රොහින්ග්‍යාවරුන්ට ශ්‍රී ලංකාවට පැමිණිමට දිරි ගන්වන්නේදැයි මුලතිව් ගුවන් හමුදා කඳවුරේ රඳවාගෙන සිටින මියන්මාරයේ යුද භීෂණයෙන් දිවි ගලවාගෙන පලා ආ දරු දැරියන් ඇතුළු රොහින්ග්‍යාවරුන් ආපසු එරටට පිටමං නොකරන ලෙස බලකරමින් යුද පීඩිත මුලතිව් හි විරෝධතාවක් දියත් කළ රාජ්‍ය නොවන සංවිධාන ක්‍රියාකාරිකයකුගෙන් අපරාධ පරීක්ෂණ දෙපාර්තමේන්තුව ප්‍රශ්න කර තිබේ.
පොලිසිය එහිදී හෙළි කොට ඇත්තේ බහුජන විරෝධතා සම්බන්ධයෙන් විමර්ශන සිදු කරමින් සිටින බවයි.
2025 ජනවාරි 17 වැනි සිකුරාදා පැරණි පොලිස් මුලස්ථාන ගොඩනැගිල්ලේ පිහිටි අපරාධ පරීක්ෂණ දෙපාර්තමේන්තුවේ තැනැත්තන් වෙළදාම් ජාවාරම් විමර්ශන අංශයේ සමුද්‍රීය අපරාධ විමර්ශන අංශයේ ස්ථානාධිපති හමුවට කැදවා පැය පහකට ආසන්න කාලයක් මෙලෙස ප්‍රශ්න කර ඇත්තේ උතුරු නැගෙනහිර සම්බන්ධිකරණ කමිටුවේ සම සංවිධායක යාඩ්සන් ෆිගිරාඩෝ ගෙනි.
පොලිස් ප්‍රශ්න කිරීම් හමුවේ යාඩ්සන් ෆිගිරාඩෝ පවසා ඇත්තේ එවැනි දිරි ගැන්වීමක් සිදු නොකරන බව තමන් ප්‍රසිද්ධියේම ප්‍රකාශයට පත් කර ඇති බවයි.
“ඔබ රොහින්ග්‍යා ජනයාට මෙරටට පැමිනීමට දිරිමත් කරනවාද කියලා ඔවුන් ඇහුවා. ශ්‍රී ලංකාවට පැමිණි සරණාගතයන්ට මෙහි රැඳී සිටීමට හෝ දිගටම මෙහි පැමිණීමට අප සැමවිටම දිරිමත් නොකරන බව අපි ප්‍රසිද්ධියේ ප්‍රකාශ කර තිබෙනවා කියලා කිව්වා. එහෙම උනත් ඇවිල්ලා ඉන්න අය එක්සත් ජාතීන්ගේ සංවිධානය සමඟ සහයෝගයෙන් ජාත්‍යන්තර සම්මතයන්ට අනුව මානුෂීය හේතූන් මත පිළිගත හැකි රටවලට යැවීම සුදුසු වැඩක්. මේකෙදී ජාත්‍යන්තර නීති සම්මතයන් ද අනුගමනය කරන්න පුළුවන් කියලත් අවධාරණය කරමින් මම මගේ ප්‍රකාශය ලබා දුන්නා.”
මුලතිව් ගුවන් හමුදා කඳවුරේ රඳවාගෙන සිටින සියයකට අධික රොහින්ග්‍යාවරුන්ට ලබා දී ඇත්තේ කෙබදු ආකාරයක උපකාරදැ’යි අපරාධ පරීක්ෂණ දෙපාර්තමේන්තුවේ නිලධාරීන් ප්‍රශ්න කර තිබේ.
“අපි ගොඩක් උදව් කෙරුවේ නැ. නමුත් අපි අපේ අදහස් ප්‍රකාශ කළේ මානුෂීය හේතූන් මත. ඔවුන්ට හැකි අයුරින් අපි අපේ සහයෝගය ලබා දී තිබෙනවා.”
මුලතිව් ගුවන් හමුදා කඳවුරේ රඳවාගෙන සිටින එකසිය පහලොස් දෙනෙකුගෙන් සමන්විත රොහින්ග්‍යාවරුන් පිරිස ආපසු එරටට පිටමං නොකරන ලෙස බලකරමින් යුද පීඩිත මුලතිව් හිදී ජනවාරි 09 වැනිදා දියත් කළ විරෝධතාවයට කොළඹ සිට මුලතිව් ගිය ප්‍රකට මානව හිමිකම් ක්‍රියාධරයකු වන රුකී ප්‍රනාන්දු ද සහභාගී වී තිබුනි.
යුද භීතියෙන් මියන්මාරයෙන් පලා ආ රොහින්ග්‍යා වරුන් ආපසු එරටට පිටමං නොකරන ලෙස බලකරමින් සිවිල් ක්‍රියාධරයන්, දේශපාලන නායකයන්, වෘත්තීය සමිති නායකයන් ඇතුළු පිරිස කොළඹ ජනාධිපති ලේකම් කාර්යාලය ඉදිරිපිට 2025 ජනවාරි මස 10 වැනි සිකුරාදා දින විරෝධතාවයක් දියත් කර ජනාධිපති ලේකම් කාර්යාලයට ලිපියක් බාර දී තිබු අතර ඊට නායකත්වය ලබා දී තිබුනේ නව සම සමාජ පක්ෂයට අනුබද්ධ ක්‍රියාත්මක වන අතුරුදහන්වූවන් පිළිබඳ සොයා බැලීමේ කමිටුවයි.
රොහින්ග්‍යාවරුන් ආපසු එරටට පිටමං නොකරන ලෙස බලකරමින් විරෝධතා කිහිපයක්ම දියත් කර තිබියදී තමන් පමණක් අපරාධ පරීක්ෂණ දෙපාර්තමේන්තුව හමුවට කැදවීමට හේතුව කුමක්දැයි පොලිස් නිලධාරීන්ගෙන් ප්‍රශ්න කළ බව යාඩ්සන් ෆිගිරාඩෝ අගනගරයේ මාධ්‍යවේදීන් සමග කියා තිබේ.
“මේ සම්බන්ධයෙන් විවිධ පුද්ගලයන් උද්ඝෝෂණ කරලා තියනවා. ඔවුන්ට සිතාසි නොලැබුණේ ඇයි? මුලතිව් උද්ඝෝෂණයට මමත් හිටියා. ඒ නිසා මට විතරක් සිතාසි ආපු එක ගැන මම ඔවුන්ගෙන් ප්‍රශ්න කළා. අනිත් අයට එන්න කිව්වේ නැත්තේ ඇයි? විපක්ෂ නායකවරයා පාර්ලිමේන්තුවේදී ප්‍රකාශයක් කරා. කොළඹ උද්ඝෝෂණ කරලා තියනවා. ”
අපරාධ පරීක්ෂණ දෙපාර්තමේන්තුවේ නිලධාරීන් ඔහුට පවසා ඇත්තේ රාජ්‍ය නොවන සංවිධාන සහ සිවිල් සමාජය සිදුකරන විරෝධතා සම්බන්ධයෙන් සිදු කරන විමර්ශනයකට අදාලව මෙම කැදවීම සිදුකළ බවයි.
උතුරු නැගෙනහිර සම්බන්ධිකරණ කමිටුවේ සම සංවිධායක යාඩ්සන් ෆිගිරාඩෝ අගනගරයේ මාධ්‍යවේදීන් සමග වැඩි දුරටත් පවසා ඇත්තේ සිවිල් සමාජයෙන් මේ ආකාරයෙන් සිදු කරන ප්‍රශ්න කිරීම අයහපත් ප්‍රවනතාවක් බවයි.
“සිවිල් සමාජය විමර්ශනය කිරීම ශ්‍රී ලංකාවේ අද ඊයේ ආරම්භ වු ප්‍රශ්නයක් නෙමෙයි. දිගටම තියන එකක්. මේ ආණ්ඩුව වේවා පහුගිය ආණ්ඩුව වේවා සිවිල් සමාජයෙන් ප්‍රශ්න කරලා ඒ අයගේ වැඩවලට බාධා කරන වැඩේට මම එකඟ වෙන්නේ නැ. මට කරපු කැදවීමත් හොඳ දෙයක් නෙමෙයි. මේක නුසුදුසු ක්‍රියාවක්. කිසිම අපරාධයක් නොකර මාව කැදෙව්වේ ඇයි කියලා මම ප්‍රශ්න කරා.”
ලක්ෂයක පමණ අනවසර සංක්‍රමණිකයන් පිරිසක් ඉදිරි දිනවලදී මියන්මාරයෙන් මෙරටට පැමිණිමේ නියමිතව ඇති බවට ආනන්ද විජේපාල අමාත්‍යවරයා පසුගියදා පාර්ලිමේන්තුවේදී සදහන් කළත් ඔහුගේ ප්‍රකාශයෙන් පසු එකදු සරණාගතයකු මෙරටට පැමිණි බවක් වාර්තා වී නැත.
Facebook Comments
