේ ව්‍යස්ථාව අනුමත කරගන්න ඕන කියන අරමුණින් ශ්‍රී ලංකා රජය දැඩි අධිෂ්ඨානයෙන් ඉන්නවා.”

ශිෂ්‍ය සංගම් නායකයා දැඩිව උතුරේ දෙමළ දේශපාලනඥයන්ට අවධාරණය කර තිබුනේ දෙමළ ජනතාව සදහා සුදුසුම විසදුම 2016 වසරේදී දෙමළ බහුජන සංවිධානවලින් සැදුම්ලත් තමිල් මක්කල් පේරවෙයි (දෙමළ ජනතා සභාව) කෙටුම්පත් කළ යෝජනා බවයි.

“මේ වෙලාවේ අපි දෙමළ ජාතික දේශපාලන පක්ෂ සියල්ලටම එකක් ඉදිරිපත් කරනවා. 13 වැනි සංශෝධනය යටතේ ඒකීය රාජ්‍යට සම්බන්ධ කිසිදු ව්‍යවස්ථා ක්‍රමවේදයකට එකග නොවන, ඒක ප්‍රතික්ෂේප කරන, තමිල් මක්කල් පේරවෙයි යෝජනා කර ඇති විසදුම් සැලැස්ම තමයි දැන් තාමත් දෙමළ ජනතාව සදහා සුදුසුම විසදුම් සැලැස්ම ලෙස අප ඉදිරියේ තියෙන්නේ.”

ශ්‍රී ලංකාව වෙනුවෙන් නව ආණ්ඩුක්‍රම ව්‍යවස්ථාවක් සකස් කිරීමේදී ඒකීය රාජ්‍ය ප්‍රතික්ෂේප කර ෆෙඩරල් ව්‍යුහයක් සහිත පාලනයක්
සදහා නව රජයට බල කිරීම වෙනුවෙන් උතුරේ දෙමළ දේශපාලන පක්ෂ අතර සාකච්ඡා පසුගිය වර්ෂ අවසානයේදී ආරම්භ වී තිබුනි.

එම කතිකාවට මුලපුරා සිටින දෙමළ ජාතික ජනතා පෙරමුණේ (TNPF) අරමුණ වී තිබුනේ නව ආණ්ඩුක්‍රම ව්‍යවස්ථාවක් සකස් කිරීමේදී දෙමළ ජනතාවගේ ගැටළු වලට ලබා දිය යුතු විසදුම් සම්බන්ධයෙන් 2016 වසරේදී දෙමළ බහුජන සංවිධානවලින් සැදුම්ලත් තමිල් මක්කල් පේරවෙයි (දෙමළ ජනතා සභාව) කෙටුම්පත් කළ යෝජනා එම සාකච්ඡාවට පදනම් කර ගැනීමයි.

මෛත්‍රී-රනිල් පාලන සමයේ කෙටුම්පත් කළ ඒකීය රාජ්‍යයත් බුද්ධාගමට ප්‍රමුඛස්ථානයත් සුරකින ව්‍යවස්ථාව ශ්‍රී ලංකාවේ අලුත් ආණ්ඩු ක්‍රම ව්‍යවස්ථාව ලෙස සම්මත කරගැනීමේ අභිලාෂය අනුර කුමාර දිසානායක ජනාධිපතිවරයාගේ රජය වෙතින් මේ වනවිට පලවී ඇත.

පොංගු තමිල් ස්මාරකය

යාපනය විශ්ව විද්‍යාල සිසු සංගමයේ මුලිකත්වයෙන් 2018 වසරේ සැප්තැම්බර් 17 වැනි සඳුදා පොංගු තමිල් ස්මාරකය යාපනය විශ්ව විද්‍යාලයේදී විවෘත කර තිබුනි.

එම අවස්ථාවට එක්වෙමින් එවකට යාපනය විශ්ව විද්‍යාලයේ උප කුලපති රත්නම් විග්නේෂ්වරන් පවසා තිබුනේ පොංගු තමිල් ස්මාරකය දෙමළ ජනයාගේ අයිතීන් විදහා දක්වන සංකේතයක් වනු ඇති බවයි.